Folo yana leta EFESO tovetumagana agaidiya
Folo Loma deliya gimiyami tu leta fowa giꞋetoladidi, higa tovetumagana adi yoꞋo Efeso Filifai Kolosi agaidiya kadu saꞋeyana bana Filimoni againe. Hida miEfeso yadi leta giꞋetoladina be higa nagona miEfeso hinahawana tu muliya ekelesiya melala tulina tulina agaidiya leta ginanuwaliliuga.
Efeso melala kikaiwabuna Esiya ana fafaliya. MoyaꞋaidi lukimokimone againe hihawahege-moꞋedi, ada yadi viviluwa kwamayoku Atemisa, ana egana velugana Daiyana, yadi manuwa-tafalolo lakahi-moꞋena gavavewaga Efeso againe gidauda. (Afositolo 19:27)
Folo yana lumamala-waliliuga anavelu againe Efeso againe sabati saꞋeyana miYuda gilumamaledi. (Afositolo 18:18-21) Tu yana lumamala-waliliuga anaveto againe Efeso againe gimiyami givehavehawala malamala tohiye. (Afositolo 19)
MiEfeso yoꞋo tulidiyao kalivai-dina tu kadu miYuda tufoidi medede againe himiyami. Ada hida leta ana nuwanuwa lakahina ma Keliso miYuda kadu yoꞋo tulidiyao giꞋivesaꞋeyadi, higa tova adamoya ide gaveyao Keliso buye kaveꞋatutamoꞋaida medema ada yoꞋo saꞋeyana. Folo ekelesiya gaitoma tohiye agaidiya giluvefosedi, higa ide Keliso wowona tu Bana uꞋuda, kadu ide yana manuwa-moꞋena tu Bana manuwai-nadi ana holiliꞋabi, kadu ide vaita vavinena amine tu Bana moganeda. Leta dobona hidede amine.
Lusiule. 1:1-2
Yaubada yana nuwadoga kadu Keliso be ana tovetumagana yadi veꞋatutamoꞋaina faꞋina. 1:3-3:21
Tovetumagana yadi nuwanuwa saꞋeyana hinamiyami. 4:1-16
Dewa uyuꞋuyuyuna hinavenikohiyena. 4:17-5:20
BonaꞋabi veꞋahawahawahega adi yoꞋo hinagediya gilubodadi. Kaliva wavavinena 5:21-23 WeꞋoweꞋo 6:1-14 Agetoga 6:5-10
Keliso yana faiwaleya Setani ahenao hinalugaviyadi. 6:11-20
Lukafoi. 6:21-24
1
1 Yo siule tobohiyakweyao moyaꞋaimi Efeso againe. Iya Folo Yaubada givegideku be Yesu Keliso yana kabu gavaina, higa yana afositolo adi maka giveleku. Omi Yaubada yana yoꞋo mahamahalimiyao Efeso againe yami leta gaꞋetoladina be wanaꞋitana. Omi higa Yaubada yana kaliva yana vevine mahamahalimiyao kadu Yesu Keliso againe wahawahegemi be wamiyamiyaveꞋavina. 2 Yaubada Tamada kadu Kaiwabu Yesu Keliso hinanuwadogemi kadu aseꞋasemi hinakiveniwalovina. Af 18:19-21, 19:1-40, 20:17-38
Yaubada yana vevai ide Keliso buye kaveꞋatutamoꞋaida-ma
faꞋideya.
