1 Ŋoŋe maŋjauŋhec juniŋte ɋicwânšâŋ enšepieŋ. Erâ miti kadahe gâcne roniŋte irec wâc šoɋac enšepieŋ, ehuc Anuture micdâŋ mumufuare manapie fefene ezejec. 2 Moc e dâŋ marac furuo muekac e ŋic mi jazahuc Anutu âzâcneekac. E Mârozi ecneme dâŋ marac furuo mume ŋic jaŋe kâuc baeŋgopieŋ. 3 Á Anuture micdâŋ mufuaekaczi ine ŋic faŋ qajareekac â âkesiŋ-jopaekac â buuruc qajareekac. 4 Marac furuo dâŋ muekaczi e jahacne maŋ âkesiŋkeekac, â Anuture micdâŋ mufuaekaczi ine kikefuŋ guru âkesiŋ-jopaekac. 5 Ŋoŋe dâŋ marac furuo mufârepie manape sâckeocmu, Anuture micdâŋ mufuapie ine manape sâcke-hâmoocmu. Anuture micdâŋ mufuaekac ŋic e marac furuo dâŋ mumuŋic ere sâc sirickekac. Mocjaha, marac furuo dâŋ muku kikefuŋ guru bâtikie-jareme manarâ fârine bajupie ine sâcjeŋic mocjaha eocmu. 6 Âgofâc, no ŋoŋerao fârâ marac furuo dâŋ ŋazape wemocko âkesiŋ-ŋopaocmu? No muraruŋ dâŋ me miti hukicne me findaŋdâŋ me mu qaqazuc dâŋ muratie-ŋarepe ine sâcne maŋfâri-ŋeŋic eocmu.

7 Wiac omane, woŋgâŋ mimi ŋokac wiac, i qapie dâŋ hawarine tâtâc mi fuame wemocko šâŋitazo? 8 Me qeŋ kosa qapie dâŋ eme manarâ wemocko “wiac mocte kuku qanâreŋgopieŋ” muhuc ra bafic-jopaniŋmu? 9 Á ŋoŋe iŋuc jaha marac furuo dâŋ foŋnehec mupie gâcnezi wemocko mananiŋmu, i dâŋŋeŋiczi qahameŋkeocmu. 10 Mâreŋ sâc ŋic dâŋmarac fuŋne fuŋne forakac i mamanane sasawa. 11 Mâc noni dâŋmarac moc kâuc bapemuo dâŋ irec runezi nore maname mutucne eocmu, â noni ere iŋuc jaha manape mutucne eocmu. 12 Eme ŋoŋerao fuŋne ijaha fokac. Mârore tâpiri ŋoŋerao fuaocte mueŋgopieŋ i sâcne, erâ i hâcne mitizi kikefuŋ âkesiŋ-jopaocte šoɋac enšepieŋ 13 Irec marac furuo dâŋ muocmu e fuŋne mana-hâmorâ ŋic ŋokac bâtikie-jareocte Wofuŋ numucneme bafickezejec. 14 No marac furuo numupemu, ine maŋ qâqâtâc-nanezi sawa epemu, â mamana-nanezi mâc foocmu. 15 Eme irec weniŋuc ezo? Kecšiŋuc ezo: No maŋ qâqâtâc-nanezi numume mamana-nanezi mana tararâ miczi mutaniŋkezejec. 16 Me go maŋ qâqâtâcgezi Wofuŋ muteŋketec ŋic omane moczi dâŋge kâuc bahuc wemocko baficgurâ “Jâmbomac” muocmu? 17 Go mumuteŋ dâŋ fârinehec mucmu mecne, erâ âgogezi kâuc baha wemocko maŋne âkesiŋkeocmu? 18 Anutu daŋge âzâcnekopac, marac furuo dâŋ mumu i no ŋoŋere sâc mâcne, sâc fekicne fonarekac. 19 Eme irec manape fârine eme muzac, tutumaŋko marac furuo dâŋ šoricne šora muzo murâ muzapo. Erâ no irec manape wahakac, â mitidâŋ jahec mac sawa mutaniŋkehuc ŋic ŋokac jaza qazuc ee, irec ine manape fekac.

