No Libro A Sepanyas
No Pakatonngan so Paytābwan no Nya
Si Sepanyas, ki asa propīta no Dyos do kapagāri ni Āri Josias. Do dāwri a chimpo, siraw tawotawo do Joda, ki mabaknang sa. Ki aran akmay minonot sa di ĀPO so manyid a chimpo (2 Āri 22-23), no oyod, ki tomnadyichokod sa dya, kan minonot sa dyirad didyosen saw. Dawa, inamomo sa no Dyos a dosāen na saw tawotawo do Joda kan do Jerosalem a maynamot do gatogatos da, ta chinaskeh daw magbabāwi. Maynamot do dyaya, rinārayaw dan taga Babilonya iyaw Jerosalem do tawen a 586 sakbay a naiyanak si Āpo Jesos.
Aran inamomo sa no Dyos a abohen naw tawotawo no Jerosalem, myan kari na dyira a do masakbayan, ki isalākan na sanchiw maychawpitaw do matatarek a nasnasyon, kan paybidihen na sanchi a bindisyonan so arwaro.
No Naychakarwan no Nya Libro
No kapangokom no Dyos siras tawotawo no Joda (1:1-2:3)
No kapangokom no Dyos so kadwan saw a nasnasyon (2:4-15)
No kapangokom no Dyos so Jerosalem (3:1-8)
No kari no Dyos a paybidihen na saw tawotawo na (3:9-20)
Sepanyas
1
1 Nyaw minsāhi a inpakatoneng ni ĀPO di Sepanyas a pōtot ni Kosi a pōtot ni Gedalyah. As si Gedalyah, ki pōtot ni Amaryas a pōtot ni Āri Hesekyas. Inpakatoneng ni Sepanyas nya minsāhi dyirad tawotawo no Joda kan Jerosalem do kapagāri ni Josiah* 1:1 No kapagāri ni Josiah, ki do tawen a 640-609 B.C. Maynamot ta adekey pa do kasiknan no kapagāri na (2 Āri 22:1), no pinakainawan na a mangitoray, ki siraw papādi kan opisyalis a nanda do tawen a 622 B.C. a pōtot ni Amon, as iyaw āri no Joda.
No Kapangokom no Dyos Siras Tawotawo
2 Bata ni ĀPO a kāna, “Otanen konchiw tābo
do hapot no tanaya.
3 On, abohen ko sanchiw tawo kan animal.
Otanen konchiw manomanok do tohos
kan siraw among do tāw
Homhomken ko sanchiw marahet.
Ponasen ko sanchiw tawo do hapotayan tana.
4 “Ilonat konchiw tachay ko a mangdōsa so tawotawo do Joda
kan no tabo a omyan do Jerosalem.
Ididen konchi do dya yanan aran maydedeng a nabidin dyirad Baal,
siraw papādi ni Baal, kan siraw papādi a tomnadyichokod di ĀPO.
5 On, ididid ko sanchiw maydogod do atep
a magdaydāyaw do araw, bohan, kan bitohen saw,
siraw maydogod a mangisapata so kapodno da di ĀPO,
ki magsapata pa do ngaran no dyos a Molek.
6 On, ididid ko saw tomnadyichokod do kawnot da di ĀPO
kan dyaw a maychichwas di ĀPO
mana dya mangdakdaw dya so sidong na.
7 “Magolimek kamo do salapen ni Āpo a DYOS,
ta iyaw arawaw ni ĀPO, ki masngen dana.
Si ĀPO, ki nangisagāna dana so sakripīsyo,† 1:7 Iyaw “sakripīsyo,” ki siraw tawotawo no Dyos. As “siraw naāwis na,” ki siraw kabōsor a mangdōsa anchi so tawotawo no Joda.
as intatārek na saw ināwis na.
8 Do arawaw a kapagsakripīsyo ni ĀPO,
dosāen konchiw opisyalis kan siraw pōtot no āri
kan siraw tabo maylaylay so akmas laylay dan gan-ganaet.‡ 1:8 Ta siraw maylaylay so komwan, ki tolāden da pa saw dadakay kan kapagdaydāyaw dan gan-ganaet.
9 Do dāwrinchi a araw, dosāen konchiw
tabo a homokso do dapyan§ 1:9 No nya dadakay, ki bata dan kadwan a yapo do 1 Samwel 5:4-5 a maynamot do Dagon a dyos dan Pilisteo.
a siraw mangapno so bahay no āmo da* 1:9 Mana “mangapno so timplo no dyos da”.
so kinaranggas kan kapagkosit.”
