1 Sambasa mindina, Jisasa bala witi ee tupana tombenenga epo peai-kola, balana disaipolo tupamane bala watama epoto, witi dini minditupa yo moto, imbuni kini-mane kokope lo apoto, angini tupa naka pima peainipia. * Lo 23:25 2 Wuane peai-kola, Patasai minditupa-mane andoto, Gotena loo okomane loto, Sambasa angi wandakali-mane piape napipe-pene leya-ko. Anu peakale yakamato loo okone ango wato, witi dini tupa moto, imbuni kini-mane kokope lo apeyaipe leainipia. * Jo 5:10

3-4 Wuane leai-kola, Jisasato utupanena pii okone yano peyoto, Gotena loo okomane loto, Gotena lotu anda okona betesa Gote maiyene yalaini tupa pitisa akali tupamane angu nape-pene layene eya leaipia. Wandakali waka mindimane betesa utupane naa na-piyapape layene eya tekeko, wamba Dapitipi, bala towa atu ateaini akali tupapi, utupane yakama ulia nono yai-kola, balato Gotena lotu anda okona kolandaka loto, betesa utupane mo noto, bala towa atu ateaini akali tupapi neakale mayane layene eya. Yakamato pii okone wamba dii lo anda napeaipe leaipia. * 1Sa 21:1-6; Pit 24:5-9 5 Wuane lalu, Jisasato utupane lamawuato, Akalina Iwanane nambato Sambasa oko bosa lo ando atalawane leaipia.

6 Sambasa waka mindina, Jisasa bala Juta yamena lotu anda mindina kolandaka loto, wandakali tupa mana lamawua ateaipia. Okone angi akali kii tikasa-tole koo kapu-tene mindi lotu anda okonena peteaipia. 7 Petea-kola, loo tupana mana andene akali tupapi, Patasai tupapi, utupane-mane Jisasa kosimi lamakale nembo toto, Sambasa angi balato akali okone mo atu eyape lo andatawa peteaini-pia.

8 Utupane-mane bala kosimi lamakale nembo teyai lo andoto, Jisasato akali kii koo okone lamawuato, nimba wandakali peteyai tupana tombenenga ika lo ata lea-kola, akali okone ika lo ateaipia. 9 Ika lo atea-kola, Jisasato wandakali peteaini tupa tipa puato, Gotena loo okomane aki leyape. Sambasa angi yakamato mana epene minalapape leyape. Pee, Sambasa angi yakamato mana koo minalapape leyape. Sambasa angi yakamato wandakali moyalapape leyape. Pee, Sambasa angi yakamato wandakali mindi minu koyalapape leyape lo nambato yakama tipa peyo leaipia.

10 Wuane lalu, Jisasato wandakali peteaini tupa pitaka lee-mane anda amo nena piyu, akali okone lamawuato, nimbana kii oko yo laa leaipia. Akali okonemane Jisasato leane pua pea-kola, balana kii oko atu wete yaepia. 11 Sambasa angi, Jisasato akali okone mo atu ya-kola, loo tupana mana andene akali tupapi, Patasai tupapi, utupane-mane yataka-mane omoto, yakama teke-teke mindi lamai-lamai puato, nanimato bala towa anu pimape leainipia.

12 Ole mindina Jisasa bala yuu wangiane mindina pote lolo peaipia. Poto, utulu bala limu pali napene, pote angu lo atea-kola, waa leaipia. 13-16 Waa lea-kola, balana atu atene tupa epeakale loto, balato akali alesa yapa lo meaipia. Balato akali Saimone oko gene mindi Pita leaipia. Jemesapi, Jonepi, Pilipipi, Batolo-miyupi, Matiyupi, Tomasapi, Saimone amene Endutu okopi, Alipusa iwanane Jemesa okopi, Jemesa waka mindina iwanane Jutasa okopi, Selote yamena akali Saimone okopi, Jutasa Isaka-tiyote lene matili Jisasa ene peteane okopi, akali alesa utupane pitaka Jisasato yapa lo moto, gene aposolo akali leaipia.

