53
1 Mwet uh topuk,
“Ku su lukun ku in lulalfongi ma kut srumun inge?
Su ac ku in liye poun LEUM GOD in ma inge? Rom 10:16; Jn 12:38
2 Ma lungse lun LEUM GOD pa inge, tuh mwet kulansap lal
In kapak oana soko sak fusr ma yoki ac okahla in acn pao.
El tia mangol ac el tia pac kato.
Wanginna ma ac oru kut in lohang nu sel.
Wangin ma wo kacl, ku ma fal in pwen mutasr nu sel.
Wangin ma oru kut in ke apkuran nu yorol.
3 Kut srungal ac sisella.
El mutangla keok ac waiok.
Wanginna mwet ngetang nu sel.
Kut pilesral ac tiana lohang nu sel.
4 “A el mutangla keok su fal in orek nu sesr,
Ac waiok su ac ma lasr.
Ke orek ouinge nu sel, kut pangon mu
Mwe keok inge kaiyuk lun God nu sel. Mt 8:17
5 A kanteyuki el ke sripen ma koluk lasr,
Sringsring el ke ma koluk kut orala.
Kut kwela ke sripen kalya ma el keok kac,
Akwoyeyukla kut ke sringsring ma el eis. 1 Pet 2:24
6 Kut nukewa oana sheep tuhlac,
Kais sie sesr fahsr ke inkanek lal sifacna.
A LEUM GOD El filiya facl
Kaiyuk su fal in ma nu sesr nukewa. 1 Pet 2:25
7 “Orek El arulana koluk, a el pusisel in mutangla;
El tiana fahkla sie kas.
Oana soko sheep fusr ma akola in anwuki,
Oana soko sheep ma kokola in kalkulla,
El tiana fahkla sie kas. Fwack 5:6 53:7–8; Orek 8:32–33
8 Elos sruokilya, ac nununkal, ac kololla nu ke misa,
A wangin sie lohang nu ke ongoiya lal.
Anwuki el ke sripen ma koluk lun mwet lasr.
9 Filiyuki el in sie kulyuk yurin mwet koluk,
El pukpuki inmasrlon mwet kasrup,
El ne tia orala kutena ma koluk,
Ku fahkla sie kas kikiap.” 1 Pet 2:22
10 LEUM GOD El fahk,
“Oakwuk luk pa elan keok;
Misa lal uh sie mwe kisa in ase nunak munas.
Ouinge el fah liye fwilin tulik natul;
Ac fah loes moul lal,
Ac ke sripal, oakwuk luk fah orekla.
11 Tukun sie moul na keok, el fah sifil insewowo;
El fah etu lah el tia keok ke wangin.
Mwet kulansap oaru luk, su nga insewowo kacl
Fah polong kalyeiyuk lun mwet puspis,
Ac ke sripal nga fah nunak munas nu selos.
12 Ouinge nga fah arulana akfulatyal,
Ac sang acn sel inmasrlon mwet fulat ac ku.
El sifacna asang moul lal
Ac ipeis ke mwe ongoiya lun mwet koluk.
El eis acn sin mwet koluk puspis,
Ac el pre tuh in nunak munas nu selos.” Lk 22:37