Viakʼla txumbʼal u tioxh Qꞌu Niman Tetz U Jesuus Tu Galaacia 1

U Uꞌ ITZꞌIBꞌA BꞌEN U PABLOXEꞌ QꞌU NIMAN TETZ U JESUUSTU GALAACIA

Yol tiꞌ u uꞌ tzaꞌ

Aatz u uꞌ tzaꞌ, aꞌ tzꞌibꞌan u Pablo, kamal tixoꞌl qꞌu yaꞌbꞌ 48 — 53 m.t.J. Aꞌ itzꞌibꞌav kꞌasuꞌl tu u tenam Corinto.

U Pablo ex paxsan itziiul u bꞌaꞌnla chusbꞌal xoꞌl qꞌu aanima tikuenta u nimla departamento Galaacia tziꞌ. Loqꞌ aatz bꞌaxa, majax tu u Tioxhla Espiiritu. Pek xamtele ok unjolol aanima tiꞌ inimal u Jesuus.

Kam koj tokeꞌ itzꞌibꞌa, pek nitekxeꞌtiyan itxumbꞌal qꞌu niman tetz u Jesuus tu Galaacia. Yitꞌeꞌch tereꞌn koj aꞌ bꞌaxa. Kaanaich motx itxuqꞌtxun tiꞌ u bꞌaꞌnla chusbꞌal bꞌanel. Utz tiira kꞌujlel ikꞌuꞌl tiꞌ. Pek xeꞌt motx toksa tetz qꞌu Israeel aas ministeer sinima u oꞌtla mantaar, u tuqꞌaybꞌal qꞌu Israeel. Ech nital tu u 4.13-15. Utz tabꞌi u kam u Pablo tziꞌ. Echtzixeꞌt itzꞌibꞌa u uꞌ tzaꞌ tiꞌ iyaal bꞌiil utz, tiꞌ toksal tu jik. Tan kantuꞌ aas yeꞌ koꞌxh tiil nimotxtok vaꞌt chusbꞌal tiviꞌ. Utz niꞌxhtal te aas kam bꞌanel tu u atinchil tu u bꞌaꞌnla chusbꞌal. Nital te majte aas atoꞌk kaꞌvatzla chaj aanima tixoꞌl; niman tetz u Jesuus aas nimotxtaleꞌ. Ech tiira aꞌ nital tu qꞌu aa Galaacia aas aꞌ ibꞌoꞌqꞌol tii samotxkꞌujeꞌ ikꞌuꞌl tiꞌ inimal u Jesuus. Utz yeꞌxhkam nitxakunku vinimal u oꞌtla mantaar.

Aꞌ u jatxbꞌal tibꞌ qꞌu yol tu u uꞌ tzaꞌ.

1) 1.1-9 Ech ixeꞌt u uꞌ tzaꞌ.

2) 1.10—2.21 Nital u bꞌaꞌnla chusbꞌal vaꞌl tal tu u Pablo.

3) 3.1—5.12 Nitaleꞌ aas taꞌxh u Jesuus nichitpun qꞌu aanima tu paav.

4) 5.13—6.10 Nitaleꞌ aas vatzil inimal u oꞌtla mantaar, aꞌ ibꞌoꞌqꞌol siꞌan tii tibꞌilaj. Aꞌ siꞌan qꞌu kam isaꞌ u Tioxhla Espiiritu.

5) 6.11-18 Ech vitzojpu qꞌu yol tu u uꞌ tzaꞌ.

