32
1 “Faclu ac yen engyeng uh, lohng kas luk,
Lohng akwoya ma nga ac fahk inge.
2 Mwe luti luk fah putat oana tulin af,
Ac sikyak fin faclu oana aunfong.
Kas luk fah putat oana af sringsring nu fin sacn ma tufahna srunak,
Oana af loang nu fin mah srisrik uh.
3 Nga fah kaksakin Inen LEUM GOD,
Ac mwet lal fah fahkak fulatlana lal.
4 “LEUM GOD El nien molela kulana lowos,
El suwohs ac pwaye in ma nukewa El oru;
God lowos El oaru ac pwaye;
El suwoswos ac El oru ma suwohs.
5 A kowos tia pwaye nu sel; kowos tia fal in mwet lal,
Sie mutanfahl koluk ac kutasrik.
6 Kowos mwet lalfon ac selalkung,
Ya kowos ac moli kulang lun LEUM GOD ouinge?
El papa tomowos; El pa orekowosla,
El oru tuh kowos in sie mutunfacl.
7 “Nunku ke pacl meet ah, ke fwilin mwet somsomla;
Siyuk papa tomowos in srumun nu suwos lah mea sikyak meet,
Siyuk sin mwet matu in srumun ke pacl somla.
8 El su Fulatlana El oakiya acn nu sin kais sie mutunfacl;
El kitalik acn, ac srisrngiya masrol nu ke acn in muta lun mwet uh.
El sang lipufan in karingin kais sie mutunfacl. Orek 17:26
9 A El sulela fwilin tulik natul Jacob nu sel sifacna.
10 “El konalosyak ke elos raraun yen mwesis,
Sie acn wangin mwet muta we, a pusren ngirngir na lun eng uh.
El loangelosla ac karinganulosyang,
Mweyen elos arulana saok sel.
11 Oana ke sie eagle el luti ma fusr natul in sohksok ke el ac sinukla liki ang uh,
Na el ukwalos in molelosla ac srakalosyak fin posohksok lal,
Ouinge LEUM GOD El liyaung Israel tuh elan tia putatla.
12 LEUM GOD mukena kolma mwet lal,
Ac wangin kasru sin god saya.
13 “El lela nu selos in leumi fulan eol uh,
Ac elos kang ma kapak inimae.
Elos konauk honey inmasrlon eot uh;
Sak olive sunalos kapak wo in acn eoteot uh.
14 Cow ac nani natulos arulana sroanom tetelos;
Un sheep ac nani ac cow natulos pa wo oemeet;
Wheat ac wain lalos arulana yu.
15 “Mwet lun LEUM GOD elos kasrupi, tusruktu elos orek likkeke lain God;
Elos fatelik ke kainmongo lalos.
Elos forla liki God su oralosla
Ac pilesru Mwet Lango ku lalos.
16 Alu lalos nu ke ma sruloala oru LEUM GOD El lemta;
Orekma koluk lalos akkasrkusrakyal.
17 Elos orek kisa nu sin kutu god ma tia pwaye,
God sasu ma papa matu tumalos tiana etu kac,
Kutu god ma mwet Israel soenna wi alu nu kac. 1 Cor 10:20
18 Elos mulkunla God lalos su langoelos ke ku lulap lal,
El su sang moul nu selos.
19 “Ke LEUM GOD El liye ma inge, El arulana kasrkusrak,
Ac sisla wen ac acn nukewa natul.
20 El fahk, ‘Nga ac fah tia sifil kasrelos,
Na nga fah liye lah mea ac sikyak nu selos,
Elos mwet likkeke ac soaru.
21 Elos akkasrkusrakyeyu ke ma sruloala lalos,
Ac oru nga in lemta ke sripen god lusrongten lalos,
Kutu god su tia god pwaye.
Ke ma inge nga fah oru sie mutunfacl lusrongten in akkasrkusrakyalos.
Nga fah oru tuh elos in lemtai sie mutunfacl lalfon. 1 Cor 10:22; Rom 10:19
22 Kasrkusrak luk ac fah ngutyak oana sie e
Ac esukak faclu wi ma nukewa ma kapak fac.
Ac fah sun acn loallana ke facl lun misa,
Ac esukla kapin eol uh.
23 “Nga fah sang nu faclos mwe ongoiya wangin saflaiya,
Ac orekmakin mwe pisr nukewa nutik lainulos.
24 Elos ac fah misa ke masrinsral ac ke musen fol ke mano;
Elos ac misa ke mas na keok.
Nga ac fah supwama kosro lemnak in anwuk nu selos,
Ac wet pwasin in ngalselosi.
25 Mweun ac fah oru mwet uh misa inkanek uh;
Mwet muta in lohm uh ac tuninfongla.
Mukul fusr ac mutan fusr fah misa;
Wangin tulik fusr ku mwet matu ac fah moul.
