1 E, Matigi dimina

fɔ a ka Siyɔn dugu datugu ni sankabaw ye, k’a kɛ dibi ye!

A ka Izirayɛli ta nɔɔrɔ bɛɛ bɔ a kan,

k’a ben dugu ma.

O dugu le tun bɛ i ko a senlayɔrɔ;

nka a ma sɔn k’a hakiri to o ra, a ta dimilon na.

2 Matigi ka Yakuba ta duguw bɛɛ halaki ka o ban pewu,

hali a ma hina o ra.

A jusu bɔninba

ka Zuda mara ta dugu barakamanw benben.

Jamana ni a kuntigiw bɛɛ,

o ka o bɛɛ ben dugu ma ka o lamaroya.

3 A ta dimiba kosɔn,

a ka Izirayɛli ta baraka bɔ a kan.

Wagati min na o juguw wurira o kama,

a banna k’a boro bɔ ka o dɛmɛ.

A ka tasumaba mana Yakuba ta so kɔnɔ,

ka o ta yɔrɔw fan bɛɛ jɛni.

4 A k’a ta kalan sama a ta mɔgɔw kama, i n’a fɔ o jugu dɔ.

A ka kalan mina ni a kininboro ye a ta mɔgɔw kama, i n’a fɔ o kɛrɛbaga dɔ.

Mɔgɔw ɲa tun bɛ bɔ mɔgɔ minw bɛɛ fɛ,

a ka olugu bɛɛ faga Siyɔn dugu ta sow kɔnɔ.

A k’a ta dimiba lajigi o kan

i ko tasuma.

5 Matigi kɛra i ko Izirayɛli jugu dɔ;

a ka Izirayɛlimɔgɔw halaki ka o ban pewu.

A ka o ta masabonbaw bɛɛ halaki,

ka o ta bon barakamanw cɛn.

A ka ɲaji ni kasi caya

Zuda mara mɔgɔw cɛ ra.

6 A k’a yɛrɛ ta yɔrɔ laminikogo cɛn, i ko nankɔ ta sansan bɛ cɛn cogo min na;

a k’a ta ɲɔgɔnkunbɛnyɔrɔ cɛn.

Matigi Ala ka mɔgɔw hakiri bɔ

ɲanagbɛw, ani Nɛnɛkirilonw* kɔ Siyɔn dugu kɔnɔ.

A ta dimiba kosɔn, a ka masacɛw

ani sarakalasebagaw bɛɛ dɔgɔya.

7 Matigi banna a ta sarakajɛnifɛn* na;

a k’a kɔ don a ta yɔrɔ saninman ma.

A ka Siyɔn dugu masabonw labla,

k’a to o juguw ka o kogow cici.

Mankanw cayara Matigi Ala ta batoso kɔnɔ,

k’a kɛ i ko ɲanagbɛlon dɔ ta mankan.

8 Matigi Ala k’a latigɛ

ko a bɛ Siyɔn dugu laminikogow ci.

A ka juru la k’a suma,

a fana ma sɔn k’a ciri dabla fiyewu!

A ka dugu kogo barakamanw ni a laminikogow bla sukasi ra;

o bɛɛ benbenna ɲɔgɔn kan.

9 Dugu donda konw karira ka ben fɔ ka don bɔgɔ ra, dugukolo ra;

a ka konw sɔgɔnanw cɛn, ka o bɛɛ karikari.

O ta masacɛ ni o ta kuntigiw bɛ siya wɛrɛw boro.

Sariya tɛ yi tuun;

o ta ciraw fana tɛ kuma foyi sɔrɔra

ka bɔ Matigi Ala fɛ tuun k’a fɔ mɔgɔw ye.

10 Siyɔn dugu cɛkɔrɔbaw,

olugu jenin siginin bɛ dugu ma.

O ka buguri kɛ o kun na,

ka bɔrɔfaniw don o yɛrɛ ra.

Zeruzalɛmu sungurudenw

ka o kun biri dugu ma.

11 Ne ɲadenw baraka banna kasi fɛ;

ne kɔnɔ gbanna;

ne kɔnɔnɔ firira

ne ta dugumɔgɔw ta cɛnri kosɔn;

sabu denmisɛnw ni denɲɛninw bɛ siradaw ra,

o bɛɛ baraka dɛsɛnin lo.