17-19 Jisasa balana disaipolo tupa towa yuu wangiane okone tepa alu, puu nena loto, yuu lama tika-pene mindina ateaipia. Atea-kola, solewata matenenga Taya, Saitone-la, tano okone-lapona tanepi, Jutusaleme tanepi, Jutiya disitiki pitakana tanepi, bala towa atu atalaini wandakali kambua wete balana pii ale olo epeainipia. Wandakali siki palene tupamane Jisasa wata yai-kola, Gotena tai-lene andane balanga paleane okomane utupanena siki tupa mo atu yaka peaipia. Wamba sipitisa koo tupamane wandakali minditupa minu koyaini tekeko, wandakali utupane-mane Jisasa wata yai-kola, sipitisa koo utupane-mane wandakali utupane tepa alu peai-kola, utupane atu yainipia. Tene okonena, utupanena siki tupa atu yakale nembo toto, wandakali siki pelene tupa pitaka-mane balanga wata aka puyale epeainipia.

20 Wandakali kambua epo ateai-kola, Jisasato balana disaipolo tupa lamawuato, Goteto wandakali tipia yakama moyo ando ateya-ko. Yakama epelewa atape-pene leaipia. 21 Ulia nonowa ateyai wandakali yakama matili ulia no embowa atolo-peyaiko. Yakama epelewa atape-pene. Ai lo ateyai wandakali yakama matili epelewa giwawa atolo-peyaiko. Yakama epelewa atape-pene. * Lap 7:16-17; Sam 126:5-6; Ais 61:3 22 Yakamato Akalina Iwanane oko bilipi lo atolai-kola, wandakali minditupa-mane yakama towa yataka andane wete wato, yakama ando meke pua, yakamana gene minu koyolo-peyai. Wuane puato, utupane-mane yakama nanima towa atu ata napimakale lo peyo watolo-peyai. * Jo 15:18-19; 16:1-4; 1Pi 4:14

23 Wamba wandakali utupanena yumbane tupamane potopesa akali tupa minu koyainipia. Wuane pua teke andipa wandakali utupane-mane yakamapi minu koyaindo, yakama epelewa atape-pene. Yakamato Akalina Iwanane oko bilipi lo atolai-kola, wandakali-mane yakama minu koyaindo, matili yakama ati kenga yuu epene okona polai-angi, Goteto yole andane mindi yakama gulupeya nembo toto, yakama epelewa atalapape.

24 Yakama epelewa atolopeyai tekeko, minditaka kambua yatawa ateyai wandakali yakama matili minditaka mindi mia napulu-peyama nembo toto, yakama mini kendawa atape-pene. Tomo kambua akenane yo peakale lo no ateyai wandakali yakama matili ulia nonowa atolo-peyama nembo toto, yakama mini kendawa atape-pene. 25 Epelewa, giwawa ateyai wandakali yakama matili mini kenda wato, ai lo atolo-peyama nembo toto, yakama mini kendawa atape-pene. 26 Wamba wandakali pitaka-mane owato potopisa tupana gene tupa laiyu lo ateaini pua, andipa wandakali pitaka-mane yakamana gene tupa laiyu lo ateaindo, yakamapi owato potopesa akali ateyama lo mini kendawa atape-pene. Jisasato wuane leaipia.

27 Wuane lalu, Jisasato balana pii alewa ateaini wandakali tupa lamawuato, yakamana yanda-pene tupa towa epelewa, yamapane yo atalapape leaipia. Wandakali mindimane yakama towa yamapane koo paleando, yakamato mana epene mindi wato minu, bala moyo atalapape. 28 Wandakali-mane yakama ando pii koo mindi leando, yakamato utupane moyo pote lalapape. Wandakali-mane poto loto, Goteto yakama minu koyakale leaindo, Goteto utupane moyakale lo yakamato pote lalapape.

