2
Nâŋâc qânâ wâtuŋ-nâŋec Jesu erao âtesiŋnenšepeneŋ
1 Ŋoŋe sindaŋ â burec wiac â eeatuc â iiŋguuŋ â gupe micko âkec i hetara-fârenšepieŋ. 2 Hetararâ naru motec ɋiene susure ejareekac iŋuc jaha ŋoŋe maŋ qâqâtâc-ŋeŋicte susu biaŋ irec eŋarezejec. I nâhuc mitio soka pupuŋ enšepieŋ. 3 Wofuŋ jauŋ-ticne moc mana aŋac embiŋko iŋuc enšepieŋ. 4 Ŋoŋe Wofuŋ, qânâ jujune hâcne, ŋiczi hone suŋgiŋkehapie Anutuzi maname fekicne eme bâwosâewec, erao âtesiŋkeniŋ. 5 Ehuc qânâ jujunea efârerâ šuhuckeme šuhuc doma doma fehuc Mârore ufuŋ enšepieŋ. Erâ wâc tiri taha bapa guru erâ maŋzi Anutu taha bâzi ecnenšepieŋ. I Jesu Kristore erâ maname biaŋkeocmu. 6 Miti papiao dâŋ šiŋuc hâcne fokac:
“Manakic, no Zioŋko qânâ moc hekopac,
qânâ wâtuŋ bâwosâekicne furi sâko.
Ŋic moczi erao roweckeocmu e mi qurutuaocmu.”
7 Irec erao roweckeeŋgopieŋ ŋoŋerao wiac furi sâko ekac. Á mamanasiŋ tâmiric jaŋere šiŋuc mukicne:
“Ficbapa jaŋe qânâ surehuc behembiŋ,
izi hâcne qânâ wâtuŋ ewec domakac.”
8 Erâ wâc
“Qânâ ira kike-jeŋic hepirickeniŋmu
â buse ira heariweniŋmu.”
Ŋic miti qikiŋnehuc ira heariweniŋte mukicnere iŋuc hâcne eeŋgopieŋ.
Anuture bufuŋfâc embeŋ
9 Ŋoŋe ine bâwosâecfâc-ticne â taha bapa ŋicbomboŋfâc-ticne â tiri ŋicgurufâc-ticne â fuŋfuŋ gurufâc-ticne. Iŋucne ŋoŋe dapâckonec bawefuc-ŋoparâ tatamac jaŋgeŋ-ticnao râec-ŋopawec ere mâsi sâkore biŋedâŋ muropiepie haŋ bazejec. 10 Ŋoŋe mârâc jaha ruc hurâ jumbiŋ, ši ine Anuture ŋicfâc embiŋ juŋgopieŋ” mârâc jaha qarâ suŋgiŋne jumbiŋ, ši ine uruc jauŋko juŋgopieŋ.
Sasec getâckehuc juzo
11 Âgo biaŋfâc-nane, no ŋazape mananiŋ, ŋoŋe mâreŋko jaba â ŋicmanac jueŋgopieŋzi sasec, maŋ qâqâtâc-ŋeŋicte râsi hâcne, i getâckenšepieŋ. 12 Ehuc qâpuc jaŋere ŋondeŋko juju tiŋne junšepieŋ. Iŋuc jupie qâpuc jaŋe fuŋne-ŋeŋic hone mana tarac erâ, sâqocne bapa muŋareeŋgopieŋ, i beherâ juku Anuture iiqic dameŋko eehâmo gie-ŋeŋicte erâ Anutu muteŋkenšepieŋ.
Fekicne jaŋere dâŋ reŋkezo
13 Ŋiczi sâcmutâc fuŋne fuŋne râekicne i ŋoŋe Wofuŋte erâ reŋke-fârenšepieŋ. Ŋicwofuŋ, femicne juekac, ere mecne, 14 â kia gawamaî râec-jopawec jaŋere mumupaŋ mecne, mâmâc reŋkenšepieŋ” jaŋe hâcne sâqocne bapa okacne jareniŋte, â sâcne jueŋgopieŋ jaŋe mumbiaŋ-jopaniŋte mu jarekicne. 15 Ŋoŋe eehâmo gie bahuc ŋic mutucne, mumusifuc bâfuaeŋgopieŋ jaŋere dâŋ bâniniŋkeniŋte Anutuzi muŋareekac hâcne. 16 Ŋoŋe goroŋ-ŋopakicnere rambaŋ juŋgopieŋ, erâ juju izi sâqocnere tapa mi ezejec, rambaŋ juhuc Anuture kiŋaŋ qanšepieŋ. 17 Ŋoŋe ŋic šeŋgoma sâsec-jopanšepieŋ, âgofâc-ŋeŋic maŋjauŋ ejarenšepieŋ, Anutu araŋ bacnenšepieŋ, ŋicwofuŋ sâsenšepieŋ.
Kiŋaŋ qaqa jaŋere dâŋ
18 Kiŋaŋ qaqa ŋoŋe bomboŋfâc-ŋeŋic araŋ bajarehuc micjeŋic reŋkenšepieŋ, i bomboŋ urucne â mâteŋne jaŋe sawa mâcne, šâšâicne jaŋe mâmâc iŋuc ejarenšepieŋ. 19 Jaŋe maŋgâŋ bahac tâmiricko bâšâic-ŋopapie Anuture manasuhuc rârâŋgeŋ tâmiric jupie maname biaŋkeocmu. 20 Á bahac bâfuarâ šika kihuc rârâŋgeŋ tâmiric jupie mozi maname biaŋkeocmu? Tiŋne juhuc šika kirâ rârâŋgeŋ tâmiric jupie ine Anutuzi maname biaŋkeocmu.
Jesure kike hata âte razo
21 Ŋoŋe iŋuc eniŋte hâcne muŋarekicne. Kristo e iŋuc jaha ŋoŋere erâ šâic manahuc bânie-ŋarewec, eme ŋoŋe kike hata-ticne honehuc ijaha âte ranšepieŋ. 22 E bahac mi bâfuawec, â sioc micticnaonec mi fuawec. 23 E musâqorepie okacne mi musâqorec-jopawec, bâšâickepie okacnere dâŋ mi jazawec. E dâŋ mumutara gie fârine baekac ere biŋe qawec. 24 Nâŋâcne sâqocnezi ere sahacko feme maripoŋko bafewec, i sâqocne hâmocnehuc tiŋkerâ junaŋte ewec. Ere wiczi ŋoŋere wic bâsomiewec hâcne. 25 Ŋoŋe lama iŋucne qâsoc bâsoriehuc jumbiŋ. Ʒi ine maŋ qâqâtâc-ŋeŋicte rusoŋaŋzi hefârec-ŋopame erao fisimbiŋ.