1 Malamala fotini gahegedi tu Yelusalema againe galaka-havagi tu hida tovai-nadi Banabasi buye alaka. Kadu Taitasi buye ganauwena. 2 Gana faꞋina Yaubada agaikuya gihawavemogatala vaita gidalubodaku ganana. Gana Yemesa Yoni Fita kadu ekelesiya ana tonagona velugadiyao higa badi vaita adi waegana buye avagaꞋauta be VenuwaꞋata Yamumuna ana nuwanuwa tulina tulina badi keke miYuda tu yoꞋo tulidiyao kalivai-dina galulumamaledi-ma tonagona agaidiya gaꞋawatalatalainedi. Badi tonagonagaga galukahihiyedi faꞋina nuwanuwaku gavaimi gavaimi gavehavehawala ma hinahalamanena. Keke nuwanuwaku hinahawataku be yaku faisewa yaku waꞋidibumuhiga boi gafaisewana kadu adamoya gafifaisewana-ma ginahavaini-yo guwana keke. 3 Au yaku faisewa hihawaveyamumuyena ada Taitasi givebwaꞋuliyeku-ma faꞋine keke tamo gavaimi hidagahe. Higa bana keke kwanamiYuda au kwanamiGilika faꞋina Yaubada yana iyaꞋiyaya bana wowone boi keke hidatomogolohini. Bana kwanamiGilika nonogana ana tomogolota faꞋina keke hidavehimeya. 4-5 Tu miYuda tufoidi Taitasi mena ana tomogolota faꞋina higaheyaꞋayaꞋala tu ime keke-moꞋa adavenogaleni. Badi kalivai-dina hiveꞋalololo vaita badi Yesu ana tovetumagana, ada taudiyao yadi nuwanuwa Yesu ana vetumaganasebaseba againe hikeva-yo yada yoꞋo agaidiya hiluku be hinanogalayavaga. Boi Mosese yana vehimeya dibune kamiyami-yo gilubodada be ana nuwanuwa tulina tulina kadamuliyena faꞋina ide vaita yogoyogonideyao kadamiyami. Tu adamoya Yesu Keliso buye kaveꞋatutamoꞋaida-yo ada aiyauga kanuhagana be Mosese yana vehimeya agaideya gihavaina. Atu badi toveꞋalololo ime tonagona agaimeya hiluku be ama aiyauga hinanogaliyavagina. Nuwanuwadi Mosese yana vehimeya ana idibumuhiga againe hinaveꞋagetogema. Tu keke nuwanuwama vehimeyai-nadi ana muliya be Yesu ana vetumagana hinaveꞋatutamoꞋaini-yo VenuwaꞋata Yamumuna ana nuwanuwa velemoꞋena hinakivilavilani be omi Galesiya tovetumagana yoꞋo tulimiyao kalivai-mina amanadi nuwami hinakivegafoꞋuyaꞋuyani faꞋina keke-moꞋa adavenogaledi.

6 Tu badi vaita kikaiwabudiyao adi waegana ma yaku laumamala VenuwaꞋata Yamumuna faꞋina keke mali nuwanuwa hidaveꞋatutamoꞋaini. Mena gahawavekikaiwabuyedi tu boi gavaimi gavaimi yadi kaiwabu ma iya keke gadanuwenuweni. Yaubada keke kaliva ada ita faꞋina gidahawavekikaiwabuyeda. Au giꞋitada leleleya. 7 Badi kikaiwabudiyao keke vaita mali vehimeya hidaveleku. Au aku vehimeya Yaubada giveleku-ma hiꞋitahalamanena. Bana Fita Yaubada yana VenuwaꞋata Yamumuna badi miYuda agaidiya ginalumamalena ma hidedemi ana vehimeya givelena amine, meda iya VenuwaꞋata Yamumuna omi yoꞋo tulimiyao kalivai-mina agaimiya ganalumamalena ma vehimeyai-nadi giveleku. 8 FaꞋina Yaubada Fita gifaiwalavelena be afositolo adi maka miYuda faꞋidiya giꞋabina amine, meda iya gifaiwalaveleku be afositolo adi maka yoꞋo tulimiyao kalivai-mina faꞋimiya iya gaꞋabina. 9-10 Au hidedemi aku vehimeya Yaubada giveleku-ma hiꞋitahalamaneni-yo Yemesa, Fita be Yoni, badi vaita ogola amine toꞋekelesiya matadiya amanadi, nimadi hitunena be buye aveꞋanimasaibutu, higahe higayo, “Yaubada yana faisewa againe omi ime amine. Gilubodami be omi yoꞋo tulidiyao hinafadiya wanafaisewa tu ime yada yoꞋo miYuda hinafadiya anafaisewa. Tu yama veꞋoꞋola saꞋeyanaga. Yama koyokoyo wavebutu wanuwenuwedi-ma adi nuwanuwa againe keke wanaꞋilova.” Au hidedemi higahe. Tu iya nuwanuwaku lakahina koyokoyo adi nuwanuwa. Af 15:1,24 Af 10:34 Af 11:29-30

