9
Wuleang Inmasrlol God Ac Noah
1 God El akinsewowoyal Noah ac wen tolu natul, ac fahk, “Kowos isusi, tuh fwilin tulik nutuwos fah puseni ac nwakla faclu nufon. Gen 1:28 2 Kosro ac won ac ik nukewa ac fah moul in sangeng suwos. Ma inge nukewa ac fah oan ye ku lowos. 3 Inge kowos ku in kang ma inge, oapana fokin ma kapak inima uh. Nga sot ma inge nukewa nu suwos kowos in mongo kac. 4 Ma se na ma kowos fah tia kang uh pa ikwa ma srakna oasr srah kac, mweyen moul uh oasr ke srah uh. Lev 7:26–27; 17:10–14; 19:26; Dut 12:16, 23; 15:23 5 Kutena mwet su eisla moul lun sie pac mwet, ac fah anwuki el. Kutena kosro ma eisla moul lun sie mwet, kalya nu sel pa misa. 6 Mwet uh orekla in luman God, ke ma inge kutena mwet su akmuseya sie mwet fah anwuki pac sin mwet. Exo 20:13; Gen 1:26
7 “Enenu in pukanten tulik nutuwos, tuh fwilin tulik nutuwos fah apunla fin faclu.” Gen 1:28
8 God El fahk nu sel Noah ac wen tolu natul, 9 “Inge nga oru sie wulela inmasrlosr, ac oayapa yurin fwilin tulik nutuwos, 10 ac yurin won nukewa ac kosro nukewa — ma nukewa ma wi kowos tufoki liki oak uh. 11 Ke kas inge nga ac oru wulela luk yuruwos: nga wulela mu wangin sie pacl nga ac sifilpa kunausla ma su oasr moul la ke sronot. Faclu ac fah tia sifilpa kunausyukla ke sronot. 12 Pa inge mwe akpwaye nu ke wuleang kawil se su nga oru yuruwos ac yurin ma moul nukewa inge, 13 nga filiya lelakem luk in pukunyeng uh. Ac fah mwe akul ke wuleang se inmasrlok ac faclu nufon nwe tok. 14 Kutena pacl ma nga afinya kusrao ke pukunyeng ac lelakem uh sikyak, 15 nga fah esam wuleang luk nu suwos ac nu sin kosro nukewa, lah sronot ac fah tia sifil kunausla ma nukewa ma oasr moul la. 16 Pacl se lelakem uh sikyak in pukunyeng uh, nga ac fah liye ac esam wuleang kawil inmasrlok ac ma moul nukewa faclu. 17 Pa ingan akil lun wulela su nga oru nu sin ma oasr moul la nukewa.”
Noah Ac Wen Tolu Natul
18 Wen tolu natul Noah su tufoki liki oak uh pa Shem, Ham, ac Japheth. (Ham pa papa tumal Canaan.) 19 Wen tolu natul Noah inge pa papa tumun mwet faclu nufon.
20 Noah, su tuh sie mwet ima, pa mwet se oemeet ma tuh yukwiya ima in grape uh. 21 Tukun el numla kutu wain uh, el sruhila, sarukla nuknuk lal, ac oan koflufolla in lohm nuknuk sel. 22 Ke Ham, papa tumal Canaan, el liyauk lah papa tumal el koflufolla oan, el illa ac fahkang nu sin tamulel luo wiel. 23 Na Shem ac Japheth eis nuknuk loeloes se ac filiya finpisaltal. Eltal kohloli nu in lohm nuknuk sac ac afinya papa tumaltal. Mutaltal ngetla lukel tuh eltal in tia liye koflufol lal. 24 Ke sruhi lal Noah uh sarla lukel ac el etauk ke ma wen se ma fusr natul el oru nu sel, 25 el fahk,
“Sie selnga nu facl Canaan!
El ac fah sie mwet kohs nu sin tamulel lal.
26 Kaksakin LEUM GOD, God lal Shem!
Canaan el ac fah mwet kohs lal Shem.
27 God Elan akyokyelik acn lal Japheth!
Lela fwilin tulik natul in puseni ac muta yurin mwet lal Shem.
Canaan el ac fah mwet kohs lal Japheth.”
28 Tukun sronot sac, Noah el moul yac tolfoko lumngaul, 29 ac misa ke el yac eufoko lumngaul matwal.