1 Anumaya Kotia Masetonia maineya Yisasina amakua aminaya veamogamina kayone yamaa amamigeya kanale yama haya yafe tamahapaigahe hue. 2 Ani veapina tusia kana yamo falote hianagi Anumayamofena muse nehuya amakaipina osi kanoa afeno yaamia hanegeya afa veane maiyanagi tusiya huya alu veamogamima amaya hisaya yafena monea alitalu huya kanale kavakeya humatenae. 3-4 Tamahanepauve osi kanoa afeno yaamia hanegeya “Nagoa tagaitia malesune.” huya amakesa ohaviya havigu mainaya veamogamina monea amaminae. “Ani kava hiho.” huta hamaopaunanagi “Tatalageta Yutia maineya Yisasina amakua aminaya veamogamina amaya hamano.” huya huteya ani kavala humainae. 5 Hayanagita “Monea osia amamigahae.” huta hunanagi ala mone hageya amaminae. Ani yamaagelomagi Anumaya Kotifena hamaiya avamete huya hagoteya amakaiami amakua Anumayamona amitafa huteya ania huya amakua tagaila taminae. 6 Naa hayafe Taitasifena mage huta hapai-mainone “Hagoteka Kolini veanene umaineka ‘Nagoa veamogami amaya hisia monea alitalu hiho.’ huka hamapai-mainanagi menia anima kayone hisaya aliyana molivayayo.” huta hapai-mainone. 7 Tamakaya mukia yama haya yamoa aluya huno kanale ya higetama Anumayamofena havitama lamakupi maletama lamametitima haya yamo tokiyaagela hutama Yisasi kema hayana fatago kegeya nehae. Kanale tamaku tamakesaene veane mainayafe tagaifena tamahau tamayamopafi nelama-hainagetama menia kayone hutama veamogamina amaya hisaya monema neamamiya aliyana aluya hutama aliho.

8 “Monea amamiho.” huna kahegi kea nohugi nagoa veamoya kanaleya huya monea malagena agetena fako hulamatogi hanaa hugahae? Nagoa veafe tamahau tamayamopafi nelahamaiya yana kanaleya huno haneo? huna nelamakoe. 9 Tamakaya Anumayati Yisasi Kalaisia kayonema hulatenea yafena ago havilinae. Tusia kanale yapi maineanagino tagaifene huno tagayama kanale noma maisunafene huno agaia kanale maiyamaa ataleteno ma mopafi eaamo tusia havi noma mainea yateti tamakaya mukia kanale yana ali-mainae.

10 Ali-mainagi ani kanale kavala hiho huna nagesa havua kea tamahapaigahugi haviho. Tamakaya ago hano humainea kafufina hagotetama “Ani monea alitalu hisune.” hutetama aepa hetama alitalu hu-mainagi menia ani aliyakeya alitama alivayayeho. 11 “Monea amamigahune.” hutama hayanagi menia ania hutama amamisaya tamakesama havinutamahena malenesaya yapitila ali hano hutama alitalu hutetama amamiho. 12 Nagi amakuamoa kanale higeya malenaya monefiti amaminaya yafena Anumayamoa muse humateanagi nagoa veamoya nago yaamima omalesayana Anumayamoa “Amamiho” huno ohugahie.

13-14 “Amakaya kanale no maisaya yafe ala monea amamitetama monetamia omaleafe tamakaya havi no maigahae.” huna nohugi menia monea tamakaipi haneafenagiya omalegeyama afaa mainaya veamogamina amaya nehutama haenagaa tamakaya omalesigetama afaa maisageyahena tamaya hugahae. Ani kavama hisayana mukiamogatama nago avamete hutama maigahae. 15 Nayona Anumaya Kotia Isaleli veamogamina ikapinagati kave amaminea kanafina Anumaya Koti avopina mage huno hu-maineane

16 Tamaya hisua nagesa havua nagesa Anumaya Kotia Taitasina ago aminea yafena Anumayamofena muse nehue. 17 Muse nehugi “Kolini kumate vuo.” huta hutonana “E, muse nehue ani kumate visua nagesa nehavue.” huno agaia humaine. 18 Humainegi nago kanoa kanaleya huno Yisasi kanale mono kea huhaleno higeya mukia veamoya muse humainaya kanoa hutesugeana Taitasiene ugae. 19 Ani yamaagelomagi alu kumate kumate Yisasina amakua aminaya veapina tagaiene vaiyeno taminaya monea alita momisunafe ani kanomona aliya hetitenae. Hetitageta veafeke tahau higeta Anumayamo agima alisaga hisuna yafe “Monea alita momamisune.” huta nehune.

20 Ani tusia monema alitalu haya monehena havigu veamoya tagaifena “Havi kava hae.” huya hisaya yafenagita lagaya kava yagaita ani tafutaganaene nagopi vaiyegahune. 21 Kava yagaita Anumayamo auleene veamogami amauleene kanaleya huta aliyana alisuna yafe nelahaiye.

22 Nelahaigeta nago tafu-taganaa mukia kanafina alu aliya alu aliyana nealianagita fako huta agonana tokiyaage huno veamogamina amaya nehianagino menia aluya huno lamakaifena “Kanale kava hugahae.” huno hia yafe Taitasiganiene hunategahune. 23 Tamakaima tamaya hisia yafe Taitasia nagaiene tokaeno maineno aliyana nealigeya alu kumate kumate mono note veamoya humatageana agaiene vaa tafu-taganagania aliyama nealia yamoa Kalaisi agia alisaga nehae. 24 Naa nehaafe tamakaya tamahau tamayamopafima nelahamaiya yafena tamakia alisaga huta hamapai-mainona yana amave-lisaya yafe anima esaya vayala amaya nehisageya Yisasina amakua aminaya veamoyama agesayana “Poloa humainea kea tamage humaine.” huya hugahae.