27
On In Mas Misa Nu Ke Siti Tyre
1 LEUM GOD El fahk nu sik: 2 “Kom, mwet sukawil moul la, yuk soko on in mas misa an nu sin acn Tyre, 3 siti se ma oan weacn uh, su orek kuka nu sin mutunfacl nukewa ma oan weacn uh. Fahk nu sel kas su LEUM GOD Fulatlana El fahk inge:
“Tyre, kom tuh filangkin oasku lom an.
4 Acn sum pa meoa uh.
Mwet musaikomla uh orekomla oana soko oak na kato.
5 Elos oru ipinsak lom nukewa ke sak fir Fineol Hermon,
Ac soko sak cedar liki acn Lebanon nu ke kwesu lom.
6 Elos eis sak oak Bashan me in orek oac kac,
Ac orala falful ke oak an ke sak pine Cyprus me,
Ac nawela ke ivory.
7 Nes nu ke oak an orekla ke nuknuk linen,
Aok, nuknuk akul su tuku Egypt me,
Arulana mahnek in liyeyuk yen loesla me.
Ac nuknuk sunyen twek orekla ke nuknuk wowo,
Tuhn kac uh folfol ac sroninmutuk, ma tuku Cyprus me.
8 Mwet in kal lom elos mwet Sidon ac Arvad,
Ac mwet pisrla in us oak an mwet na lom sifacna.
9 Mwet kamtu fin oak uh mwet na pah,
Su tuku Byblos me.
Selu fin oak nukewa su kalkal meoa
Elos tuku moul ke acn in kuka lom.
10 “Mwet mweun lun Persia, Lydia ac Libya elos inmasrlon mwet mweun lom. Elos sripisrya mwe loeyuk lalos ac susu in mweun lalos in lohm sin mwet mweun lom. Elos pa akpwengpengye kom. 11 Mwet mweun liki siti Arvad pa mwet topang su karingin pot in siti lom, ac mwet Gamad pa karingin tower lom uh. Elos sripisrya mwe loeyuk lalos ke pot lom uh, ac elos inge pa akkatoye kom uh.
12 “Kom som kukakin ma puspis lom in acn Tarsis, ac kom eis silver, iron, tin ac lead in sang aol ma kom kukakunla. 13 Kom oayapa orek kuka in acn Greece, Tubal, ac Meshech, ac kukakunla mwe kasrup lom in moli mwet kohs ac ma orekla ke osra bronze. 14 Kom kukakunla ma lom in moli horse in orekma, horse in mweun, ac mule liki acn Beth Togarmah. 15 Mwet Dedan elos oayapa tuku moul yurum, ac mwet in acn puspis su oan sisken meoa uh oayapa use ivory ac ebony in aolla mwe kasrup lom. 16 Mwet Syria elos molela pac mwe kuka lom ac ma puspis ma kom orala. Na elos sot nu sum wek emerald ac ruby, nuknuk sroninmutuk, nuknuk akul, nuknuk srik eoa, ac ma saok inkof uh, in sang moli ma oasr yurum. 17 Mwet Judah ac mwet Israel elos moli mwe kuka lom ke wheat, honey, oil in olive, ac mwe akyuye mongo. 18 Mwet Damascus elos oayapa moul yurum ke mwe kasrup su oasr yurum, ac elos moli ke wain lun Helbon ac unen sheep Sahar me. 19 Vedan ac Javan liki acn Uzal eltal kukakin osra iron ac mwe akyu mongo, sang aol mwe kasrup su oan yurum. 20 Mwet Dedan elos kukakin mwe loeyuk mwe muta fin horse in moli mwe kuka lom. 21 Mwet Arabia ac mwet leum lun facl Kedar elos moli mwe kuka lom ke sheep fusr, sheep mukul, ac nani. 22 Mwet kuka lun acn Sheba ac Raamah elos use mwe keng na wowo, wek saok, ac gold, in sang moli mwe kuka lom. 23 Siti lun Haran, Canneh ac Eden, oayapa mwet kuka lun Sheba ac siti lun Asshur ac Chilmad — elos kewa orek kuka ac moul yurum. 24 Elos kukakin nu sum nuknuk na oasku, nuknuk sroninmutuk ac nuknuk akul, ac mwe loeyuk na kato ma nu in lohm, ac sucl ac ah na wowo. 25 Mwe kuka lom inge wunyuk ke un oak na lulap.
“Kom oana soko oak meoa
Ma sessesla ke mwe kuka. 27:25–36; Fwack 18:11–19
26 Ke mwet in kal lom uh kuhlukinkomla nu meoa,
Sie eng kutulap me kunausla oak okom infulwen meoa.
27 Mwe kasrup ke mwe kuka lom nukewa,
Ac mwet selu lom nukewa,
Mwet kamtu fin oak uh wi mwet in kuka uh,
Ac mwet mweun nukewa —
Elos nukewa tuhlac in meoa uh
Ke pacl oak uh musalla.
28 Pusren mwet walomla uh
Lohngyuk finmes uh.
29 “Oak nukewa wanginla mwet fac,
Ac mwet nukewa utyak nu finmes ah.
30 Elos nukewa arulana asor ac tung keim,
Na elos sisak kutkut nu fin sifalos ac oan ipippip in apat uh.
31 Ke sripom elos mangsrasrala,
Ac nokomang nuknuk yohk eoa.
Insialos arulana oela ke elos tung mwemelil.
32 Elos yuk on in mas misa soko inge keim:
‘Su ac ku in lumweyuk nu ke acn Tyre —
Tyre, su oan misla ye kof uh?
33 Meet, ke mwe kuka lom uh sasla meoa uh,
Kom akfalye enenu lun mutunfacl nukewa.
Tokosra uh kasrupi
Ke mwe kuka puspis lom.
34 Inge kom musalla in meoa uh,
Ac kom tili nu yen loal inkof uh.
Mwe kasrup lom ac mwet orekma lom nukewa
Wi kom na wanginla inkof uh.’
35 “Mwet nukewa su muta weacn uh elos oela ke mwe ongoiya ma sikyak nu sum. Finne tokosra lalos, elos sangengla pac, ac mutalos akkalemye sangeng lalos. 36 Kom wanginla, wanginla ma pahtpat. Ac mwet kuka faclu nufon elos sangeng ma lulap, mweyen elos sensen mu elos ac sun ongoiya se ma sikyak nu sum uh.”