1 Si‐kak si Santiago ja makasolat niyay, ja mismon inbetkag nen Apo Shiyos tan si Apo Jesucristo ja mansilbi son si‐kara, jet sajay ya solat ko, para son si‐kayon emin na too nen Apo Shiyos ja nayẃaris shiya intiron dobong. Sapay koma ta mapteng kayon emin.

2 Si‐kayon a‐akik shi pamati, no ẃaray onsabi son si‐kayon digat — angken nganton digat — karejo nemnemnemen ey ngaaw sotan na simabi son si‐kayo, no diket nemnem jo ey sotan na digat ta simabi ket panmaptengan jo. 3 Ta amtayo ey sotan na pandikat jo ket si‐katoy pemeshas nen Apo Shiyos ni pamatiyo et say maydowam kayo men mengenos ni digat. 4 Jet say anos jo, mesepol la naynay koma, karejo tengdawan i digat, say onkedsang kayo shi pamatiyo, ja enshiy jo pankodangan.

5 No sipa son si‐kayoy eg to amtay pespesing to, mesepol la si Apo Shiyos i pansheẃatan to, jet si‐katoy ontolong son si‐kato ja mannemnem ni kosto. Ta si Apo Shiyos, toka i‐akni sota mengshaw son si‐kato; eg to bebaingan. 6 Nem mesepol la enshiy showashowa ni pansheẃat jo; ipasnek jo ey kenshat ta itenengan shakejo nen Apo Shiyos. Ta say toon ẃaray showashowa to, eg to panseksekey i ẃared nemnem to. May‐eshig shi shadoyon ni baybay, ja no toway pedawan so ni shagem, si‐kato ngoy toshongen to. 7 Sotan na too, eg koma mannamnama ey ẃaray eẃaten ton i‐akan nen Apo Shiyos son si‐kato, 8 ta nanshoway nemnem to, ja emanbinaliw ni olay.

9 Sota toon emati ja enshiy mebedin to, man‐imdeng komen pasiya tep si‐kato ket epateg shi sango‐an nen Apo Shiyos. 10 Kasta met sota toon ẃaray mebedin to, man‐imdeng koma ngo, no itolok toy kaybeba ni bakdang to, ja eg to ma ipateg sotan na kokowa to. Ta kina‐agpayso to, ẃaray akew alin ma‐enshi sotan na kinabaknang, ja inges to sota sabsabong ni edet. 11 Ta no meskitan ni mebedjag sota edet, medayday ma et ma‐kas sota sabsabong to. Jet ma‐enshi malay kamapteng to. Sajay i kay‐eshigan ni baknang, ta angken maramen toka pan‐a‐shomiy kokowa to, ma‐enshiy biyag to.

12 Mebindisiyonan sota toon eg to tengdawan i digat tan eg to itolok i kesairo to. Sotan i ka‐asan to ey podnoy pamati to, isonga say kon‐oren to, sota biyag ja enshiy to engintegan, tep si‐katoy inkari nen Apo Shiyos ja i‐akan to so nonta ira toon ẃaray semek to son si‐kato. 13 Sota toon na‐awis sa mandeka ni ngaaw, eg to koma ikowan ey si Apo Shiyos i engawis son si‐kato, ta si Apo Shiyos, eg ma‐eẃis sa mandeka ni ngaaw wa aramid, ono mengeẃis ni toon mandeka ni ngaaw. 14 Nem say ka‐eẃisi ni toon mandeka ni ngaaw, emanshoki nodta ngaaw wa nemnem to met laeng. 15 Jet sotan na ngaaw wa nemnem, basol i pantongpalan to et no meshokshok sota basol, patey ingkatod ingka i pantongpalan to ngo.

16 Si‐kayon a‐akik shi pamati, eg jo itopo i nemnem jo ey si Apo Shiyos ket ngaaw i aramid to son si‐katejo. 17 Ta emin na kompormin mapteng nga banag ja kaonsabi son si‐katejo, si Apo Shiyos i toka kedepo‐i. Si‐katoy Ametayo ja emalsowa so ni emin na kaonniyal alid naykayang. Mapteng ni olay i aramid nen Apo Shiyos; eg manbinaliw i itsora to. 18 Isonga nemnem to ngon inpanbalin shakiton annak to, jet say inosal to, sota esel to shorog ja podno ja naytoro son si‐katejo. Jet siya, singa si‐katejo may kapatkan so ni emin na palsowa to.

19 Si‐kayon a‐akik shi pamati, iyay komay nemnemnemen jo. Mesepol la esagana kayon mantetneng ni bilin nen Apo Shiyos. Eg jo koma iba‐ngat i notnot; nemnem jo nin i ikowan jo asan joka bekasa. Karekayo onbonget ta shagos, 20 ta say bonget, si‐katoy kaondingding ni piyan nen Apo Shiyos ja dag‐en tayo. 21 Isonga ibi‐jag jon emin sota sigod ja pipiyan jon dag‐en ja ensekig ja eg jo pay laeng binediwan. Sota esel nen Apo Shiyos ja dimamot shi poso jo komay nemnemnemen jo ni olay, tep sotan i mebedin na onbaal so ni kaysedakanan jo. Ekombaba kayo komen on‐awat so ni esel to.

22 Jet mesepol la pati‐en jo sotan na esel: dagejoy kowan to, ta aliẃen on‐anay i pantettetneng bengat. No kowan jo ey on‐anay i pantettetneng jo bengat, naytopo itan na nemnem jo. 23 Ta sota toon emantetneng bengat ja eg to tongpalen, singa sota toon toka singsingpeta i binbin ni bakdang tod ispiko: 24 no maramen toka binbinbina i bakdang to nodta ispiko, amta toy itsora to, nem no taynan to sota ispiko, dibkan ton shagos i ka‐it‐itsora ton too. 25 Nem sota toon toka singsingpeta i tongpal nonta bilin nen Apo Shiyos ja emengi‐kan ni panmaptengan to, si Apo Shiyos i onbindisiyon so nontan na too shi emin na dag‐en to, tep si‐kato ket aliẃen emantettetneng bengat, no diket toka pati‐a tan toka dag‐a pay i kowan nontan na bilin.

26 Sota toon kowan to ey ẃaray pamati to son Apo Shiyos, nem eg to kari annaran i toka pan‐a‐sel, enshiy silbi nonta inpamati to. Naytopo sotan na toka pannemnem. 27 Say ka‐aporbali nen Apo Shiyos ja Ametayo ey koston ẃaray pamati to, ja aliẃen o‐owap, sota emenodong ni nankengoso tan nankebalo shi shaka pandikat, tan eg to itolok shorog i bakdang to ja ma‐edinan ni ogadi ni tood ja dobong ja enshiy pamati to so nen Apo Shiyos.