JAKOBO
Jakobore papia mo mitiŋiczi qâreŋkewec i mi mana sanaŋkeŋgopeneŋ. Ŋic gâcne jaŋe, Jesure ɋa Jakobo eki mecne qâreŋkewec, iŋuc muhapie gâcne jaŋe šiŋuc mueŋgopieŋ: Aricne, Judaŋic opâ ruac moc šâhec juwec eki Jakobore šâŋeo âkehotahuc qâreŋkewec. Qâreŋŋic e me e qâreŋkeweczi fuŋne-ticne mi mutaniŋkewecte mi mana-hâmoŋgopeneŋ hâcne. Irec Jesure ɋazi qâreŋkewec iŋuc mi musanaŋkehuc mecnehec sawa mupene fooc.
Papia maŋnao miti mamana betaŋkekicne jaŋere uŋsawaŋ dâŋ bocjaha qâreŋkekicne fokac. Erâ papia i kikefuŋ mocjahere biŋe mâcne, Judaŋic opâ ruac Siria mâreŋko jurambiŋ jaŋere biŋe qâreŋkekicne. Jerusalem haeo mitire šika fuame ŋic ŋokac bocjahazi wiserâ hae mâreŋ gâcnao rambiŋ. Ehame gâcnezi Siria mâreŋko fisirâ ira hâcne jurambiŋ. Ehuc Judaŋic fekicne ijaha jumbiŋ jaŋere kiŋaŋ qaqa embiŋ. Jaŋe šâic busâqocko jumbiŋ. Bomboŋfâc-jeŋic jaŋe qaisoc-joparâ râsi ejarembiŋ. Eme irec qâreŋŋiczi maŋuruc qajarewec (gaŋ 1:1-8 â 5:7-11). Erâ bocjahazi miti sahaczi sawa bajumbiŋte šiŋuc qâreŋke-jarewec: Mamanasiŋ fâri tâmiric i wiac jawane (gaŋ 2:8-26). Ŋic fekicne moc moczi tutumaŋ-jeŋicko fisipie boc dape-jarembiŋ, irec mana sâqorerâ qâreŋkewec wâc (gaŋ 2:1-7). Erâ fekicne jaŋere fuŋne rituwec (gaŋ 1:9-12 â 5:1-6). Nameŋzi bâbâsâqorec embiŋ, irec uŋdâŋ mâmâc râe-jarewec (gaŋ 3:1-12 â gaŋ 4:1-12).
1
Eesâicte fârine
1 Jakobo no Anutu â Jesu Kristo ere kiŋaŋ qaqazi Israe ŋicguru 12 siŋsaŋ qarâ juraŋgopieŋ ŋoŋe mu šeri eŋarehuc papia ši ŋe-ŋarekopac. 2 Ŋoŋerao eesâic fuŋne fuŋne fuame manapie bubiaŋnehec sasawa ezejec. 3 Wiac iŋucnezi hâcne mamanasiŋ-ŋeŋic ba esâic ecnekume gâtâ bame ŋoŋerao sasanaŋ fuaocmu. 4 Sasanaŋte fârine ŋoŋerao fua-hâmozejec, eme wiac moc mi basahuc bahacmâc â maŋfuru junšepieŋ.
Maŋɋârâŋ basarâ Wofuŋ numucnezo
5 Ŋoŋeraonec moczi maŋɋârâŋ basarâ Anutu numucnezejec. Eme e ŋic sasawa, dâŋ mi munârehuc, wiac maŋhumuc nâreekaczi bâfuacneocmu. 6 Nunumu ine maŋjahec ehuc mâcne, Wofuŋ manasiŋkehuc numucnezejec. Maŋjahec eocmu e hâwec siri, mâŋâŋzi ficne sueme fâuckerâ tâtieekac, iŋucne eocmu. 7 Ŋic iŋucnezi Wofuŋtaonec wiac moc roocmu mi muzejec. 8 Maŋguru â tie faranezi wemocko iŋuc eocmu.