11 Tu tova saꞋeyana Fita Anidiyoka melala againe gilakayemu ada yana dewa saꞋeyana keke-moꞋa hagihagina faꞋina, gagahelumatana. 12 Gilakayemu hidede amine. MiYuda ama hawata saꞋeyana wahalamanena higa ime keke omi yoꞋo tulimiyao kalivai-mina buye kadaꞋauꞋa. Fita Anidiyoka againe gimidiꞋela ana toveya, yoꞋo tulidiyao kalivai-dina buye hiꞋauꞋa, tu Yemesa tobohiyaneyao miYuda tufoidi giꞋiveninisedi-ma Yelusalema againe hitauya be hilakayemu ana toveya, Fita givebutu giyewana be yoꞋo tulidiyao kalivai-dina gimiyavehailedi. MiYuda tovetumagana Yelusalema hitauya-ma tufoidi au ana hawata aimo hiꞋitaveꞋavina kadu higahe vaita yoꞋo tulidiyao tovetumaganai-dina gilubodadi be wowodi ana tomogolota hidavaina. Fita yadi nuwanuwa keke gidaꞋitaveꞋavini faꞋina gimatausedi be yoꞋo tulidiyao gimiyavehailedi. 13 Meda miYuda tovetumagana Anidiyoka againe himiyami-ma hivebutu Fita amine hinuwanuwaluga be himiyavehailedi. Ada keke badiꞋiyaogaga au kadu Banabasi buyeꞋi yadi nuwaluga againe hinuwaꞋabiyena.

14 Tu iya VenuwaꞋata Yamumuna ana nuwanuwa velemoꞋena ana eda againe keke hidanauna ma gaꞋita-yo kaliva moyaꞋaidi matadiya Fita gagahelumatana gagayo, “OꞋeni kwanamiYuda. O kwanamiYuda nonogana keke miYuda ada hawata amine udahuluva, au badi yoꞋo tulidiyao yadi dewa amine uhuluva. Kadu gavadi-yo adamoya miYuda yada dewa amine uyewa-yo vaita yoꞋo tulidiyao kalivai-dina ya dewa againe abaꞋita udavehawaledi udagayo, Omi yoꞋo tulimiyao kalivai-mina Yesu againe wavetumagana-ma gilubodami be ime miYuda ama vehimeya ama hawata tulina tulina agaidiya wadamiyami. Hima weꞋa keke hagihagina agaikuya. Af 11:2-3

15 WaꞋita, Mosese yana vehimeya yoꞋo tulidiyao agaidiya keke gidadauda faꞋina kavewagadi tokoyona. Tu ide keke tokoyona badi yoꞋo tulidiyao kalivai-dina keke adi wavehimeya amine. Au ide katubuga miYuda ada wavehimeya. 16 Katubuga miYuda nonogana kahalamanena kaliva yada yegayega keke Mosese yana vehimeya ana idibumuhiga againe kadavaini, au Yesu Keliso ana vetumagana againe kavaina. Medema faꞋina kadu ide miYuda Yesu Keliso againe kavetumagana be Yaubada yada vetumagana Keliso againe faꞋina giseda yegayegadeyao Bana matane. Mena yada yegayega keke Mosese yana vehimeya ana idibumuhiga againe kadaleleni, faꞋina keke tamo hakwadi vehimeyai-nadi ginaꞋidibumuhigeni-yo Yaubada ginaseni yegayegana Bana matane.

17 Kadu ganagahe. Yada yegayega Keliso againe kalelena, higa Keliso buye kaveꞋatutamoꞋaida-yo Yaubada giseda yegayegadeyao Bana matane. Yada yegayega keke vehimeya ana idibumuhiga tu Keliso ana veꞋatutamoꞋaina againe kalelena faꞋina, vaita kadagayo, Vehimeya tulina tulina ana idibumuhiga keke akufaiweya, ada au badi yoꞋo tulidiyao keke adi wavehimeya ma adi ita vaita tokoyona amine, meda ide miYuda ada ita vaita tokoyona amine gilakayemu. Hida gavaiyami? KaꞋi ana nuwanuwa vaita Keliso dewa koyona againe gidanuwaꞋabiyeda? Keke, keke-moꞋa! 18 WaꞋita, boi yada yegayega ana nauhaga vehimeya ana idibumuhiga againe ma nuwanuwai-nadi kakilowena. KaꞋi adamoya kadavebutu vehimeya ana idibumuhiga againe yada yegayega faꞋina kadaluveꞋavina-havagi digo, ide tokoyona velemoꞋena ma kadaseyemaunena, faꞋina vehimeya ana idibumuhiga keke adafaiweya. 19-20 Tu yaku yegayega vehimeya ana idibumuhiga againe aimo keke gadaleleni faꞋina, yaku miya hidede amine. Iya gaꞋalika be vehimeyai-nadi agaikuya gihavaina, higa vaita wayawaiku ivaguna gamimiyami be Yaubada againe gahawahege-vagahiku. Hida gaꞋalika ma gavaiyami? Yesu keloseya hitutuvefosena ana toveya, kadu iya tuwaina yaku nuwanuwa koyona againe gamiyami-ma kalivai-kuna keloseya gaꞋalika. Yaku miyami tuwaina gihavaina tu adamoya keke tauku yawaiku againe gadamiyami, au Keliso Tauna nuwahinagekuya gimimiyami-ma yawaine gamimiyami, BanaꞋe agaikuya ginuwanuwa-yo iya faꞋikuya Tauna gihawahegena amanadi. 21 KaꞋi yaku yegayega faꞋina vehimeya ana idibumuhiga againe gadaluveꞋavina digo, medema ana ita vaita Yaubada yana nuwadoga gadakiloweni vaita gaitoma-kawowo. Tu iya keke-moꞋa ganakiloweni. KaꞋi vehimeya ana idibumuhiga againe yada koyona ana laufata ana aiyawela kadanuhagana digo, Keliso gidaꞋalika-kawowo.” Au hidedemi ganuwenuwemi tu gagahe. Lo 3:20-28, 11:6 Lo 6:6, 7:6, Yo 13:1, Ga 1:4