Folo yana leta anavelu TIMOTI againe
Hida Timoti yana leta anavelu Folo Loma deliya gimiyami tu giꞋetoladina. Yesu ana laumamala faꞋina deliya hise-havagilena, ada Folo ana luveꞋalika ana tova giluvedaꞋufo ma giꞋayaunena tovai-nadi giꞋetoladi.
Bana Timoti Folo ana toveluga higa Efeso tovetumagana adi yoꞋo giꞋitaveꞋavidi, kadu vaita Folo natuna amine Yesu yana yoꞋogaga agaidiya. Hida leta againe Folo yana nuwanuwa lakahina Timoti againe giyakahina, kadu gigahevagadonena be veꞋumagigi agaidiya ginaꞋatuvefaꞋila ada vehawala tunutunugina againe ginaluveꞋavina. Leta dobona hidede amine.
Timoti ana lusiule. 1:1-2
Folo Timoti yana vetumagana faꞋina givesiule. 1:3-7
Timoti yana waꞋidibumuhiga yana waꞋatuvefaꞋila ana vehimeya gidaꞋitaveꞋavina. 1:8-2:13
Keliso yana tofaisewa ana iyaꞋiyaya faꞋina. 2:14-26
Tova ana lauyabu againe kaliva hinakoyo-moꞋa. 3:1-9
Timoti ana vehimeya faꞋina Folo yana kivetuvetunu kadu yana agoꞋabi ma. 3:10-4:5
Folo tauna ana ayauna yana nuwanuwa ma. 4:6-18
Lukafoi tulina tulina. 4:19-22
1
1-2 Yo siule natunuwaku Timoti. Iya Folo Yesu Keliso yana afositolo ya leta gaꞋetoladina be unaꞋitana. Bana Yaubada givegideku be Yesu Keliso yana kabu ganavaina, higa yana afositolo adi maka giveleku. Boi tuwaina giwonadabadaba vaita kaliva gaveyao Yesu Keliso buye hiveꞋatutamoꞋaidi, medema yawai-vagahidi hinuhagana, ada mena yana wonadabadaba faꞋina giꞋiveniniseku be galulumamalena. Yaubada Tamada kadu Yesu Keliso yada Kaiwabu hinanuwadoge hinahinekalikaliye kadu aseꞋase hinakiveniwalovina. 1Ti 1:2
Folo Timoti yana vetumagana toyogina ginuwenuwena.
3 Keke gavana faꞋina tu Yaubada againe gavesivesiule. BanaꞋe againe badi bwanenekweyao hihawahegedi amine, meda iya gahawahegeku be Bana faꞋine nuwafouku yegayegana gafififaisewa-yo keke tamo gavadi koyona faꞋina gadamatauseni-yo gadavenuwanauna. E, Bana againe gavesivesiule tu tova moyaꞋaina bogi be uyadayada o faꞋiniya gaveꞋoveꞋoꞋola. 4 Boi ganuyabuyabu tu utagi ma ganuwa-nunauyena ada nuwanuwaku lakahina ganaꞋita-havagile be higa Iya ganavemwamwala-moꞋa. 5 Ya vetumagana toyogina Keliso againe ganuwa-nunauyena, anafaiweya nagona o hina Yunisi be tubu Loisi Keliso ana vetumagana againe hihawahege-vagahidi tu tova adamoya iya ganuwaveꞋavina vaita kadu o Keliso ana vetumagana againe uhawahege-vagahi. 6 Ada medemi Keliso uvetumagane-moꞋena faꞋina, nuwa gatalafolena be faiwala Yaubada yana faisewa faꞋina givele-ma unaꞋatuꞋauhina be keke ginakweꞋu, au a vehimeya givele amanadi againe unafaiwala-moꞋa. Boi nimaku againiya gaseni-yo gaveꞋoꞋole tovai-nadi Yaubada mena a vehimeya givele be yana faiwala unuhagana. 7 Au unafaiwala-moꞋa, faꞋina AluꞋaluwa Mahalina Yaubada giveleda-ma guwana keke matauta. Au Bana gifaiwalaveleda be kaꞋaseꞋasevatu, tobohiyadeyao faꞋidiya kahawahawahegeda, taudeyao yada nuwanuwa kahawahawatana. Af 24:16 Af 16:1 Lo 8:15
LauꞋage higa keke ginawowomumu au vehawala velemoꞋena againe ginaluveꞋavina.
