6
[Job]
1 Na Job el topuk ac fahk,
2 “Fin mwe keok ac asor luk inge pauniyuki ke sie mwe paun,
3 Ac fah toasr liki puk in meoa,
Ouinge lela kas toasr luk in tia mwe lut nu sum.
4 God Fulatlana El pisrikyuwi ke osra in pisr,
Ac pwasin kac uh fahsrelik nu in monuk nufon.
God El takunma mwe aksangeng puspis lainyu.
5 “Soko donkey el insewowo ke el mongo mah,
Ac soko cow el misla ke el kang mah uh.
6 A su ku in kang mongo emyohu ma wangin sohl kac?
Ya oasr eman acn fasrfasr ke sie atro?
7 Nga tiana ke kang kain mongo ouinge uh,
Ac ma nukewa nga kang uh nga wohtwot kac.
8 “Efu ku God El tia ase nu sik ma nga siyuk uh?
Efu ku El tia topuk pre luk uh?
9 Nga ke Elan tari uniyuwi na!
10 Nga fin etu mu El ac uniyuwi, nga lukun sro nwe lucng ke engan uh,
Finne upa ngal luk uh.
Nga etu lah God El mutal;
Nga soenna wi lain ma El sapkin uh.
11 Ma ya ku se luk ngan moul na muta ange?
Mwe mea nga in moul fin wanginna finsrak luk?
12 Mea, nga orekla ke eot? Mea, monuk orekla ke bronze?
13 Wanginla ku luk in sifacna moliyula;
Wangin sie acn nga ku in suk kasru luk we.
14 “Ke pacl in keok ouinge uh nga arulana enenu mwet kawuk na pwaye,
Finne nga ngetla liki God, ku tia.
15 A komtal, mwet kawuk luk, komtal kiapweyu oana soko infacl
Ma paola ke pacl wangin af uh.
16 Infacl uh fonani ke snow ac ice,
17 Tusruktu fin fusrfusryak, na ac kofelik ac wanginla,
Ac infacl uh pisala oan — paola ac wangin ma loac.
18 Un mwet fufahsryesr fin camel uh elos ac kuhfla liki inkanek lalos in sukok kof;
Na elos ac tuhlac ac misa yen mwesis uh.
19 Un mwet fufahsryesr liki acn Sheba ac Tema elos sukok kof,
20 Tusruktu wanginla finsrak lalos ke elos ac sun sisken infacl ma paola inge.
21 Komtal oana kain infacl se ingan nu sik —
Komtal liye ongoiya nu sik inge, na komtal ac sangeng ac kohloli likiyu.
22 Mea, oasr ngusr luk komtal in orek lung nu sik,
Ku in sang molin eyeinse nu sin mwet ke sripuk,
23 Ku in moliyula liki inpoun mwet lokoalok, ku sie leum kou?
24 “Kwal, tal lutiyu. Fahkma ma sufal luk an.
Nga ac misla ac porongekomtal.
25 Kaskas suwohs uh ac ku in lulalfongiyuk,
Tusruktu wangin kalmen ma komtal fahk an.
26 Komtal mu wangin kalmen ma nga fahk uh, mwe na eng tuhtuh;
Na efu ku komtal topuk kas ma nga fahk ke keok luk inge?
27 Komtal ku pacna in susfa in eisla tulik mukaimtal nutin mwet foko uh
Ac akkasrupye komtal ke ma lun mwet kawuk na pwaye lomtal uh!
28 Ngetma liye mutuk. Nga ac tia kikap.
29 Fal tari ma komtal oru nu sik an. Nimet sifil orekma sesuwos.
Nimet fahk kutena kas in akkolukyeyu. Wangin ma sufal luk.
30 A komtal pangon mu nga kikiap —
Komtal nunku mu nga tia ku in akilen inmasrlon ma wo ac ma koluk.