Leta Akluo Lal
JOHN
Tukakinyen Leta Akluo Lal JOHN
Leta Akluo Lal John tuh simla sin “Mwet Elder” nu sin “Mutan Saok se ac tulik natul” — sahp kalmeyen “Mutan Saok” pa sie church in sie acn, ac kalmeyen “tulik natul” pa mwet in church sac. Leta fototo se inge ma in kwafelos in lungse sie sin sie, ac oayapa in sensenkakinulos liki mwet luti sutuu ac mwe luti lalos.
Takla Lun Koanon Leta Se Inge
Kas in tukakunla 1–3
Yohk sripen lungse 4–6
Kas in sensenkakin mwe luti sutuu 7–11
Kas in aksafye 12–13
1
1 Ma sel Mwet Elder —
Nu sin sie Mutan Saok ac tulik natul, su nga lungse na pwaye. Ac tia nga mukena, a elos nukewa su etu ma pwaye, elos lungse pac kowos, 2 mweyen ma pwaye uh oan in kut, na ac fah oan yorosr ma pahtpat.
3 Lungkulang, pakoten, ac misla, sin God Papa ac sin Jesus Christ, Wen nutin God, in oan in kut su etu ma pwaye ac su lungse sie sin sie.
Ma Pwaye Ac Lungse
4 Nga arulana engan ke nga konauk lah kutu sin tulik nutum uh mutana in ma pwaye, oana ke Papa El sapkin nu sesr uh. 5 Ke ma inge nga kwafe sum, Mutan Saok, lela kut nukewa in lungse sie sin sie. Tia ma sap sasu se pa nga simis inge — nuna ma sap se ma tuh oan yorosr oe ke mutawauk ah me. 6 Kalmen lungse se nga fahk inge pa kut in moul in akos ma sap lun God. Ac pa inge ma sap lal, oana ma kowos lohng ke mutawauk me, tuh kowos nukewa in moulkin moul in lungse.
7 Mwet kutasrik puspis fahsrelik tari nu fin faclu in kiapu mwet uh. Mwet inge pa elos su tia lulalfongi lah Jesus Christ el tuku in luman mwet. Kain in mwet ouinge mwet kikiap, ac Mwet Lain Christ. 8 Kowos in taran tuh ma nukewa kut tukeni kwafe kut nu kac in tia wangin sripa, a kowos in eis nufon ma God El akoo nu suwos.
9 Kutena mwet su tia sruokyana mwe luti lun Christ a el som alukela, God El wangin yorol. Ac elos nukewa su mutana in mwe luti lal uh, Papa ac Wen tukeni na oasr yorol. 10 Ke ma inge kutena mwet fin tuku nu yuruwos ac tia luti ke mwe luti se inge, nimet eisal nu in lohm suwos uh, ac tia pac paingul. 11 Tuh kutena mwet su paing mwet ouinge, elos mwet ipeis ke orekma koluk lal.
Kas Safla
12 Pus pac ma nga ke fahk nu suwos, tuh nga tia lungse simis ke ink ac pwepu. Nga finsrak nga in osun nu suwos ac sifacna sramsram nu suwos, tuh kut nukewa fah arulana engan.
13 Tulik nutin Mutan Saok pac wiom elos supu lung lalos nu sum.