1 Jerusalem, tuyak ac tolak oana faht;

Wolana lun LEUM GOD srekomi!

2 Lohsr matoltol ac fah afinya mutunfacl ngia,

A kalem lun LEUM GOD fah tolkomyak,

Ac wolana lal ac fah wi kom.

3 Mutunfacl puspis ac fah tuku nu ke kalem lom,

Ac tokosra uh nu ke kalmelik lun len sasu lom.

4 Ngetla ac liye ma sikyak uh:

Mwet lom elos fahsreni tuh elos in foloko nu yen selos!

Wen nutum fah tuku liki acn loessula;

Acn nutum ac fah utuk tuku oana tulik srisrik.

5 Kom ac liye ma inge ac sessesla ke engan,

Ac insiom ac fah kihmkimyak kac.

Mwe kasrup lun mutunfacl uh ac fah utukeni nu yurum;

Kasrpalos ac fah utuk tuku fin meoa me.

6 Camel puspis ac fah tuku liki acn Midian ac Ephah.

Ac fah tuku pac liki acn Sheba, utuk gold ac ma keng.

Mwet uh ac fah sulkakunelik pweng wo

Ke ma LEUM GOD El oru!

7 Sheep nukewa in acn Kedar ac Nebaioth

Ac fah utuku nu yurum in mwe kisa —

Ac fah kisakinyuk fin loang uh in akinsewowoye LEUM GOD.

LEUM GOD fah oru Tempul lal in wolana liki meet ah.

8 Mea kasrusr tuku mui ingo oana sohk lun pukunyeng uh,

Oana wule ma sohk folok nu acn selos?

9 Oak puspis pa ingo, su tuku liki acn loessula

In folokonma mwet lun God nu yen selos.

Elos utuk silver ac gold in akfulatye Inen LEUM GOD,

God mutal lun Israel,

Su oru mutunfacl nukewa in akfulatye mwet lal.

10  LEUM GOD El fahk nu sin Jerusalem,

“Mwetsac fah sifil musai pot lom,

Ac tokosra lalos fah kulansupwekom.

Ke mulat luk nga tuh kalyei kom,

Tusruktu inge nga fah akkalemye

Lungse ac pakoten luk nu sum.

11 Mutunpot lom ac fah ikak ke len ac fong

Tuh tokosra lun mutunfacl puspis

Fah ku in us mwe kasrup lalos nu yurum. Fwack 21:25–26

12 Tusruktu mutunfacl ma tia kulansupwekom

Ac fah arulana sikiyukla.

13 “Sak ma wo oemeet ke insak lun Lebanon —

Sak pine, juniper, ac cypress —

Ac fah utuku in sifil musai kom, Jerusalem,

In oru Tempul luk in kato

Ac oru siti luk in oasku.

14 Wen nutin mwet su tuh akkeokye kom

Fah tuku ac epasr ac alu nu sum.

Elos nukewa su srungakom meet ac fah faksufi ke niom.

Elos fah pangon kom ‘Siti lun LEUM GOD,’

‘Zion, Siti lun God Mutal lun Israel.’ Fwack 3:9

15 “Ac fah tia sifilpa sisila ac srungayuk kom,

Sie siti wangin mwet muta we ac mwesisla.

Nga fah oru kom in pwengpeng ac kato,

Sie acn in engan nwe tok.

16 Mutanfahl ac tokosra ac fah karingin kom

Oana sie nina su katiti tulik natul.

Kom fah etu lah nga, LEUM GOD, pa molikomla,

Lah God Kulana lun Israel El aksukosokyekomla.

17 “Nga fah usot gold in aolla bronze,

Nga fah usot silver ac bronze in aolla osra ac sak,

Ac osra in aolla eot.

Mwet leum lom fah tia sifil akkeokye kom;

Nga fah oru elos in leumi kom ke suwohs ac misla.

18 Sulallal ac fah tia sifil lohngyuk.

Musalla lulap ac fah tia sifilpa osrokak acn sum uh.

Nga fah lisring kom ac loangekom oana sie pot ku;

Kom fah kaksakinyu mweyen nga molikomla.

19 “Kom ac tia sifil enenu faht in kalem lom ke len,

Ku malem in kalem lom ke fong.

Nga, LEUM GOD, ac fah kalem lom nwe tok.

Kalem ke wolana luk fah tolkomyak. Fwack 21:23; 22:5

20 Len in asor lom ac fah safla.

Nga, LEUM GOD, ac fah kalem lom nwe tok,

Su ac oan paht liki faht ac malem.

21 Mwet lom nukewa fah oru ma suwohs,

Elos fah usrui facl se inge nwe tok.

Nga oralosla ac oakelosi,

In fahkak wolana luk nu sin mwet nukewa.

22 Finne sruf se ma srik ac pusisel liki nukewa lom,

Ac fah puseni ac yokelik oana sie mutunfacl na ku.

Nga fah oru ma inge in sa sikyak

Ke pacl fal.

Nga pa LEUM GOD!”