26 Nga nunku in sukelosla nukewa,
In wangin mwet sifil esamulos.
27 Tusruktu nga tia lungse mwet lokoalok lalos in konkin
Mu elos kutangla mwet luk,
Ke nga sifacna pa kunauselosla.’
28 “Israel el sie mutunfacl wangin nanka;
Wangin na pwaye etu lalos.
29 Elos tiana akilenak lah efu ku kutangyukla elos.
Elos tia kalem kac lah efu ma inge sikyak.
30 Efu ku tausin se in kutangyukla sin mwet sefanna,
Ac singoul tausin sin mwet luo na?
Mweyen LEUM GOD lalos El som lukelos;
God kulana lalos El siselosla.
31 Mwet lokoalok lalos etu na lah god lalos sifacna arulana munas,
Tiana ku oana God lun Israel.
32 Mwet lokoalok lalos kolukla, oana Sodom ac Gomorrah.
Elos oana fain in grape ma fokkakin grape mwen ac pwasin,
33 Ac wain nimalos oana pwasin ma tuku ke oalin wet uh.
34 “LEUM GOD El esam ma mwet lokoalok lalos tuh oru;
Ac El tupan sie pacl fal in kaelos kac.
35 LEUM GOD El ac fah oru foloksak lal ac kaelos;
Oasr pacl se ac tuku ke elos ac ikori,
Len in ongoiya lalos apkuranme. Rom 12:19; Heb 10:30
Ke pacl se El liye lah ku lalos wanginla.
El ac pakomutalos su kulansupwal
Ke El ac liye lupan munasla lalos.
37 Na LEUM GOD El ac fah siyuk sin mwet lal,
‘Pia god kulana lowos ma kowos lulalfongi uh?
38 Kowos kitalos ke mwe mongo yuyu ke mwe kisa lowos
Ac sang wain ma kisakinyuk elos in nim.
Inge, lela god ingan in tuku kasrekowos,
Ac molikowosla.
39 “ ‘Liye, nga mukefanna pa God;
Wangin pac sie god sayuk.
Nga uniya ac nga sang moul, nga kanteya ac nga akkeyala,
Ac wangin sie ku in lain ma nga oru.
40 In oana ke nga pa God moul,
Nga sralak pouk ac wulela ku
41 Lah nga fah tamla cutlass saromrom nutik
Ac liyaung tuh nununku suwohs in orek.
Nga fah foloksak nu sin mwet lokoalok luk
Ac kaelos su srungayu.
42 Sukan pisr nutik fah tultul ke srah kaclos,
Ac cutlass nutik fah onelosi nukewa su lainyu.
Nga fah tia likiya moul lun kutena mwet su lainyu;
Finne mwet pakpuki ke cutlass, wi mwet sruoh ke mweun, elos nukewa fah misa.’
43 “Kowos mutanfahl uh, kowos in kaksakin mwet lun LEUM GOD—
El kalyaelos nukewa su onelosla.
El foloksak nu fin mwet lokoalok lal,
Ac El nunak munas ke ma koluk lun mwet lal.” Rom 15:10; Fwack 19:2
44 Moses ac Joshua, wen natul Nun, eltal fahkak kas ke on soko inge tuh mwet Israel nukewa in ku in lohng.
Kas Safla Lal Moses Nu Sin Mwet Uh
45 Ke Moses el aksafyela luti lal ke kas lun God nu sin mwet uh 46 el fahk, “Aklohya in akos sap inge nukewa ma nga sot nu suwos misenge. Kalweni nu sin tulik nutuwos tuh elos in ku in oaru ac akos mwe luti nukewa lun God. 47 Mwe luti inge tia kas lusrongten — a moul na lowos. Akos ma inge ac kowos fah moul paht fin facl se lefahl ingo Infacl Jordan ma kowos apkuran in oakwuki we.”
48 In len sacna LEUM GOD El fahk nu sel Moses, 32:48–52; Oek 27:12–14; Dut 3:23–27 49 “Fahla nu Fineol Abarim in acn Moab tulanang siti Jericho. Fanyak Fineol Nebo ac ngetla liye facl Canaan ma nga akola in sang nu sin mwet Israel. 50 Kom ac fah misa fineol soko an oana ke Aaron, tamulel lom, el misa Fineol Hor, 51 mweyen komtal kewa tuh fahsr sayen ma nga sapkin nu sumtal ye mutun mwet Israel. — Pacl se komtal tuh muta ke kof in acn Meribah, apkuran nu ke siti Kadesh in acn mwesis Zin, komtal tuh tia akfulatyeyu ye mutun mwet uh. 52 Kom ac ngetla liye facl sac ke oan loessula, tusruktu kom ac tia ilyak nu in facl sac su nga ac sang nu sin mwet Israel.”