1 Timyre heka tyyriti ritididỹỹnamy raruõhyymahãrenyre jiarỹboho awirenyremy. Tahe waribireny tule aribireny kia Ritidỹỹna arihurenyõtyhy. 2 Kaiboho heka Kristu tyyriti wese aõma toite. Riritinymy heka roimyhỹre inywo‑ki, inyrayky‑ki. Idi riramy kaiboho burubenykeki, aõbo kaiboho tewinymahãte heka tamy betehebenyke. Tai tahe rierymy idi rariake ixideele. Idi rariake hãre tahe idi rexibedeerynyke. 3 Kaiboho heka Kristu tyyriti wese heka toite. Inydeereny iwahidỹỹmy heka tii rare. Kia tyyriti witxiramy rare. Aõ ritidỹỹna manamy aõkõ riwinyreri. Deuxu Tyytybytyhy‑di tahe riwinyreri. Aõ manatyre‑ki aõkõ ròritidỹỹreri inyraykyreny‑ki, inyworeny‑ki ròritidỹỹmyhỹre. 4 Deuxu heka retyhynymahãre, Kristu òraru‑ki wahe. Tai tahe tuu raryberenymahãre kiawesemy. 5 Jiarỹboho heka warururenyõhyyre kaa aõmysỹdỹỹna widỹỹna‑ò. Iny ruruna heka Deuxu‑ribi sohojile nade. Tii iny wiòhedỹỹdu, aõ iny rikiwinymyhỹrenyke‑ò wahe. 6-8 Irybe tỹmyra dohodỹỹdumy heka inyboho roire. Ihetxiu bede ywina wesemy aõko heka ròritidỹỹre Deuxu Tyytybytyhy ihỹre. Ihetxiu bede ywina heka rubu diwyde. Deuxu Tyytybytyhy iruna riwahinyre. Ihetxiu heka manatyre‑ki ròritidỹỹre. Deuxu loosòna tule ròhònyre, riwahinyreu wahe. Moisesi òsỹny‑ribi sõwemy loosòna ròhònyre. Idi tahe riixãwididỹỹnyre. Tahe judeu mahãdu reteheõhyymyhỹre iòsỹny‑ò, iòsỹny loosònadireki. Deuxu Tyytybytyhy heka iratyre awimy rare, iny‑ò dori Deuxu irutyhy riwahinyre. Tahe bede ywina nade loosòna wiwihikỹ‑di bede ywina tỹmyra tahe iratyre awi rare. 9 Tii heka iny‑di ixãwikemy ratxireri. 10 Tahe iratyre rybe tỹmyra rare. Iny òraruna‑di ixãwikemy ratxireri. 11 Kia urihimyò rỹire awi rare. Iratyre tahe umytuedeõna rare.

12 Iny raròsòna sõwemy ratximyhỹrenyre. Tai tahe inyboho ruberuõhyymyhỹrenyre. 13 Moisesi wesemy aõkõ rakatximyhỹrenyke. Imahãdu raykytxymy dori rỹirenyre. 14-15 Imahãdutxymy dori rỹirenyre. Moisesi bedeywina‑di rariakeki, irayky ritòbònyke. Kia rieryõrenyre iraykyreny ratxynymyhỹrenyremy. 16 Kristu rityhynyre xiery, irayky raraymyhỹre. Iwese Moisesi òsỹnytòbòna iòsỹny‑ribi resere wese kia rare. 17 Kia Tyyriti‑ki Inynyrỹreny heka Deuxu Tyytybytyhy rare. Tikibo Deuxu Tyytybytyhy rỹikeki kowa ibutumy iny ixinamy rỹike. 18 Tahe ibutumy inyboho heka Deuxu wowydyna iny òsỹnỹreny‑ki ijõdire. Iwese iny òsỹnyreny itxena‑ki iny retehemyhỹ wese, Deuxu wowydyna ibutumy robimyhỹke iny òsỹnyreny‑ki. Inynyrỹ he Deuxu Tyytybytyhy rare. Iribi tahe wowydyna nade. Kia wese inyboho heka Inynyrỹ wesemy relemyhỹrenyre. Inihikỹmy delemyhỹdenyde. Tii dori iny woreny‑ki raaõòtaòtamyhỹre.