1 Eme Agripazi Paulo šiŋuc âzâcnewec: “Gahac fuŋnege mutec mananaŋ.” Eme Paulozi meticne sicnerâ dâŋ šiŋuc jazawec: 2 “Judaŋic dâŋzi dâŋ enarehuc jueŋgopieŋ irec ŋifecne ŋicwofuŋ Agripa miŋecgac gore maio mupemurâ bunane biaŋkekac. 3 Go hâcne Judaŋic mitire hehefaric-nâŋecte â wiac eenâŋecte fuŋne manaekic. Irec go mana uruehaŋtec dâŋnane mupe.

4 “No motec ɋie-naneoa Jerusalem haeo ŋic âgofâc-nane jaŋere ŋondeŋko juku sokapo. 5 Irec Judaŋic mârâc honecnumbiŋzi juju-nanere fuŋne manaeŋgopieŋ. No farisaio ŋic mitire neŋgocne embiŋ Jaŋere guruo hâcne jupo. Eme fuŋne-nane hone manac embiŋzi muzo murâ munšapiŋ. 6 No kâpâcwâru ficko foekopac i wiac mocte mâcne, Anutuzi mimiŋnefâc-nâŋec biŋedâŋ jazawec, 7 eme dâŋ i fârinehec eocte Israe ŋicguru 12 jaŋe ŋafe šoaŋ qâqâtiri Anutu tiwâ bâzi rikecnehuc mai ecneeŋgopieŋ, ŋicwofuŋ-nane, biŋedâŋ irec hâcne Judaŋic jaŋe dâŋgie nareeŋgopieŋ. 8 Anutu e hâmokicne bâɋârec-jopaekac, i ŋoŋe wemocte manapie mi eene tinac eekac? 9 Erâ no nahacnere mupe, no Jesu Nazarete haeonec ere šâŋe biŋe imackepe sifuckeocte gie-nane ewec. 10 Jerusalem haeo iŋuc hâcne epo, ehuc taha bapa micne jaŋerao mupe pasi narepie opâ ruac wemo afecne kâpâcwâru ficne ficne râec-jopahuc jupo. Erâ šika kirâ hâmoniŋte mujarepie dâŋjeŋic dopecke jupac wâc. 11 Judaŋic jaŋere mitificne ficne opâ ruac jopahuc jaŋe Jesure šâŋe musoriŋkeniŋte wiac qacne gâpâcne ejare jupac. Erâ no momori wânšâŋ erâ hae šoricko ra jopa jâpec ejare jupac wâc.

12 “Ekupe taha bapa micne jaŋe papia narehuc munarepie Damasko haeo rapemurâ rapo. 13 Rakuhape qâqâtâc bembeŋkeha sambâŋkonec šoc tatamac bâricnehuc waha no â ŋicfâc-nane âke tamaec-nâpowec. Opoŋ, ŋicwofuŋ-nane, šoaŋ tatamacne i weweaŋne, â honepo tatamac izi hâhâwicne jâmbâŋ. 14 Eme nâŋe mâreŋko rândiŋke qarâ fohuc dâŋ wiwira moc Judadâŋko šiŋuc manambeŋ: `Saulo, Saulo, go wemocte nu jâpec enarehuc juekic? Go šârâ hewâcnetec âkecgume šâic manacmu. Ž 15 Eme no šiŋuc mupo: `Wofuŋ go mo? Ž Mupe šiŋuc nazawec: `Nu jâpec enarehuc jukomec Jesu no hâcne. 16 Go fahare domac, no ši kiŋaŋ qaqa-nane bacgupemurâ fua-garekopac, irec go ši wiac honekomec â juku gowatupe honecmu irec biŋe mumu-nane erâ juzemec. 17 No ŋicguru ši â ŋic qâpuc jaŋere meonec bataracguhuc jupemu. 18 Erâ jaŋerao sorecgupe šâŋe-jeŋic bâtâcnetec dapâc honerâ râpeckerâ tatamac maickenšepieŋ, erâ wâc Sataŋte gie beherâ Anuture enšepieŋ. Eme sâqocne-jeŋic tâmirehame no manasiŋnuhuc ɋaɋackembiŋ jaŋere guruo raširâ sambâŋ kâdoc-jeŋic rauckenšepieŋ.'

19 “Ŋicwofuŋ-nane Agripa, no sambâŋkonec dâŋ mana rereŋ ehuc 20 ine qanaŋ Damasko haeonec ŋic â Jerusalem haeonec ŋic erâ wâc Juda mâreŋ rune sasawa â ŋic qâpuc mâmâc maŋjeŋic bârisierâ Anuturao qohotahuc maŋ bâbârisiere fârine bâfuaniŋte irec miti jazahuc jupo. 21 Eme iŋuc epore Judaŋic jaŋe taha ufuŋko rocnurâ qâhâmocnuzo embiŋ. 22 Eme Anutu e ŋezicnu warehame miti mupozi muekopac, ehuc ŋic fekicne â wahakicne mâmâc jazaekopac. Erâ dâŋ furune mâcne, porofete â Mose findaŋdâŋ muhuc qâreŋkembiŋ ijaha muekopac. 23 Kristo e šâic manaku hâmoocte mucnekicne erâ hâmokicne jaŋeraonec micne barâ faharerâ Judaŋic â ŋic qâpuc šâziriŋ dâŋ bâfua-jareocte mucnekicne, dâŋ i hâcne dopeckeekopac.”

24 Paulo e fuŋne-ticne mutiŋnehuc dâŋ iŋuc jazame Festozi dâŋ hahaŋne bahuc muwec, “Paulo go maŋge sifuckekac i¡ Papia bocjaha wose qâreŋ ekutec maŋge sifuckewec hâcne.” 25 Mume Paulozi dâŋ šiŋuc bâtikiecnewec: “Ŋicbomboŋ-nane Festo, no maŋsifuc dâŋ mâcne, no dâŋ tiŋne â fârine mukopac. 26 Dâŋ mukopac irec fuŋne ŋicwofuŋzi sâcne manakac, erao hâcne afeckehuc mukopac. Wiac mukopac i soŋsoŋko mi fuawec, irec ŋicwofuŋzi wemocko kâuc baocmu. 27 Ŋicwofuŋ Agripa, go porofete jaŋere dâŋ mana šakieekic me? No manakopac, go mana šakieekic.” 28 Mume Agripazi Paulo šiŋuc âzâcnewec: “Enarekutec mi šoraha Kristoŋic ezipohec ine.” 29 Eme Paulozi muwec, “Go â ŋic gâcne miŋecgac dâŋ ši mupe manaŋgopieŋ, ŋoŋe Wofuŋzi bafic-ŋopame mi šoraha no iŋucne ejâmbâŋkeniŋte mukopac, kâpâcwâru ŋic jukopac irec mâcne, mitire mukopac.”

30 Iŋuc mume ŋicwofuŋ â kia â Beanike â ŋic gâcne faharerâ râwiŋnembiŋ. 31 Râwiŋnehuc nazaŋ gazaŋ erâ šiŋuc mumbiŋ: “Ŋic e šika me kâpâcwâru mi hotâckewec.” 32 Á Agripazi Festo šiŋuc âzâcnewec: “Ŋic e Roma ŋicwofuŋzi dâŋticne mutaraocte mi mume muzac, go sâcne firuetec ra juzac.”