12 O b’a fɔra o bamusow ye ko:

«An bɛ domuni ni rɛzɛnji fɛ!»

O baraka dɛsɛnin bɛ dugu siradaw ra

i ko mɔgɔ mandiminin.

O nin bɛ bɔra o ra,

ka o to o bamusow boro.

13 Ne bɛna mun le fɔ aw ye tuun?

Ne bɛna aw suma ni jɔn le ye tuun, Zeruzalɛmu dugumɔgɔw?

Ne bɛna aw suma ni jɔn le ye,

ka aw jusu saaro, Siyɔn dugumɔgɔw?

Sabu aw ta cɛnri bonyara i ko Kɔgɔjiba!

Jɔn le bɛna se ka aw bɔsi ka bɔ nin na sa?

14 Aw ta ciraw ka ko o ko ye k’a fɔ aw ye,

o bɛɛ tun ye kumalakolonw, ani mɔgɔlafirikumaw le ye.

O ma aw ta jurumunw gbɛya k’a fɔ aw ye,

ni o tɛ, o tun tɛna aw mina.

O ka kuma min o min fɔ aw ye,

o bɛɛ kɛra faninya ni janfakumaw le ye.

15 Tɛmɛbagaw bɛɛ bɛ kabakoya

fɔ ka o boro fla gbasi ɲɔgɔn na aw le kosɔn.

O bɛ filen fiyɛ ka o kun yuguyugu

Zeruzalɛmu dugumɔgɔw kosɔn,

k’a fɔ ko: «E, o tun b’a fɔra dugu min ma ko a cɛɲa dafanin lo,

ani dunuɲa bɛɛ tun bɛ ɲagarira dugu min kosɔn,

o dugu le ye nin ye tan bi wa?»

16 Aw juguw bɛɛ bɛ o daw wagara

ka kumabaw fɔ aw le ma.

O bɛ filen fiyɛ, ka o ɲin ɲimi,

ko: «An ka o bɛɛ halaki ka ban pewu!

An tun bɛ lon min kɔnɔna cɔ,

o le sera bi, an ɲa k’a ye!»

17 Matigi Ala tun ka min latigɛ, a ka o kɛ.

A tun k’a darakan min di kabini wagatijan, a ka o le dafa.

A ka cɛnri kɛ,

hali a ma hina.

A k’a to aw juguw yɛrɛkora aw ma;

a ka aw juguw baraka bonya.

18 O bɛ kulera ni o jusukun bɛɛ ye, ka Matigi wele.

Siyɔn dugu kogow,

aw ye ɲaji woyo su ni tere,

i ko baji.

Aw kana sɛgɛ kasi ra;

aw ɲaden kana ɲajibɔ dabla ka ye.

19 Aw ye wuri su fɛ ka kule!

Aw ye kule su wagati bɛɛ ra.

Aw ye aw jusukunnakow bɛɛ fɔ Matigi ɲa kɔrɔ,

k’a kɛ i ko ji bɛ woyo cogo min na.

Aw ye aw boro kɔrɔta k’a daari,

janko a ye aw denw kisi,

sabu o bɛ sara kɔngɔ boro

dugu siradaw bɛɛ ra.

20 E, Matigi Ala,

i ɲa lɔ an na, k’a flɛ i bɛ nin kow kɛra mɔgɔ minw na.

Yala a daganin bɛ ko muso ye a yɛrɛ woroden sogo domu wa,

a b’a den min kanu?

Yala a daganin lo ko sarakalasebagaw ni ciraw ye faga

hali Matigi ta yɔrɔ saninman kɔnɔ wa?

21 Denmisɛnw ni mɔgɔkɔrɔbaw

suw lalanin bɛ dugu ma siradaw ra.

O ka ne ta sungurudenw

ani ne ta kanbelenw faga ni kɛrɛkɛmuru ye.

I ta dimilon na kɔni, i ka fagari kɛ,

i ka mɔgɔw kannatigɛ, hali i ma hina.

22 I ka an jatigɛbagaw wele ka bɔ fan bɛɛ ra ka na an kama,

k’a kɛ i n’a fɔ o bɛ mɔgɔw wele ɲanagbɛ ra cogo min na.

Matigi Ala ta dimilon na, mɔgɔ si ma bɔsi,

mɔgɔ si ɲanaman ma to.

An tun ka an janto den minw na, ka o lamɔ,

an juguw ka olugu bɛɛ halaki.