1 Ege to̱le̱ halu mende baraga howa handalu hearia Simiono hameigini hearunaga mini wiaria hondowa ti dindi tu wa mini. Simiono hameigininaga dindi ogoni Yuda hameigininaga dindi wiago dombeneha tu wa mini. 2-6 Dindi ogoniha tano wigi binigo uru. Beasebabi Sebabi Moladabi Hasasualabi Balabi Esemebi Eledoladabi Bedulubi Homabi Sigilagabi Bedemagabodobi Hasasusabi Bedelebaodobi Saruhenebi tano uruni daga lamaga halu pira mbirani tebira (13) wini. Tano timbuni uruni heba tano maru emene emenebi wia parapara bu wia dege bini.✡ 1 Bit 4.28-33

7 Ani bialu tano maru Ainibi Limonobi Ederebi Asanabi tano maria timbuni uruni heba tano maru emene wia parapara bu wiarubi tinaga wini. 8 Simiono hameigininaga tano timbuni uruniha tano maru emene emene wiarubi karulaga bima pialu Baladabere tano mini mende Lama laga dindi abene unurahayagi wiagoria wima tagira pene. 9 Yuda hameiginirunaga dindi tu wa miyadago ti hangu holenego timbuniore hayagola lone tu wia dai bialu Simiono hameigini ti dombeneha helo tihondo mini.

10 Ege to̱le̱ halu tebone baraga howa handalu hearia Sebulunu hameiginiru tinaga mini wiaria hondowa ti dindi tu wa mini. Sebulunu hameigininaga dindi tubari pialu Saridi tano wiagoria tagira pene. 11 Ani bialu ogoriani howa tubari pu banga bialu ni paliragohayagi pialu Mareala tano wiago yadai bialu Dabesede tano kaware wiago bolangua halu Yogoneama tanonaga abene ni tagira ibiragohayagi iba emene peagoria tagira pene. 12 Saridi tanoha howa ni tagira ibiragohayagi tubari Kisilodo Tabo gibuni pialu Daberada tano wiagoha puabo howa Yabia tano wiagoria ubadaga halu pene. 13 Tubari ogoni puabo halu ni tagira ibiragohayagi Gedehebe tanobi Edegasini tanobi wiagoria bolangua hene. Ani bialu ogoriani howa beregedalu Nea dindi wiagoha bolangua halu Limono dindi polene hariga peagohayagi pene. 14 Ani puwa abene uyurayagi tubari pu banga bialu Hanadono tano wiagoria bolangua halu Ibidahele dindi ulini wiagoria tagira pene. 15-16 Sebulunu hameiginirunaga dindi winigoha tano maru winigo uru. Kadada tanobi Nahalala tanobi Simirono tanobi Idala tanobi Bedeleheme tanobi uruni daga lamaga halu homberia (12) wuwa tano maru emene emenerubi wia parapara bini.

17 Ege to̱le̱ mane halu baraga howa handalu hearia Isaga hameiginirunaga mini wiaria hondowa ti dindi tu wa mini. 18 Isaga hameigini tinaga dindiha tano winidaru uru. Yaserilibi Kesulodobi Sunemebi 19 Habaraimibi Sionobi Anaharadabi wini. 20 Ani wialu Labidibi Kisionobi Ebesebi 21 Lemedebi Enganimibi Enehadabi Bedebasesebi wini. 22-23 Ani wuwa Isaga hameiginirunaga dindi tubari tano maru wiagoria pialu ogodagua pene. Hari Tabo heagoria howa pialu Sahasuma tanobi bolangua halu Bedesemese tano wiagoria piaho wialu amura Iba Yodana peagoria tagira pene. Isaga hameiginiru tinaga tano timbuni uruni pira mbirani waragaria (16) wialu tano maru emene emenebi kaware wia parapara dege bini.