29 Akali mindimane nimbana wakenanenga peleando, yangisa wetete peleakale lo, nimbato mopeke lape. Akali mindimane nimbana sakesa oko meando, nimbana singilisa oko wetete meakale lo ando kondape. 30 Wandakali mindimane minditaka mindi nimbanga gii lo tee leando, nimbato okone maipe. Wandakali mindimane nimbana minditaka mindi meando, nimbato ole kambuanga yano peyo gii laa apo naene kondape. 31 Wandakali tupamane yakamanga mana epene mineakale nembo tolai pua, yakamatopi utupanenga mana epene teke minu atalapape. * Mt 7:12

32-33 Wandakali mindimane koo piyaini wandakali tupa towa epelewa yamapane yo ateando, koo piyaini wandakali utupane-mane bala towa epelewa yamapane yo atalaini teke. Wuane pua teke, wandakali yakama towa epelewa yamapane yo atalaini tupa towa angu yakamato epelewa yamapane yo ateaindo, apito yakama ando, kuai lo peyai lolo-peyape. Wandakali mindimane koo piyaini wandakali tupa moyoyale, mana epene mindi mineando, koo piyaini wandakali utupane-mane balapi moyo, mana epene teke minalaini. Wuane pua teke, yakamato wandakali yakama towa mana epene minalaini tupa angu moyoyale, mana epene mineaindo, apito yakama ando, kuai lo peyai lolo-peyaipe.

34 Koo piyaini wandakali tupanena yangone tupamane minditaka mindi matili yakama geakale nembo toto, utupane-mane yangone utupanenga yano maiyaini. Wuane pua teke, yakamana yangone tupamane minditaka mindi matili yakama geakale nembo toto, yakamato yangone utupanenga yano mai-yaindo, apito yakama languato, yakamato kuai lo peyai lolo-peyaipe.

35-36 Gote ati kenga ateya okomane bala lo bilipi leyama nayu na-lalaini wandakali tupapi, koo piyaini wandakali tupapi, utupane pitaka ondo wato moyalane. Yakamana ayiane ati kenga ateya okomane wandakali tupa ondo alane pua teke, yakamato wandakali yangone tupa ondo wato moyo atalapape. Wuane puato, yakama towa yanda-pene wandakali tupa towa epelewa yamapane yo atoto, utupanenga mana epene tupa minalapape. Dee, matili wandakali mindimane yano peya-geakale nembo toto, minditaka mai napene, mee moyo maiyapape. Yakamato Gotena ondo ene mana okone wato mineaindo, yakama balana andopane gulo atoto, matili yakamato yole andane wete mindi molopeyai. Jisasato wuane leaipia.

37-38 Wuane lalu, Jisasato pii mindi tako pua loto, yakamato wandakali yangone mindinga mana minulai pua teke, Goteto mana okone teke yakamanga minulu-peya leaipia. Yakamato minditaka epene tupa nuu andane mindina tumbi laya wato, wandakali mindi mayaindo, Goteto minditaka epene tupa nuu okonepene teke mindina tumbi laya wetete wato, yakama gulupeya-ko. Yakamato minditaka epene kambua wandakali yangone tupa maiyapape. Yakamato kenda-pene mindi wandakali waka tupanga yata nayaindo, Goteto kenda-pene mindi yakamanga yata naolo-peyako. Wandakali yangone tupamane mana koo mindi yakamanga minulai-kola, paini yakamato kenda-pene mindi utupanenga yata na-alapape. Yakamato wandakali yangone tupana koo tupa apia-maiyaindo, Goteto yakamana koo tupa apia-gulupeyako. Yakamato utupana koo tupa apia-maiyapape. Yakamato wandakali yangone tupa koo ya lo yapa lo tale napeaindo, Goteto yakamapi koo ya lo yapa lo tale napulu-peyako. Yakamato utupane koo ya lo yapa lo tale na-piyapape. Jisasato wuane leaipia. * Mt 6:14; Mk 4:24-25