20 Âgofâc, dâŋ mana wosâc eere mamana-ŋeŋiczi ɋie jaŋere sâc mi ezejec, sâqocnere i ɋiene jaŋere sâc enšepieŋ, â mana wosâcte ine maŋ mamana-ŋeŋiczi sokakicne jaŋere sâc ezejec. 21 Sâcmutâc dâŋqâhâcko dâŋ moc šiŋuc qâreŋkekicne fokac: “Wofuŋ e mukac, `No ŋic furune ejarepe jaŋe ŋicguru ši dâŋmarac furunao micdâŋ-nane jazapie i wâc sifu mi mananiŋmu. Ž `à 22 Eme irec ŋifecne mupe: Marac furuo dâŋ mumu i fuŋne qaqa mâsi moc, erâ i opâ ruac jaŋere biŋe mi ekac, i qâpuc jaŋere biŋe, â Anuture micdâŋ mumufua ine qâpuc jaŋere biŋe mâcne, i opâ ruac jaŋere biŋe. 23 Irec kikefuŋ guru tumaŋne-fârehuc mâmâc sasawa marac furuo dâŋ muhapie ŋic omane me qâpuc moczi hefârâ honec-ŋoparâ muocmu: “Maŋsifuc ejarekac.” 24 Á Anuture micdâŋ mufuahuc ŋehapie ŋic qâpuc me omane moczi ŋoŋerao hefârâ miti i manaocmu, ine mâmâc sasawa maŋticnere fuŋne bataniŋkeniŋmu â mumu hehec ecneniŋmu. 25 Eme maŋticnao wiac hesoŋkeme foekac i fua taniŋkeme šâŋe maine mâreŋko hetutuckerâ Anutu muafeckehuc muocmu, Anutu e jâmbomac ŋoŋehec jukac.

26 Âgo bureŋ, irec weniŋuc? Ŋoŋe tumaŋneniŋte murâ maŋ metariŋ mi fisieŋgopieŋ. Moc e miti gae bafisiekac, moc e mu qaqazuc dâŋ, moc e Anuture micdâŋ furune, moc e marac furu dâŋ, â moc e marac furu dâŋ irec fuŋne. Wiac i sasawa miti fua sawec eŋareocte enšepieŋ. 27 Marac furuo dâŋ muzo murâ boczi mâcne, jajahec me jahec â moc sawazi munšepieŋ. Erâ buc buc mupie sâc moczi fuŋne bâtikierâ ŋazazejec. 28 Bâbâtikie ŋic basaniŋmuo tutumaŋko marac furu dâŋ mi muzo. Moc e muzo murâ bucticne â Anuturao muzejec. 29 Anuture micdâŋ mumufua ine iŋuc jaha ŋic jajahec me jahec â moc munšepieŋ, eme gâcne mana wosâerâ ŋifecne munšepieŋ. 30 Moc e ŋehame Mârozi maŋticnao miti râeme muzo mume mârâc fuŋkejeczi behezejec. 31 Anuture micdâŋ mumufua i ezo murâ sâcne efârenšepieŋ, ehuc buc buc mupie gâcne sasawa jaŋe mitihec erâ maŋafec bâfuanšepieŋ. 32 Anuture micdâŋ mumufua ŋic mârofâc-jeŋic jaŋe porofete âgofâc-jeŋic jaŋere dâŋ reŋkenšepieŋ. 33 Anutu e hesi qâsifuc Anutu mâcne, e wama Anutu.

34 Kikefuŋ gâcnao mitire tumaŋnehuc ŋokac jaŋe dâŋemâc ŋeeŋgopieŋ, ŋoŋerao iŋuc jaha enšepieŋ. Ŋokac jaŋe iŋuc ehuc wahamicne juniŋte i sâcmutâc dâŋqâhâcko mukicne wâc. 35 Wiac moc manazo ejareme ficjeŋicko ŋowefâc-jeŋic mu wioc ejarenšepieŋ. Ŋokac moczi kikefuŋ tutumaŋko dâŋ mume mimi qaqanehec eocmu. 36 Me Anuture dâŋzi ŋoŋeraonec fuawec? Me ŋoŋe buc manambiŋ?

37 Ŋoŋeraonec moczi e jahacnere maname porofete me ŋic Mârohec eocmu, e dâŋ qâreŋke-ŋarekopac i Wofuŋte mumupaŋ, iŋuc mana tarazejec. 38 Moc e dâŋ ši maname fârine mi eme e mana suazo.

39 Irec, âgofâc, šiŋuc mananiŋ: Ŋoŋe Anuture micdâŋ mumufua irec šoɋac enšepieŋ, â marac furuo dâŋ mumure aka wâc mi henšepieŋ. 40 Wiac sasawa epie pec sererec â tiŋbenoŋ fozejec.