1 Si‐kak si Pablo ja makasolat niyay jet say kadẃak shiyay, si Timoteo, ja agi tayo shi pamati. Si‐kak, ebaloshak kabol ni naka pansilbi son Cristo Jesus. Sajay ya solat ko, para son si‐kam Filemon, ja epateg ga kait min kaontolong ni obda tayo. 2 Tan sajay ya solat, pabasam so nen Apia, ja biin agi tayo shi pamati, tan so nen Arkipo, ja etoled ja kait tayon emansilbi so nen Cristo, tan pabasam pay so nonta ira emesa‐sa‐nop shita baley mo ja emanshedjaw son Cristo.

3 Say shawat ko, sapay koma ta sota kaasi tan talna ja ẃara son si‐kayo ja edapo so nen Apo Shiyos ja Ametayo, tan edapo so nen Jesucristo ja Apo tayo, si‐katoy ma‐shoman.

4 No mansheẃatak so nen Apo Shiyos, takaka ida‐da‐kam ni olay; naka man‐iyaman son si‐kato ni olay pangkep son si‐kam, 5 ta shinemag ko ey ebadeg i semek mo so nonta ira kait mon emati, tan ebadeg pay i pamatim so nen Apo Jesus. 6 Jet say shawat ko so nen Apo Shiyos, sapay koma ta sota inpankagait tayo pangkep niya pamati son si‐kato, si‐katoy kabol la pengam‐amta‐an tayo pay ni maypangkep nonta ebadeg ga kaasi to son si‐katejon emati son Cristo. 7 Ebadeg i imdeng kon pasiya pangkep son si‐kam, agi Filemon, ta moka pekedsang i nemnem ira nonta kait mon emati, ja si‐katoy moka pengipa‐sas ni semek mo son si‐kara. Pati si‐kak pay ket kimedsang ngoy nemnem ko ni intenengan ko so niya maypangkep son si‐kam.

8 Si‐kak, ẃaray kanebengan kon mengikowan ni mesepol la dag‐en mo, ta apostol towak nen Cristo, 9 nem enshi, ekak osalen iyay ya kanebengan ko tep ensemek taka. Nem iyay et mango i sheẃaten ko son si‐kam, jet nemnem mo ey si‐kak, agpayson inbetkag towak nen Cristo Jesus ja mengitakshel son si‐kato, jet ebaloshak pay pangkep ni naka pengitosho shi totoo ni maypangkep son si‐kato. 10-12 Jet iyay sota kowan ko ey sheẃaten ko son si‐kam. Si Onisimo, ibetkag ko la ja on‐oli son si‐kam jet pangpangaasim, awat mo la koma. Si Onisimo, inbilang ko men singa anak ko med pamati, manipod niman na naybaloshak shiya badoran. Nontan da, mebedin na kowan mo ey enshiy silsilbi nen Onisimo son si‐kam, nem niman, mebedin na ibilang mo ey epateg, kasta met son si‐kak, ta ẃaray mebedin na itolong to. Singa entapik den mengibetkag son si‐kato, 13 ta piyan ko komen kadẃa‐en, ta ẃara pay i itolong to son si‐kak niman na kawashak shiya badoran. Amtak ey angken si‐kam ket baka kowan mo ngo ey angken meki‐iyan nin si Onisimo son si‐kak say ẃaray menodong son si‐kak tep amtam ey say kabol la naybaloshan ko ket sota naka pengitosho nonta mapteng nga shamag pangkep so nen Jesucristo. 14 Nem enshi, ekak koston ipeked, ta eg taka nin inbag‐an, ta say eg ka mepidit ta mengaasi son si‐kak, no diket dag‐en mo koma ja mandepod nemnem mo.

15 Sigosho, indekjas toka nin nontan da, ta plano ngoreshan nen Apo Shiyos ey no on‐oli da ket melked ma son si‐kam. 16 Nontan da, kowan tayo ey baga‐en bengat, nem niman ma, epateg ga agi tayo shi pamati son Cristo. Jet si‐kak, ensemek kon pasiya si Onisimo, jet sigosho si‐kam, mas pay ya sesmeken mo koma ey say sota naka penmek son si‐kato, ta niman, aliẃen baga‐en mo bengat, no diket emati pay so nen Apo Jesus, isonga agim ma shi pamati.

17 Isonga niman, nemnem mo la iya inkowan ko son si‐kam, jet no agpayson mowakka ikarin kait mo shi pamati, awat mo ngarod da si Onisimo, ja inges toy moka pesing son si‐kak. 18 No bilang ey ẃaray dingka to nontan da ja ngaaw son si‐kam, ono ẃaray inotang to, angken si‐kak i onbayad so. 19 Si‐kak ka mismoy makasolat niyay; isonga sajay i ka‐amta‐an to ey sigoradon bayshan ko. Nem si‐kam Filemon, eg mesepol la ikowan ko ey say biyag mo ket singa inotang mo son si‐kak. 20 Isonga patkim komay shawat ko son si‐kam, agi Filemon. Nemnem moy kasan‐a‐aki tayo shi pamati son Apo Jesus jet say dag‐en mo koma, sota pan‐imdengan ko.

21 Sajay i solat ko son si‐kam, ta amtak ey saja inkowan ko, dag‐en mo, jet namnamak ey mas ebadbadeg i dag‐en mo ey saja inkowan ko la.

22 Sakey pay ya shawat ko son si‐kam, isekana‐imak ni kowadto ja pan‐iyanan ko, ta ẃaray namnamak ey songbatan nen Apo Shiyos sota ira shawat mo ey ondawak da ja en manbisita son si‐kam.

23 Si Ipapras, ja kadẃak ja naybalod shiya badoran pangkep so nen Cristo Jesus, piyan ton pekikowan kod ja solat koy semek to son si‐kam, 24 jet angken sota ira kait ko ja emansilbi so nen Jesucristo, ja si Marcos, si Aristarko, si Dimas, tan si Lucas, inkowan sha ngo ey pekikowan koy semek sha son si‐kam.

25 Sota kaasi nen Apo Jesucristo ja ẃara son si‐kayon emin, sapay koma ta ma‐ma‐shoman.