39-40 Wuane lalu, Jisasato pii kokoli mindi wandakali utupane lamawuato, mana kambua tisa tupanga eya-kola, mana aŋako teke sukulu-pai tupanga yalane leaipia. Wuane tekeko, matili sukulu pai mindimane mana kuai lo mia koyo puato, bala tisa yale teke atolopeya. Wandakali lee koo mindimane lee koo yangone mindi asia andawa lokale nembo toto, atu peapindo, balato katulo asia okone kuai lo andawa lolo-peyape. Jia. Wandakali okonelapo lapotaka kundu mindina ayia peyolo-peyapi. * Mt 10:24-25; 15:14

41 Nimba amene mindina lenenga lee kunu aŋako mindi eya-kola, nimbato okone andoto, mo apokale lalene tekeko, nimba tanena lenenga ita palaŋa andane mindi eya-kola, nimbato okone mo apokale nembo natalene. Anu peakale nimbato wuane pilinipe. 42 Nimbana lenenga ita palaŋa andane eya-kola teke, anu peakale nimbato ita palaŋa okone anda napene atoto, nimbana amene oko lamawuato, amene, nimbana leenga lee kunu eya oko nambato mo apia-gua lalenepe. Wandakali-mane nimbana pii okone ale wato, nimbanga koo mindi naeya nembo teakale nayuto, nimbato wuane lele. Nimbana lenenga ita patepane andane mindi eya oko nimba tane wamba ini mo apiape. Apialu, nimba lee epene atoto, nimba amene okona lee kunu yola oko katulo mo apolopele. Jisasato wuane leaipia.

43-44 Wuane lalu, Jisasato pii mindi tako pua loto, ita gulu ani atene mindina yomboto dini mindi lia napiyane leaipia. Eyaka ikilimbu mindina butusa dini mindi lia napiyane teke. Wandakali-mane ita dini lula tupa andoto, ita oko epene ya, ita oko koo ya lo yapa lalaini. Ita epene mindinga dini koo mindi liya napiyane. Wuane pua teke, ita koo mindinga dini epene mindi liya napiyane. Wandakali mindimane minditaka mindi nembo tatawa atolane okone teke pii kambua lalane. 45 Wandakali epene tupana nembo-tene epene kambua paleya-kola, utupane-mane pii epene teke kambua lalaini. Wandakali koo tupana nembo-tene koo kambua paleya-kola, utupane-mane pii koo kambua teke lalaini. Jisasato wuane leaipia.

46-49 Wuane lalu, Jisasato pii mindi tako pua loto, akali mindimane namba ateyonga epoto, nambana pii oko alewa, wato minalane wandakali okone bala wua pene atalane loto, nambato pii kokoli mindi yakama langeyo-ko. Yakamato ale alapa leaipia. Akali mindimane balana anda puyale ato, anda pingina tai ateakale loto, yuli tombama nenanga peaipia. Tombama poto, anda pingina okone duli lo ate loto, anda okone pikoyo peaipia. Matili ipa lii andane mindi lua awua epoto, anda okone peyo keao loyale peane tekeko, anda pingina tai ateane okonemane anda okone duli lo minea-kola, ipa lii epeane okomane anda okone katulo lai naleaipia. Akali waka mindimane balana anda puyale anda pingina mindi ate laa napene, balana anda oko mee peaipia. Matili ipa lii andane mindi lua awua epoto, pingina ata napene anda okone pelea-kola, anda okone kapoyale lai leaipia. Anda okone koyane pua teke, nambana pii oko ale wato, wato mina na-piyaini wandakali tupa koyolo-peyaiko. Anu peakale yakamato mee pii-mane angu, namba ando Akali Andane, Akali Andane lo atoto, nambana pii leyo tupa wato mina na-piyainipe. Jisasato wuane leaipia. * Mt 7:21-22