Mafahec juju i wiac fârine mâcne
9 Opâ ruac wahakicnezi fekicne jukopac muhuc maname šerine ezejec. 10 Á mafaŋiczi wahakicne jukopac muhuc maname šerine ezejec. Jâcârizi ŋeindaŋnerâ biac mârâŋkeekac, iŋuc jaha mafaheczi biac siroweniŋmu. 11 Ʒoaŋ e furicte wefurâ šocnezi šariŋ rikeme ɋaŋame ârine mârâŋkeme eri-ticne wahaekac, iŋuc jaha mafaŋic jaŋe ɋaŋapie qâŋtac-jeŋic sawa ŋeocmu. 12 Ŋic moc e eesâicko qiŋ herâ juocmu ere manape šerine ekac E sanaŋkeku maŋne eme Wofuŋzi eri hendiŋ juju sanaŋ hâcne râcneocmu maŋjeŋic ere domakac jaŋe biŋe qajarekicne.
Eesâicte dâŋ
13 Ŋic moc sâqocnere eesâic fuacneme šiŋuc mi muzejec: Anutuzi esâic nukac. Sâqocnere eesâic Anuturao fufuane mi fokac, â eki wâc ŋic moc sâqocnere mi esâickeocmu. 14 Eesâic ine kecšiŋuc fuaocmu, qanaŋ ŋic moc e jahacne saseczi beŋgisic sicnecnehuc hehawickeocmu. 15 Eme saseczi motec kiweckerâ roocmu, šâŋene sâqocne” sâqocnezi ine woze qeuc eku hâmoc bâfuaocmu.
16 Âgo biaŋfâc-nane, ŋoŋe dâŋ mi mana sifuckenšepieŋ, 17 jauŋ biaŋne â taha fârine i faicnec sasawa, tatamac Mamac eraonec wahaekac, erao hâcne hec hetikic â sâsâoc mi fokac. 18 Anutu e manapaŋkewecte dâŋfârizi naru motecfâcne bâfuac-nâpowec, i wiac sasawa bâfuawec irec hata qaqasune tinac enaŋte iŋuc enârewec.
Dâŋ mamana sawazi aricne, rereŋzi fârine
19 Âgo biaŋfâc-nane, mananiŋ. Ŋiczi dâŋ mamanare afeckenšepeneŋ, dâŋ mumure â aaricte ine ŋemâckenšepeneŋ. 20 Aaricko wiac eeŋgopeneŋ izi Anuture tiŋne hata ririekac. 21 Irec ŋoŋe maŋwânâŋ â râŋgeŋ bârâŋgeŋ hetararâ urucko juhuc maŋŋeŋicko mitidâŋ râekicne i âgo ecnenšepieŋ. Izi hâcne maŋ qâqâtâc-nâŋec bâpiaŋkeocte tâpiri focnekac. 22 Ŋoŋe mitidâŋte fârine bâfuanšepieŋ, mâc hazecte nâpene sawa eme maŋŋeŋic eatuckeniŋmu. 23 Moc e mitidâŋ mana qâoma eocmu, e ŋiczi šâŋe mai-nâŋec hawario honerâ eeŋgopeneŋ, sâc ijaha eocmu. 24 Ʒâŋe mai-nâŋec hawario honerâ ra qâoma erâ izia hawari-nâŋecte nikec-nâpoekac. 25 Á moc e sâcmutâc dâŋ fârine, rambaŋko rârâec-nâpone, dâŋ ira mana utuckerâ juocmu, ehuc mana qâoma mâcne, mana rereŋ eocmu, iŋucnezi ine dâŋte fârine bâfuarâ mana aŋac eocmu.
Mitio jujure dâŋ
26 Moc e mitio jukopac muekaczi micbipic-ticne mi soŋaŋkehuc maŋticne eatuckeekac, ŋic iŋucnere mitio juju i racne eocmu. 27 Hozec bekâ busâqocko juhapie hone maiŋ ejarezo â mâreŋko sâqocne fokac izi maŋnâŋec hegâpârezacte pectâc juzo, izi Anutu â Mamac ere maio wâwânâŋ tâmiricko mitio juju ekac.