3 BanaꞋe yada Kaiwabu Yesu Keliso yana Yaubada kadu Tamana amanadi kanahawadavadavana. FaꞋina lobama ana lokolokofou moyaꞋaina aluꞋaluwada yana miya hagihagina faꞋina gihawahegena be ide Keliso buye kaveꞋatutamoꞋaida-ma ginuwadogeda. Yaubada hidede amine ginuwadogeda faꞋina kanadavadavana. 4-5 Boi tuwai-lokalokana aimo babi keke gidabubuni ana toveya, Yaubada ide gaveyao Keliso buye kaveꞋatutamoꞋaida-ma ahe giluwafada be higa mahamahalideyao kadu keke ada wavita Bana matane kanamiyami. Ada nuwakabubu faꞋina tuwai-moꞋena givegide-vagahida be Yesu Keliso yana ihagihagi againe ide Bana natuneyao amine ginafayayeda. Bana Tauna yana inuba hagihagina faꞋina, au hidede amine givegide-vagahida be higa ginahawavenatuneda. 6 Mena yana nuwadoga lakahi-moꞋena againe ide Bana NatuꞋaseꞋasena buye kaveꞋatutamoꞋaida-ma ginuwadogeda be higa Bana ana egana kanakilakahina kanagayo, “Ho Yaubada, ya nuwadoga keke kanawona!”
7-8 Tu ide Keliso buye kaveꞋatutamoꞋaida-ma ada aiyauga kanuhagana. Yada dewa koyona faꞋina yogoyogonideyao kamiyami tu Keliso dayagine gitutuvehobuda, higa yada koyona ana laufata Bana giseni tu Yaubada yada koyonai-dina giyawelidi. Mena ada tutuvehobu ma yana nuwadoga lakahina ana iyaꞋiyaya, ada au yana nuwadoga ide agaideya givetalaiyena-ma gavatubuga! Hidede amine ginuwadoge-moꞋeda be nuwahuya tulina tulina kadu Yaubada ana halamana againe kawahivemavemauga. 9 Boi tuwai-lokalokana Yaubada Tauna nuwahinagene ginuwanuwa be givevai, ada mena yana nuwahinage boi sevasevauyana ma ide agaideya gihawavemogatalena. Bana Tauna yana inuba hagihagina againe Keliso faꞋina givevai. 10 Ada yana vevai hidede amine. Yana aibubuna matatabuna tomiyalobama kadu tomiyababi ginavagaꞋauhida-yo kanavesaꞋeya be uꞋuda saꞋeyana, higa Keliso. Ada gaitoma moyaꞋaina adi aituha hinaluyabuna be tova gilubodana-ma ginalakayemu amine, Yaubada gaitoma moyaꞋaina ana vesaꞋeya Keliso dibune faꞋina gavaimi givehimeya, mededemi ginafaisewa. Yo 15:16, 2Te 2:13, Ef 5:27 Ef 2:7
Yaubada AluꞋaluwa Mahalina againe gisetagoda.
11 KaduꞋe, Yaubada ime Keliso buye aveꞋatutamoꞋaima-ma yana lokolokofou higa yana yoꞋo faꞋina giluwafama. E, boi tuwai-moꞋena yana vevai amine ime yana lokolokofou faꞋina givegide-vagahima. BanaꞋe gaitoma moyaꞋaina givehimeyedi, ada Tauna yana inuba kadu yana vevai amine hilakayemu. 12 Ada au yana inuba kadu yana vevai amine givegide-vagahima be Yaubada yana kikaiwabu yama dewa hagihagina againe anayemaunena be kaliva hinaꞋitadavadavana, ime Yaubada yana Tovegida Keliso yana hobuꞋela faꞋina yama wavetumagana amaduvebutu alulauboda kalivai-mana. 13 Kadu omiꞋiyao meda anafaiweya laumamala Yaubada yana nuwanuwa velemoꞋena faꞋina, higa ami kibababala ana VenuwaꞋata Yamumuna wanogalini-yo Keliso wavetumaganena. Keliso againe wavetumagana be Yaubada AluꞋaluwa Mahalina againe gikibwami higa AluꞋaluwana giꞋiveninisena be givemagami, boi tuwaina giwonadabadaba vaita yana yoꞋogaga agaidiya ginahawahegena amine. 14 Bana AluꞋaluwa Mahalina ma vaita Yaubada yana kibwa ide agaideya amine, kadu kaliva kwamayoku gisetagona amine Yaubada AluꞋaluwa Mahalina nuwahinagedeya gisena be gisetagoda, higa vaita gavaimi yana lokolokofou moyaꞋaina ada duꞋu faꞋina giwonadabadaba, mededemi aimo ide agaideya ginasevefofona. AluꞋaluwa Mahalina againe gisetagoda be higa aimo ide Tauna yana yoꞋogaga ada tutuvehobu ginaluyabuni-yo ada aiyauga-vagata kanavai-Ꞌowona. Hidede amine Yaubada AluꞋaluwa Mahalina againe gikibwada, kadu aimo ada tutuvehobu faꞋina gisetagoda be higa yana kikaiwabu kaliva hinaꞋitadavadavana. Ef 4:30 2Ko 1:22
Folo giveꞋoꞋola be Keliso yana kikaiwabu
hinahalamane-hagihagiyena.