10 Bata pa ni ĀPO a kāna, “Do dāwrinchi a araw,
myan katanyis a madngey anchi
a yapo do mayngaran so Rowangan Among,† 1:10 No rowangan, ki do mangket do ammyānan no Jerosalem. Neh. 3:3
Myan dongdong-aw a yapo do Chadadwa a Distrito,‡ 1:10 Nya, ki masngen do Rowangan Among, kan bayobayo pa kan kadwan a partis no syodad. 2 Āri 22:14
kan kalebkeb a yapo do paytoytokonan.
11 Magdong-aw kamo a omyan do yanan dan paglākwan!
Tabo saw magnignigosyo nyowaw, ki mabo sanchi.
Tabo saw manatādi so pirak, ki mahanyib sanchi.
12 Do dāwrinchi, sohwan ko sa hanyiben do Jerosalem,§ 1:12 Prob. 20:27
kan dosāen ko sanchiw tawo a napnek do gatos da.* 1:12 Do Hebreo a chirin, ki kayarig naw kapamarin so palek a nainonolay so asoy a maypatokpoh so areg-eg.
Mangtokto sanchi a kon da, ‘Abanchiw parinen ni ĀPO
a maganay mana madi.’
13 Iyaw kinabaknang da, ki masamsam anchi.
Siraw bahay da, ki marakrak sanchi.
Aran mapatnek sanchi so bahabahay da,
ki omyan sabanchi daw.
Aran maymoha sanchi so obas,
ki maynom dabanchiw palek naw.”
14 “No arawaw a kapangokom ni ĀPO, ki masngen dana.
On, masngen kan īto dana.
Iyaw tanyis da do dāwri a araw ni ĀPO, ki taywara a makpad.
Aran siraw taga-gobat, ki iyagagay daw kaōpay da.
15 Iyaw nawri a araw, ki araw anchi no kasoli
a araw no kariribok kan kaynyin,
araw no marārayaw kan karārayaw,
On, araw anchi no sari kan liday
a araw no kakonem kan oltimo so kapaysāri.
16 On, araw a magtanggoyob kan katawag so gobat
a maikontra dyirad naahadan saw a syodad a akmay kōta
kan dyirad matohos saw a pagwanawanan.
17 “Iyangay konchiw riribok do tawotawo,
tan mayam sanchi a akma siras bolsek saw† 1:17Deot. 28:29; Isa. 59:10
maynamot ta naygatos sa di ĀPO.
Iyaw raya da, ki moyog a akmay ranom,‡ 1:17 Do Hebreo a chirin, ki “mapado a akmay ahbek”.
kan siraw bangkay da, ki maychawpit akmay tachi.
18 Aran siraw pirak da mana balitok da saw
ki makaisalākan sabanchi dyira
do arawaw no soli ni ĀPO.
Do kapangīmon no kasoli na a akmay apoy,
marārayaw anchiw intīro a tana,
ta nyiknyīnan a abohen naw
tabo omyan do tanaya.”
*1:1 1:1 No kapagāri ni Josiah, ki do tawen a 640-609 B.C. Maynamot ta adekey pa do kasiknan no kapagāri na (2 Āri 22:1), no pinakainawan na a mangitoray, ki siraw papādi kan opisyalis a nanda do tawen a 622 B.C.
†1:7 1:7 Iyaw “sakripīsyo,” ki siraw tawotawo no Dyos. As “siraw naāwis na,” ki siraw kabōsor a mangdōsa anchi so tawotawo no Joda.
‡1:8 1:8 Ta siraw maylaylay so komwan, ki tolāden da pa saw dadakay kan kapagdaydāyaw dan gan-ganaet.
§1:9 1:9 No nya dadakay, ki bata dan kadwan a yapo do 1 Samwel 5:4-5 a maynamot do Dagon a dyos dan Pilisteo.
*1:9 1:9 Mana “mangapno so timplo no dyos da”.
†1:10 1:10 No rowangan, ki do mangket do ammyānan no Jerosalem. Neh. 3:3
‡1:10 1:10 Nya, ki masngen do Rowangan Among, kan bayobayo pa kan kadwan a partis no syodad. 2 Āri 22:14
§1:12 1:12 Prob. 20:27
*1:12 1:12 Do Hebreo a chirin, ki kayarig naw kapamarin so palek a nainonolay so asoy a maypatokpoh so areg-eg.
†1:17 1:17Deot. 28:29; Isa. 59:10
‡1:17 1:17 Do Hebreo a chirin, ki “mapado a akmay ahbek”.