1 De gandeba lone handalu hewaria wai biagane garo ale mini karisi maria ege to̱le̱ boronosi hari kira heago hengeneha ibiyane de handaru. 2 Nogo hosi hone hearume karisi mbirago gililalu hosi mindi hearume karisi mendego gililalu hearia handaru.✡ Mo 6.4-5 3 Ani bialu nogo hosi pagabua hearume karisi tebonego gililalu nogo hosi honeni pagabua ngibingabule hearume karisi manego gililalu hearia handaru.✡ Mo 6.2 4 Ani biyago hondowa i̱na dahuliyali biagohondo hale halu lalu, Agali haguane-o garo ale karisi uruni irane agibe, laru.

5 Ani hale harugola dahuliyali biagome ladai bialu lalu, Karisi maria uruni ti dinini mariali dahuliya andagaha hagago nde áyu ogoni dindi bibahendenaga Anduane Homogo kagoria howa ibiragoni.✡ Mo 7.1 6 Karisi mbira nogo hosi mindirume gililo yu porago ogoni abene uyurahayagi Babilono dindi pole pora. Karisi mende nogo hosi pagabuarume gililo yalu porago ogoni dindi ni paliragohayagi pole pora. Ani pialu karisi tebone nogo hosi honeni pagabua ngibingabule karume gililo yu porago ogoni dindi abene unurahayagi pole poragoni. 7 Nogo hosi hongo gibihe urunime tagira ibalu ti dindi bibahendeha ala pugu bule biyagola dahuliyali biago ibugua lalu, Ai karulape tí dindi bibahende abi ngabe hondole pudaba, laya handala hosi biaru abale piai haya. 8 Ani piyagola dahuliyali biago ibugua i̱ olowa i̱hondo lalu, Nogo hosi uyurahayagi piyarume Anduane Homogohanda keba ala hayago mo palia hayagoni, laya.

9 Anduane Homogohanda i̱hondo bi ogo langialu lalu, 10 Í̠na agali mini Heledai Tobiya Yadaia imaru Babilono dindi wahalu Yarusaleme daibu karia í̠ pialu tigua mbirale ngolo silibaru mo turu halu bame ngule yidago mo yabe. Mo yalu Sebanaia igini Yosaia andaga abale pu, laya. 11 Pialu tigua ngolo silibaru ngiragome í̠na kininaga manda mbira wabibe. Wabu yalu puwa Yahosadaga igini Loma Binigo Mo Miaga Haguane Timbuni Yosuanaga haguaneni mo karula habe. 12 Ani karula halu howa ibuhondo bi au lamibe. Anduane Homogo Hongo Haiheore kagome lalu, Agali mbira mini Ira Dibini Tilinini Andaho Aribia Hene kago ibu dindi ibuni kagoha bayaleore haabo howa ibugua i̱naga anda lone biadai bulebira, lamibe.✡ Yar 23.5, 33.15, Seg 3.8 13 Ibugua i̱naga anda bialu kini mini lene howa ibunaga wali agaliru baya hangu haru howa handayaho holebira. Ani bialu ibugua loma binigo mo miaga agalibi ibu dege howa kininaga biragane dagia ngagoria biruwabi ibugua biabe kira mo mbiraore howa bayaleore bialu holebira, laya lalu lamibe, lene.

14 Kininaga manda ogoni Anduane Homogonaga andaha wiaabo holebira. Ani ngago hondowa wali agali bibahende tigua Heledai Tobiya Yadaia imaru Sebanaia igini Yosaiabi mitangibu dai bialu turuore ho holebira.

15 Agali dindi kaundiaha haga haga bidaru tibi nde ibalu Anduane Homogonaga anda ogoni lone biadai bule lowa bialu karu tigua biamogo bialu holebira. Anda ogoni biai harangi Anduane Homogo Hongo Haiheore kago ibunime i̱ heneneore dabalu tí kamiria pu laya handala ibinida lo manda buleberemi. Tígua Anduane Homogo tínaga Ngode Datagaliwabe kagonaga bi ledago baya hangu talialu biai harimiyagua nde mbirale uruni heneneore tagira ibai holebira, lalu Segaraia i̱na larogoni.