77
Genda íbu wiyagola Ngode Datagaliwabe olenego ogo
1 I̱na Ngode Datagaliwabehondo hongo howa olalu kogoni.✡ Iba 3.4, 142.1
I̱na ibuhondo bi larogo hale habe lalu olalu kogoni.
2 Genda anda ibirangi i̱na Anduane Homogohondo bi laruli.
Mbiraga bibahendengi i̱na gi yaraga halu Anduane Homogohondo bi laruligoyu
i̱ha mo palia holene nawi dege kogoni.
3 I̱na Ngode Datagaliwabe mitangi biaabo halu koria
i̱naga bu miniha dugu bialu haruli.
I̱na mitangitangi bialu mini hurula bialu kogola
i̱naga miniha genda dege dindi ho haruli.
4 Ibugua i̱ palia hondo nahe mo yangayangabu helaga kagoni.
I̱naga bu miniha genda yu kogome bi labe naheore kogoni.
5 Ainde i̱ni bamba bayale hama ibiniru mitangibu dai bialu haruli.
Mali ala bolangua halu peneru mitangiore bialu haruli.
6 Mbiraga paluwa i̱na mitangitangi dege biruli.✡ Iba 4.4, 42.8
I̱naga miniha mini hurula bu howa i̱nihondo bi ogobi laruli,
7 Anduane Homogohanda inahondo erembira ngialu haabo holebiradabe.
Inahondo turu lone naholobadabe.
8 Ibugua ina dara howa gubalini haraligo hairi áyu kagonidabe.
Ibugua buleore lalu bi lo wiyaru habo layadabe.
9 Ngode Datagaliwabehanda ina dara howa biamogo bulene embeda hayabe tobaheda.
Ibunaga dara holene winigo ai keba holene wia aribia hayadabe, lo mitangi bu harugoni.
10 I̱na urunidagua mitangibu howa lalu, Ngode Datagaliwabe Daligaorene Daliga kago
ibugua ina áyu pele ngulenego manga hayada.
Ibu ogonibi haruada mitangi bialu
i̱naga bu miniha tandaga timbuniore ho kogoni ndobe, larugoni.
11 Anduane Homogo-o biabe timbuni í̠na biriruni mitangibu dai bulebero.
Bambaore í̠na mbirale tara nahendene ale bigi biriru mitangi budai bulebero.
12 Biabe bibahendeore í̠na biriru damene mitangi biaiore holebero.
Í̠na biabe hongohe taraore bigi biriruni mitangi biai holebero.
13 Ngode Datagaliwabe-o í̠na bigi biriligo bibahende bayale tigabiore birili.
Mbirale bi pupu wule dama mitangi bialu gime wabini ngaruni
bibahendeore í̠ ale mbira nawiore.
Í̠na uruni bolangua haihe kegoni.
14 Ngode Datagaliwabe-o mbirale nahendene ale agalime bibe nahe ngaru
biai haga í̠ni hanguore kegoni.
Bamba í̠na wali agali dindi tara tarani bu hearuhondo
í̠ninaga hongo timbuni walia harigoni.
15 Yagaba Yosebelanaga aguanene
í̠ninaga wali agali mani andaho aribia hene hearu
í̠ninaga hongooreme pele mialu haru dai birigoni.
16 Ngode Datagaliwabe-o bamba iba berearume í̠ hondowa gi hai haya.
Iba solowara timbuni berearumebi duru lalu biraya.
17 Beralibame iba dalu timbuniore ibira halu
hari kilikulu timbuniore layuagobi
hari daba migimege laga bialubi uruni bibahende biai haya.
18 Humbirini wai biyago dombeneha howa hari kilikulu timbuni lelarigoni.
Hari daba migimege lelarigome dindi bibahendeha wá hagimbu biyagola
dindi ogo mogo lalu dumbirumbi biagimbu biya.
19 Iba yaribu biyagoria í̠ni iba daligani pirigoni.
Iba solowara timbuni bereagoha hariga bo wialu pirigoni.
Í̠ penegoha ge ngane nahandabeheya.
20 Í̠ni haru haganeore howa bamba halu pirigola
í̠naga wali agali í̠ talima ibagaya.
Mosese Aronola haru haga helarigome
libugua wali agaliru haru howa handayaho hayagoni.