15-16 Tu mena Yaubada yana nuwadoga lakahina yana yoꞋogaga agaideya faꞋina, tova moyaꞋaina Yaubada againe gavesiule omi faꞋimiya. Boi nagona yami vetumagana Kaiwabu Yesu againe kadu yami nuwanuwa hawahawahegana tovetumagana moyaꞋaidi faꞋidiya mena valeyami gamidinogalina againe, gavebutu omi faꞋimiya gavesivesiule kadu keke gadaꞋilova, au yaku veꞋoꞋola againe tova moyaꞋaina ami egana gayakayakahina. 17 Tova moyaꞋaina gaveꞋoveꞋoꞋola be yada Kaiwabu Yesu Keliso yana Yaubada, higa Tamada Tokaiwabu-moꞋa, tagami ginakifolefolena. GaveꞋoveꞋoꞋola be AluꞋaluwa Mahalina againe tagami ginakifolefolena kadu nuwami ginakiyauna be Yaubada ana halamana agaimiya ginakabu-faꞋila. 18-19 Kadu gaveꞋoꞋola be matami ginakivemahalina be higa Yaubada yana nuwanuwa omi faꞋimiya wanahalamane-hagihagiyena. Yana nuwanuwa hidede amine. SaꞋeyana wanahalamanena ma Yaubada givegidemi be aimo omi faꞋimiya gavaimi yamuyamumu-Ꞌowogina ginaga-ma faꞋina walulauboda. Kadu saꞋeyana ma Yaubada gaveyao moyaꞋaida yana kaliva mahamahalideyao, medema agaideya yana lokolokofou moyaꞋaina ada duꞋu faꞋina giwonadabadaba, ada mena duꞋu-nadi ana kikaiwabu gavatubuga! Kadu Yaubada yana faiwala lakahina ide tovetumagana agaideya keke tamo gavadi againe kanahawaluveluveni. Mena yana faiwala lakahi-moꞋena, Keliso yana mididi-havagi againe giyemaunena ana tubuga amine, meda ide tovetumagana agaideya giyemayemaunena.
20 E, Yaubada gifaiwala-moꞋa be Keliso alikeya gisivemididina, Tauna iꞋatagine lobameya givehiyotona. 21 Wese lobama getane-moꞋane givetoga be gikaiwabu-moꞋa. E, tokikaiwabu kadu tovehimeya kadu tofaiwala kadu kauveya tulina tulina gikaiwabuhege-moꞋedi. Kadu Bana ana egana lakahi-moꞋena, ada gaveyao moyaꞋaidi adi egana kaliva hikikilakahina, medema Yesu gikaiwabuhegedi, ada keke vaita hida tovagaga againe gidakaiwabuhegedi, au kadu aimo tova mulina buyeꞋi. 22-23 Kadu Yaubada gaitoma moyaꞋaina Keliso agevavane gisedi, ada Bana gaitoma moyaꞋaina adi tovehimeya ma ide tovetumagana ada yoꞋo Bana anakaibe ada toꞋitaveꞋavina faꞋina gisena, higa ide tovetumagana vaita Keliso wowona amine ada BanaꞋe Tauna ma uꞋuda. Ada ide vaita wowona amine ma uꞋuda Keliso kaluyabuna, tu BanaꞋe Tauna gaitoma moyaꞋaina givemagadi, au lobama be babi be ide buye givemaga-moꞋeda be giluyabuda. Kl 1:4-11 Hi 1:3,13 Kl 2:15, Fl 2:9-10 Kl 1:18