1 Eme sambâŋko mâsi qâreŋ kecšiŋuc fuawec: Ŋokac moc domawec, e šoaŋzi rufacnekicne, kike jujuwicnao mosa ŋewec, qizecnao bâpiŋ 12 izi hendiŋ ecnembiŋ. 2 Erâ e kiwechec, eme motec roocte gozi kime kio owa ewec. 3 E iŋuc ehuc domahame mâsi qâreŋ moc sambâŋkoa fuawec. Ine oâ sâko moc fowec, hawarine bâbâroŋ jâmbâŋ, qizecne 7 â šuŋene 10, â qizec-ticne sâc ŋicwofuŋ du jaha ŋerawec. 4 Eme gecnezi sambâŋko bâpiŋ gâcne qatarac-joparâ mâreŋko sâroc-jopame wahambiŋ. Oâ e iŋuc erâ, ŋokac motec rozo ehame šiŋuc manasuhuc ra maŋfuŋnao fowec: Motec rome ɋâckezepac. 5 Eme motec rowec, e mâreŋ sâc ŋicne ŋicne aeŋ gunuzi soŋaŋ-jopaocte mucnekicne. Erâ motec fuame ine Anuturao baferâ eri ŋeŋe-ticnere maŋfuŋko râekicne. 6 Á ŋokac e ine mâreŋ tuhuo wiserâ rawec, ira šoaŋ gie bapa 1 tauseŋ â 260 gume jauŋ ecneniŋte Anutuzi ŋeŋe hae moc bâfuacnewec.

7 Eme sambâŋko šika fuawec. Mikae â aŋelofâc-ticne jaŋe oâ qa jâpec ecneniŋte râsi roroc embiŋ, â ŋifec oâ â aŋelofâcne jaŋe iŋuc jaha râsi roroc embiŋ. 8 Erâ mi sanaŋkembiŋ. Dockepie sambâŋ sakare-jarembiŋ. 9 Ehuc oâ sâko, homa raŋɋa, demoŋ micne sâko Sataŋ hâcne, mâreŋ sâc ŋic maŋ bâsifuc ejareekac, e hâcne tuŋkepie mâreŋko wahawec. E jahacne tuŋkehuc aŋelofâcne mâmâc tuŋjopapie wahambiŋ. 10 Eme sambâŋko dâŋ wiwira šiŋuc fuame manapo: “Anutu-nâŋecte bâbâpiaŋ â tâpiri â guriŋ bapa gie â Kristo-ticnere Wofuŋ qâreŋ ši fua taniŋkekac. Âgofâc-nâŋec jaŋere râsi, Anuturao ŋafe furec qoric-jopaekac, e tuŋkeŋgopieŋ hâcne. 11 Jaŋe Lamare socko ŋesiŋnehuc miti hâwicmâc mutaniŋkembiŋte sanaŋkembiŋ, ehuc juju-jeŋic mi sakarehuc hâmocte qikiŋnembiŋ. 12 Irec sambâŋ maŋne maŋne â ira juŋgopieŋzi šeri enšepieŋ. Á mâreŋ â hâwec, jei, ŋohe weniŋuc enicmu¡ Ʒi Sataŋzi ŋoŋerao hufakac, erâ dameŋ-ticne biac taraocmu, i manahuc aaric sâkohec jukac hâcne.”

13 Eme oâ e mâreŋko behepie waharâ, ŋokac motec rowec e râsi ecnewec. 14 Eme ŋokac e tucwipe sâkore fakec jahecne râcnepie mâreŋ tuhuo ŋeŋe hae-ticnao wiserâ homare hâhâwic soŋkewec, ira gume jauŋ ecnehuc juhapie jara jahec â moc â moc nâfocne taraocmu. 15 Eme ŋokac wisehame homa e râpefuŋnao opâ maŋume micticnaonec waharâ rumi sâko ewec, i ŋokac jowaocte iŋuc ewec. 16 Eme mâreŋzi ŋokac ŋezickehuc micne aŋkeme oâzi opâ maŋuwec i ira hufârewec. 17 Eme oâ e ŋokacte mana gâpârerâ kikefuŋfâc-ticne jopaocte rawec. Anuture sâcmutâc dâŋ reŋkehuc Jesu mutaniŋkeeŋgopieŋ jaŋe hâcne jopaocte rawec. 18 Ehuc hâwec moŋgeŋko hurâ domawec.