U Uꞌ ITZꞌIBꞌA BꞌEN U PABLOXEꞌ QꞌU NIMAN TETZ U JESUUSTU GALAACIA

Ichajlichil qꞌu niman tetz u Jesuus tu Galaacia

1-2 Nunqꞌilabꞌenex jankꞌal ex, ex niman tetz u Jesuus tikuenta Galaacia. Aꞌ unmol qꞌu niman tetz u Jesuus qꞌuꞌl atil sunkꞌatza, in Pablo ichaj u Jesucristo. Tan yitꞌ vinaj koj oksanin utz, yitꞌ vinaj koj chajonin. Pek u Jesucristo oksanin tuchꞌ u Tioxh. Ayaꞌ u kuTat vaꞌl qꞌaav itzꞌpixsan u Jesuus xoꞌl qꞌu kamnaj. 3 Ech atil koj vibꞌaꞌnil u Tioxh sekꞌatza tuchꞌ u paas tetaanima vaꞌl nitaqꞌ u Tioxh, u kuTat utz, vaꞌl nitaqꞌ u kuBꞌaal Jesucristo. 4 Tan kam qiꞌ tiꞌ qeesal tu qꞌu kupaav, ayaꞌ qꞌu onkonil nibꞌanax tu u tiempo cheel. Tan ech vitxumbꞌal u Tioxh qiꞌ, u kuTat. 5 Ech tetz u tokebꞌal qꞌii bꞌenamen, ech koꞌxh ibꞌenaꞌ. Aꞌi.

Viyaal qꞌu aa Galaacia tiꞌvixaaneꞌl kꞌatz u bꞌaꞌnla chusbꞌal

6 Nitekisotz unkꞌuꞌl setaqꞌo, ex aa Galaacia. Tan yeꞌ koꞌxh tiil mexaaneꞌl kꞌatz u Tioxh vaꞌl sikꞌlenex tu u bꞌaꞌnil kꞌatz u Cristo. Bꞌenyu ekꞌuꞌl tiꞌ vaꞌt paartenla chusbꞌal. 7 Loqꞌ yitꞌ tiꞌ koj aas nojla bꞌaꞌnla chusbꞌal vaꞌt vaꞌl tziꞌ, pek sotzsamal ekꞌuꞌl niꞌan unjolol qꞌu aanima qꞌuꞌl nichusun sete. Aꞌ isaꞌ iyuut vibꞌaꞌnla chusbꞌal u Cristo tuchꞌ unjot yeꞌxtxojla chusbꞌal. 8 Ech aꞌ ikꞌulel tiira sotzchil siꞌan u aanima vaꞌl paarten chusbꞌal sichus texoꞌl aas yitꞌ ela koj tuchꞌ u bꞌaꞌnla chusbꞌal vaꞌl alel sete vaqꞌo. Ech yeꞌ enima kꞌuxh aal oꞌ saꞌalon vaꞌt chusbꞌal sete. Utz kꞌuxh maꞌj aanjel tu amlika saꞌalon majte tan, inujul koj atziꞌ. 9 Alel nal sete vaqꞌo. Utz nunkaꞌpaju talaxeꞌ aas: —Oj abꞌil sapaxsan itziiul vaꞌt chusbꞌal sete aas paarten vatz u bꞌaꞌnla chusbꞌal vaꞌl nimamal setaqꞌo, altaj tzꞌejbꞌal tzii yol tiꞌ.— Texhin.

Qꞌu kam tal u Jesuus tu u Pablo

10 Aatz in, aꞌ koj unsaꞌ aas bꞌaꞌn in vatz qꞌu aanima. Pek aꞌ unsaꞌ aas aꞌ bꞌaꞌn in vatz u Tioxh. Tan oj aꞌ nunchokeꞌ aas bꞌaꞌn sabꞌenkꞌin tu aanima, yitꞌ in tereꞌn koj taqꞌonom u Cristo atziꞌ oj echi.

11 Ech aꞌ unsaꞌ setootzaji hermanos, aas yitꞌ icheesaꞌm koj aanima u bꞌaꞌnla chusbꞌal vaꞌl nunpaxsa talax sete tzaꞌ. 12 Tan vinaj koj chusun ve. Utz kꞌatz koj vinaj unchabꞌav el. Pek jik chit u Jesucristo kꞌuchun ve.*

