1 “Kowos mwet lun LEUM GOD lowos. Ouinge ke pacl kowos asor ke mwet misa se, nimet sipik monuwos sifacna ku resaela motonsruwos, oana kutu mwet uh oru. Lev 19:28; 21:5 2 Kowos ma lun LEUM GOD lowos. Inmasrlon mwet nukewa su muta fin faclu, El sulela tuh kowos in mwet lal sifacna. Exo 1:5–6; Dut 4:20; 7:6; 26:18; Tit 2:14; 1 Pet 2:9

3 “Nimet kang kutena ma su LEUM GOD El akkalemye mu tia nasnas. 4 Kowos ku in kang kosro inge: cow, sheep, nani, 5 deer, sheep inima, nani inima, ku antelope — 6 kutena kosro ma sengelik falkal ac el sifil kontini ma el kangla. 7 Tusruktu kosro nukewa ma tia sengelik falka ac tia pac sifil kontini ma el kangla, kowos fah pangon tia nasnas nu suwos. Kowos fah tia kang camel, rabbit, ku badger, mweyen elos ne sifil kontini ma elos kangla, a tia sengelik falkalos. 8 Nimet kang pig, mweyen tia nasnas. Pig uh sengelik falka, tusruktu elos tia sifil kontini ma elos kangla. Kowos in tia kang kutena sin kosro inge, ac tia pac pusral mano misa lalos.

9 “Kowos ku in kang kutena kain in ik ma oasr enga ac unac kac, 10 tusruktu kutena ma moul in kof uh ma wangin enga ac unac kac, kowos fah tia kang. Ma inge tia nasnas nu suwos.

11 “Won nasnas nukewa kowos ku in kang. 12 Tusruktu won kowos ac tia kang pa inge: eagle, vulture, osprey, 13 buzzard, kutena kain in kait, 14 kutena kain in raven, 15 ostrich, hawk in fong, seagull, kutena kain in sik; 16 owl srisrik, owl lulap, ac owl oasr koac kac, 17 oayapa owl yen mwesis, crow, cormorant, 18 stork, kutena kain in heron, hoopoe, ac fak.

19 “Won srisrik nukewa ma oasr po sohksok la tia nasnas nu suwos ac kowos in tia kang. 20 Kowos ku in kang won srisrik nasnas nukewa saya.

21 “Nimet kang kutena kosro ma muta nwe sifacna misa. Kowos ku in sang mwetsac su muta inmasrlowos in kang, ku kowos ku in kukakin nu sin kutu mwetsac saya. A funu kowos, kowos sie mutunfacl mutal nu sin LEUM GOD lowos. Exo 23:19; 34:26

“Kowos in tia akmolye sheep fusr ku nani fusr ke sronin titi lun nina kial uh.

22 “Srela sie tafu singoul ke ma nukewa kowos kosrani ke kais sie yac. 1:22–29; Lev 27:30; Oek 18:21 23 Kowos in som nu ke acn se ma LEUM GOD lowos El sulela kowos in alu nu sel we. Kowos fah kang sie tafu singoul in wheat, wain, oil in olive, ac wounsien cow ac sheep nutuwos ye mutal we. Oru ouinge tuh kowos in luti in etu in akfulatye LEUM GOD lowos pacl nukewa. 24 Acn in alu sac fin loessula nu lohm suwos pwanang upa kowos in us sie tafu singoul ke ma LEUM GOD El akinsewowoye kowos kac, na pa inge ma kowos fah oru: 25 Kukakunla ma kowos kosrani, ac us mani kac nu ke acn in alu sac. 26 Orekmakunla nu ke kutena ma kowos lungse — ikwen cow, sheep fusr, wain, ku mwe nim ku. Na kowos ac sou lowos fah tukeni engan ac kang ma inge we, ye mutun LEUM GOD lowos.

27 “Kowos in tia pilesru mwet Levi su wi kowos muta in acn suwos, mweyen wangin acn selos sifacna. 28 Ke saflaiyen yac aktolu nukewa, use sie tafu singoul ke ma nukewa ma kowos kosrani, ac orani tuh in karinginyuk in siti suwos uh. 29 Mwe mongo inge ma nu sin mwet Levi ke sripen wangin acn selos, ac nu sin mwetsac, tulik mukaimtal, ac katinmas su muta in siti suwos uh. Elos in tuku ac eis ma nukewa elos enenu. Oru ma inge, ac LEUM GOD lowos fah akinsewowoye kowos ke ma nukewa kowos oru.