8 Tu Bana gifaiwalavele faꞋina yada Kaiwabu ana hawavemogatala yoꞋo matadiya faꞋina keke unawowomumu. Kaiwabu ana laumamala faꞋina deliya hiseku tu iya yana kaliva yogoyogoniku faꞋikuya keke unawowomumu. Au tauni unahawahege be yada Kaiwabu yana VenuwaꞋata Yamumuna unalumamalena againe, iya amine meda o buye vita tulina tulina unawahidi. E, Yaubada ginafaiwalavele amine vitai-dina unawahidi. Lo 1:16 9 Bana Yaubada gikibababaleda ada gikovada be yada dewa matatabuna mahamahalina Bana matane kanamiyami. Ada kibababala inubana ma keke ide yada dewa hagihagina, au Bana Tauna yana nuwanuwa kadu Tauna yana nuwadoga faꞋina gikibababaleda. Tuwai-lokalokana tova aimo keke gidaveꞋinuba tu mena yana nuwadoga Yesu Keliso againe givele-vagahida. Ef 2:8-9, Ta 3:4-5 10 Atu tova adamoya ada Tokibababala Yesu Keliso yana hobuꞋela againe mena Yaubada yana nuwadoga kabuꞋavane giyemu. Bana Yesu Keliso alika yana faiwala giyawelina, giyaweli-Ꞌowona ada kibababala ana VenuwaꞋata Yamumuna againe yawai-vagahida ana eda gihawavemogatalena be kanamiyamiya-vagata. Hi 2:14-15 11 Ada au Yaubada givegideku be mena VenuwaꞋata Yamumuna ganalulumamalena kadu ganavehavehawala Keliso loseyanina amine yaku gahe waꞋinubana. 12 Tova moyaꞋaina VenuwaꞋata Yamumuna ana hawavemogatala againe gafififaisewa faꞋina, mena vita tulina tulina gawahiwahina. Tu yaku aulolo yaku tagiya faꞋina keke-moꞋa gadawowomumu, faꞋina BanaꞋe gavetumaganena-ma gahalamane-hagihagiyena, ada ganuwaveꞋavina vaita aku vehimeya giveleku-ma Bana anafaiweya ginayavayavana be hidede amine ginanunauwena Kaiwabu yana yewaꞋela ana toveya.
13 Au gavadi gavadi vehawala tunutunugina iya agaikuya unogalina, medema againe unaluluveꞋavina. Medema abaluvefota o faꞋiniya. Ada ya wavetumagana ya wanuwakabubu Yesu Keliso againe giveꞋinuba amanadi mena vehawala tunutunugina againe unaluluveꞋavina. Ta 1:9 14 Yaubada yana nuwanuwa tunutunugina ana vehawala mena a vehimeya givele. AluꞋaluwa Mahalina aseꞋasedeya gimimiyami-ma yana faiwala againe a vehimeya hagihagina unaꞋitaveꞋavina.
Tonuwayewa adiꞋiselu kadu toveluga saꞋeyana faꞋidiya.
15 Tu o uhalamanena tovetumagana moyaꞋaidi Esiya ana fafali againe hikiloweku, badi Fidelo kadu Hemodenisi buyeꞋi. 16 Tu bana Onesifolo tova moyaꞋaina aseꞋaseku gikikivevatuna ada iya deliya gamimiyami nonogana keke iya faꞋikuya gidawowomumu faꞋina, bana ana unuma agaidiya Kaiwabu yana hinekalikali gidavetalaiyena. 17 E, bana keke iya faꞋikuya gidawowomumu. Au Loma againe gilakayemu ana toveya yana wadibumuhiga gileleleku gileleleku tu ginuhagaku. 18 Medema faꞋina Kaiwabu gaveꞋoꞋolena be aimo ginayewaꞋela kaliva ginavedewayaugida ana toveya, bana Onesifolo Kaiwabu yana hinekalikali ginanuhagana. Ada oꞋeni ahe uhalamane-hagihagiyena yana veluga moyaꞋaina agaikuya boi Efeso againe gamiyami ana toveya. 2Ti 4:16