1 Jesuzi dâŋ šiŋuc muwec: “No jâmbomac jâmbâŋ ŋazape mananiŋ, moc e lama jaŋere sapao feocte motâcko mi rašihuc mocko sac huckerâ huocmu, ere fiuc roro â soroŋ qaqa muzo. 2 Moc e motâcko raširâ feocmu, ere ine lama soŋaŋ-jeŋic muzo. 3 E fisime motâc soŋaŋzi honerâ motâc rocneocmu â lama jaŋe dâŋ hawari-ticne mananiŋmu. Eme lamafâc-ticne jaŋere šâŋe wirahuc sapaonec jowac-jopa wahaocmu. 4 E jahacne biŋefâc jowac-jopa-fâreme waharâ, dâŋ hawari-ticne manaeŋgopieŋte bâjâpeniŋmu. 5 Ŋic furune moc e ine mi bâjâpeniŋmu, e dâŋ hawari-ticne kâuc bahuc hâhâwic bacnerâ wiseniŋmu.” 6 Jesu e dâŋ suŋsuŋne iŋuc mume jaŋe weniŋucte iŋuc mukac muhuc kâuc bambiŋ.

7 Eme Jesu e harierâ jazawec, “Jâmbomac jâmbâŋ ŋazape mananiŋ, lama jaŋerao fefe irec motâc no. 8 No mi fuahape fuambiŋ jaŋe ine fiuc roro â soroŋ qaqa. Irec lama jaŋe dâŋjeŋic mi manambiŋ. 9 Motâc no hâcne. Moc e fotâcnurâ rašiocmu, e mi sipirickeocmu. E rašic wefuc ehuc nânâ mâriri bâfuaocmu. 10 Fiuc roro e lama qa sipiric erâ fiuc bawiseocte sawa fisiekac. No ine lama jaŋe juhâc qâhâmoniŋte nânâ bâfuape ɋaŋɋaŋ ɋâriaŋ fojareocte fisipo.

11 “No soŋaŋ biaŋne. Soŋaŋ biaŋnezi lama jaŋere erâ juju-ticne qikiŋneocmu. 12 Soŋaŋ jabane, lama ru jeŋic mi juekaczi ine kâte qâto fisime honerâ lama behec-joparâ wiseocmu. Ehame kâte qâtozi lama ki bâtâtiec ejareocmu. 13 E soŋaŋ jabanere lama jaŋere manabâc mi eocmu. 14 No ine soŋaŋ biaŋne juekopac, eme Mamac â no hohonec mamanac eekoperec, 15 irec sâcko no â gurufâc-nane hohonec mamanac eeŋgopeneŋ. Irec no lama jaŋere erâ juju-nane qikiŋnepemu. 16 No lamafâc-nane guru moc juŋgopieŋ, jaŋe sapa širecnec mâcne, eme no jaŋe wâc mâmâc amec-jopa warepe dâŋnane mananiŋmu. Eme lamazi guru mocjaha â soŋaŋzi wâc mocjaha iŋuc fuaocmu. 17 No juju-nane qikiŋnerâ mocwâc ropemu, irec Mamaczi nore ecneekac. 18 Juju-nane moczi mi nowac roocmu, i no nahacne maŋte qikiŋnepemu. No juju-nane qikiŋnepemurâ â ropemurâ irec tâpiri mâmâc fonarekac. Iŋuc epemurâ Mamac-nanezi munarewec.”

19 Jesu e dâŋ iŋuc mume Judaŋic jaŋe manarâ mocwâc mu qaqatarac embiŋ. 20 Ehuc bocjahazi šiŋuc mumbiŋ: “E demoŋzi ecneme maŋne sifuckekac, dâŋ mume wemocte manahuc juŋgopieŋ.” 21 Gâcnezi ine šiŋuc mumbiŋ: “Demoŋheczi dâŋ iŋucne mi muocmu, me demoŋ moczi ŋic tiŋtuŋ jaŋere šâŋe sâcne bâtâcneocmu me?”

