1 Jon
Jon Minj Nind Tikak
Minim Nind Niŋep
Bi Jiysis minim dand amemb Jon, minj day nind tikak biy, biynimb Gor apiymiŋay kuyip chiŋgipay gok aŋgrep gen, minim yesek aŋgñimbay ak ma diniŋgiy aŋgiy tikak. Bi Gor minim yesek aŋgep kun gok, minim tuŋgandikiy, biynimb gok kuyip aŋgyiŋgipay, “Mindmaŋgiy key tikjakniŋgamb rek gon, Gor chinup tap bap ma giniŋgamb aŋgiy” monmon giyiŋg, Jiysis biyimb ay owak aŋgiy ma niŋiy, binuk gok kuyip miluk niŋyiŋgipay.
Kun gey Jon, Jiysis Krays biyimb ay owak ak aŋgñirep gen, niŋrep giy, nup gosimb niŋiy, Gor nup wasemb ay, penpen wasemb ayep ak niŋrep giniŋgiy aŋgiy, minj kun biy tikak.
Minim Ar Keykey Mindip Rek:
Minim nind aŋgak ak mindip, chapta 1:1-4.
Gor kind ak sek, kisyim kind ak sek minim ak mindip, chapta 1:5–2:29.
Gor Ñapan nuk gok sek, Seytan ñapan nuk gok sek minim ak mindip, chapta 3:1-24.
Gor Kawnan tep nuk ak kuyip gos ñek aspay akaŋ, Seytan kichekiy malñiluk tap gok gos ñek aspay akaŋ aŋgiy, niŋrep giy nep, minim kuyip ak dinimimb aŋgak minim ak mindip, chapta 4:1-6.
Wasemb ayep miñ ar ak mindip, chapta 4:7-21.
Biynimb Jiysis nup Gor Ñinuk yimb aŋgiy, nup gosimb niŋbay gok minim ak mindip, chapta 5:1-21.
1
Minim Maŋgiy Won Permindep Ak
1 Miñmon alwol gayak ñin ak, Minim Maŋgiy Won ak Nop yip mindek. Pen nuk kisen ñin biy nep apek, windin chin key niŋiy, minim aŋgek timund chinup ak sikek, ñin maŋgiy chin key ak nup diniŋnuk. 2 Bi gek per mindeniŋgambay kun ak, Nop yip mindiy, chinup per mindeyaŋ aŋgiy apek, miseŋ niŋiy mey, nimbip aspun. 3 Nup windin niŋiy, minim nup ak niŋiy diy mey, kiy apiymiŋay yip jimñiy mindpun. Pen nimbip minim kun ak aŋgon niŋiy dem mey, chin maŋgiysek Gor apiymiŋay yip jimñiy mindiy, kiñiŋ nokom mindoniŋgambun. 4 Kun gem mey, tep yimb giniŋgamb aŋgiy, minj biy tiksipun.
Melik Ar Ak Taŋgonjun
5 Krays chinup aŋgek niŋnuk minim ak, nimbip aŋgñiniŋg gispiyn. Gor melik yimb mindip; kisyim sek ma mindip. 6 Kun ak chin tap siy tap timey gi mindyiŋg, Gor yip jimñiy mindpun aŋgniŋgambun ak; minim nuk niŋind yimb ak kirgiy, kisyimnamb okok mindiy, yesek ar ak gi dand amyiŋg, kun aŋgniŋgambun. 7 Pen Gor yip mindiy, melik nup ar ak taŋgiy jimñiy mindon, Ñinuk chinup aŋgiy likañ yapek kumak rek, gach chinup wiykyokyiŋg nep mindeniŋgamb.
8 Pen tap siy tap timey gunap ma gipun aŋgniŋgambun ak; gos nep niŋiy, Gor minim ak ma diy kun aŋgniŋgambun. 9 Pen tap siy tap timey gipun gok, Gor nup aŋgyikoniŋgambun; nuk Bi suŋ-tep mindip rek, chinup niŋiy kirginiŋgayn aŋgak rek giniŋgamb.
10 Pen tap siy tap timey ma nep gipun aŋgniŋgambun ak, Gor minim nuk yesek aŋgip aŋgiy, minim nup ak ma diy mey, kun aŋgniŋgambun.