13 Tan abꞌimal setaqꞌo atziꞌ kam bꞌanel tu vuntxumbꞌal maꞌx tiempo, aas atichꞌin tu u uqꞌaybꞌal tetz qꞌu Israeel. Tan iqꞌomich unyakꞌil tiꞌ tojchal qꞌu niman tetz u Jesuus. Aꞌ nichvitzꞌa isotzsaleꞌ.† 14 Techalich untxumbꞌal tiꞌ u uqꞌaybꞌal nimamich vaqꞌo tziꞌ. Paalnajin vatz qꞌu vetz chꞌiiel qꞌuꞌl ela vuqꞌaybꞌal tuchꞌ. Tiira sibꞌ nichbꞌenku ve aas niqelax qꞌul ikostuumbre qꞌul unkꞌuy unmam tzꞌibꞌamal.‡ 15 Pek tiira tu u Tioxh elka aas itxaaꞌin. Utz vetisikꞌleꞌin tu vibꞌaꞌnil ayaꞌxchen aas yeꞌsajenich vitzꞌpeꞌ. Ankoꞌxh atichꞌin kꞌatz unnan. 16 Ech vootzajit viKꞌaol taqꞌo. Tan aꞌ visaꞌ viꞌ seꞌnunpaxsa talax vibꞌii xoꞌl qꞌu puera aanima. Echixeꞌat yeꞌxhkam vabꞌi untxumbꞌal tu maꞌj aanima aas kam sunbꞌan tiꞌ en ipaxsal itziiul. 17 Nikoꞌxh bꞌenkojin tu Jerusaleen tiꞌ tabꞌil untxumbꞌal xeꞌ qꞌuꞌl ichaj nal u Jesuus sunvatz. Pek aꞌ bꞌenkꞌin tu Araabia. Utz yakich paj qꞌaav bꞌenin tu Damasco.§

18 Pek xamtich tek tuul, bꞌenin tu Jerusaleen. Aꞌ chit maꞌtich ipaal oxvaꞌl yaꞌbꞌ, ex vil u Luꞌ. Utz 15 qꞌii unbꞌanka tzixeꞌ. 19 Utz yeꞌxhabꞌil vaꞌtoj qꞌul ichaj u Jesuus vila. Taꞌxh vil u Jacobo, vitzaꞌqꞌ u kuBꞌaal Jesuus.* 20 Vatz Tioxh nivaleꞌ aas inujul qꞌu kam nuntzꞌibꞌa tzaꞌ. Yitꞌ in koj txubꞌaꞌlom.

21 Uncheeꞌ xamtel paj tuul, bꞌenin tikuenta Siiria tuchꞌ tu Ciliicia. 22 Utz yeꞌich tootzaj unvatz qꞌu niman tetz u Jesuus qꞌuꞌl tikuenta Judea. 23 Pek taꞌxh nichmotxtabꞌi talax viꞌ ech tzaꞌ: —Aatz vaꞌl nichiꞌan ikꞌuꞌl qiꞌ maꞌx tiempo, aal nitekipaxsa itziiul u bꞌaꞌnla chusbꞌal tetz u Jesuus cheel, kꞌuxh aal nichtitzꞌa isotzsal bꞌaxa.— Chia. 24 Ech nichmotxtoksa iqꞌii u Tioxh viꞌ.

*1:12 Choktaj Qꞌu Bꞌaꞌnla Chaj Kam Bꞌanel (Hechos) 9.3-6; 22.6-10; 26.13-18.

†1:13 Choktaj Qꞌu Bꞌaꞌnla Chaj Kam Bꞌanel (Hechos) 8.3; 9.1-2.

‡1:14 Choktaj Qꞌu Bꞌaꞌnla Chaj Kam Bꞌanel (Hechos) 22.3.

§1:17 Aatz u Araabia nital tzaꞌ tziꞌ, ankoꞌxhtuꞌ vaꞌl Negueev vatz qꞌu Israeel cheel tikuenta aal ikuꞌeꞌ. Choktaj Qꞌu Bꞌaꞌnla Chaj Kam Bꞌanel (Hechos) 9.20.

*1:19 Choktaj Qꞌu Bꞌaꞌnla Chaj Kam Bꞌanel (Hechos) 9.26-30.