22 Judaŋic taha ufuŋ jambuŋkembiŋ irec jara hombaŋ i mâmâteŋ dameŋko maickeme 23 Jesu e taha ufuŋ irec maŋne moc šâŋene Salomo ira rac warec ehuc juhame 24 Judaŋic jaŋe orâŋkerâ šiŋuc muhuc âzâcnembiŋ: “Go wemocte fuŋnege hesoŋketec maŋjahec boc eeŋgopeneŋ? Go Kristo jukomecko mutaniŋkerâ nâzâc me!” 25 Eme Jesuzi šiŋuc jazawec: “No ŋazape mi mana šakieeŋgopieŋ. Mamac-nanere micte gie baekopac izi mutaniŋnuekac. 26 Á ŋoŋe ine lamafâc-nane mi erâ juŋgopieŋte dâŋnane mi mana šakiee ŋgopieŋ. 27 Lamafâc-nane erâ juŋgopieŋ jaŋe dâŋnane manaengopieŋ. Eme noni mana tarac-jopahape bâjâpecnueŋgopieŋ. 28 Eme juju sanaŋ bâfua-jarepe sisipiric tâmiric jurašihuc juniŋmu. Jaŋe nore meonec moczi babatarac-jopane mi fokac. 29 Mamac-nanezi norao ŋec-jopawec e ŋic â wiac sasawa qâhuc-jopa-fârekac. Eme jaŋe moczi Mamac-nanere meonec sâcne mi batarac-jopaocmu. 30 No â Mamac nâhe mocjaha.”

31 Iŋuc mume Judaŋic jaŋe qânâ ameckerâ hezo embiŋ. 32 Iŋuc epie Jesuzi šiŋuc jazawec: “Gie biaŋne fuŋne fuŋne Mamacte ŋesiŋko bape honembieŋ, eme ŋoŋe wenimo irec qânâzi hecnuzo eŋgopieŋ?” 33 Eme Judaŋic jaŋe micnao rorâ šiŋuc âzâcnembiŋ: “Gie biaŋne baekic irec mâcne, go ŋic jaha juekiczi Anutu âkehockehuc gahacnere Anutu muekic, irec qânâzi hecguzo muŋgopeneŋ.” 34 Iŋuc mupie Jesuzi šiŋuc jazawec: “Sâcmutâc dâŋŋeŋicko šiŋuc mukicne: `Noni mupo, ŋoŋe nemu'. 35 Eme mitire dâŋqâreŋ i âke sipuhuc moc mumune mi fokac. Erâ Anuture dâŋ fua-jare jujec iŋucne mac jaŋe nemu mujarewec. 36 Ehame ši ine no Mamaczi mutiricnurâ sorecnume wahapozi `no Anuture ŊokâƷ iŋuc mupe ŋoŋe wemocte muŋgopieŋ, `Go Anutu âkehockekic'? 37 Gie baekopac i honepie Mamac-nanere sâc mi eekacko dâŋnane qikiŋnepie sâckeocmu. 38 Me honepie Mamac-nanere sâc eekacko ine dâŋnanere mâcne, gie bapa-nanere erâ šâŋitacnunšepieŋ, ehuc Mamaczi no maŋnuekac â noni Mamac maŋkeekopac irec fuŋne mana taranšepieŋ.” 39 Iŋuc mume kâpâcwâru bazo ehuc bârucnepie rawec.

40 Eme Jesu e Jordaŋ opâ ocniŋucnao Johanezi mârâc fuŋkerâ ŋic opâ rua-jare jujecko ra juwec. 41 Ira juhame ŋic bocjahazi erao fisirâ dâŋ šiŋuc mumbiŋ: “Johane e mâsi bapa i mi bawec, â ŋic kecširec dâŋ muwec ine fideteŋ efârekac.” 42 Eme mâreŋ ira bocjahazi Jesu manasiŋkembiŋ.