24 Ege to̱le̱ dauni halu baraga howa handalu hearia Ase hameiginirunaga mini wiaria hondowa ti dindi tu wa mini. 25-26 Ase hameiginiru tinaga dindi ogoniha tano wigi binidarunaga mini uru. Helegada tanobi Hali tanobi Bedene tanobi Agasaba tanobi wialu Alamamelege tanobi Amada tanobi Misala tanobi wigi bini. Ase hameiginirunaga dindi tubari ni paliragohayagi Hari Kamelo heagoriabi Siholibinada tanobi wiago kaware dege pene. 27 Ani bialu tubari ni tagira ibiragoha pudai bialu Bededagono tano wiagoria pialu Sebulunu hameigininaga dindi tubari kaware dege bolangua halu Ibidahele dindi ulini wiagoha bolangua halu pene. Tubari ogoni dindi abene uyurahayagi pudai bialu Bedemege tanobi Naiele tanobi wiagoha tagira pene. Ani pialu tubari uyurayagi puabo halu tano maru Kabulubi 28 Eberonobi Lehobobi Hamonobi Kanabi tano uruni bibahende wiagoria bolangua haga bialu tano timbuni Saidono wiagoria tagira pene. 29 Ani bialu ogoriani howa lone beregedalu tubari Lama tano wiagoria pialu Taia tano wai pabe hongohe ege to̱le̱me bu mabubi heagoria tagira pene. Ani puwa tubari ogoriani beregedalu Hosa tanohayagi pudai bialu iba solowara timbuni mini Medidereniana bereagoria pu maro bialu pene. Ani pialu tano maru Mahalababi Agasibibi 30-31 Umabi Abegebi Lehobobi tano uruni Ase hameigininaga dege wigi bini. Tano timbuni uruni daga lamaga halu pira kirani kira (22) wialu tano maru emene emene wia parapara wiarubi bibahende ti karulo hene.

32 Ege to̱le̱ waragane halu baraga howa handalu hearia Nabadali hameigini hearu tinaga mini wiaria hondowa ti dindi tu wa mini. 33 Tinaga dindi tubari Helebe tano wiagoria howa pialu dindi Sananimiha ira mini oga heagoria tagira pialu Adaminegebe tano wiagoria bolangua halu Yamania tano pialu amuraha Lagumu tano wiagoha puabo halu Iba Yodana angeni tagira pene. 34 Ani pialu tubari ni paliragohayagi pudai bulenaga Asanodo Taboro tano wiagoha pudai bialu Hugogo tano wiagoria pene. Ani pialu dindi abene unurahayagi Sebulunu hameigini dindi tubari wiago kaware pialu ni paliragohayagi Ase hameiginiru baba tubari wiagoria puabo halu ni tagira ibiragohayagi Iba Yodana peagoria pene. 35 Tinaga tano maru pabe ege to̱le̱me bu mabu bini hongohe haga binidaruni Sidimi tanobi Sere tanobi Hamada tanobi Lagada tanobi Kinerede tanobi 36 Adama tanobi Lama tanobi Haso tanobi 37 Kedese tanobi Ederei tanobi Enehaso tanobi wialu 38-39 Yirono tanobi Migidalele tanobi Horeme tanobi Bedanada tanobi Bedesemese tanobi wigi bini. Tano timbuni uruni daga lamaga halu pira mbirani dira (19) wiagoha tano maru emene emenebi wia parapara bu wiaru heba bibahende Nabadali hameiginirume karulo wini.

40 Ege to̱le̱ kane halu baraga howa handalu hearia Dana hameigini hearunaga mini wiaria hondowa ti dindi tu wa mini. 41 Dana hameigini tinaga tano wigi biniru mini uru. Sora tanobi Esedaolo tanobi Irisemese tanobi 42 Salabimi tanobi Ayalono tanobi Idila tanobi 43 Elono tanobi Timina tanobi Egerono tanobi 44 Eledege tanobi Gibedono tanobi Balada tanobi 45 Yahudu tanobi Beneberaga tanobi Gadarimono tanobi 46 Meyagono tanobi Lagono tanobi dindi emene emene Yoba tanoha wiarubi heba ti karulai hene. 47 Ani howa mani agali dindi aba ogoniha hene hearume Dana hameiginiru baba waitigi halu Dana hameigini bo batagi hene. Ani biya handala Dana hameigini ti tagira pialu Laisi hameigininaga dindi wiago karulole lowa Laisiali hearu baba wai bini. Wai bialu wali agali dewaore bo wahai halu Laisi tano Dana hameiginirume karulene. Karulowa mani dindi ogoni Dana hameigini tinaga lowa malu lalu karulo howa tano ogoni ala mini Laisi laga winigo mani tigua tinaga mamali mini Dana wia aribia hene.✡ Hgn 18.27-29 48 Dindi ogoniha tano timbuni wiarubi tano maru emene wia parapara bu wiarubi bibahende Dana hameiginiru ti karulo hai hene.

49 Isaraele hameigini tini bibahende dindi tuwa ta hai howa dindi mbira Nunu igini Yosua tu wa mini. 50 Yosua ibugua ala Isaraele hameigini bu hearuhondo lalu, I̱ dindi mbira Timinada Sera tano Eberaimi dindihayagi hari bare ngagoha wiago ngidaba, lene. Ani layagola nde Anduane Homogohanda bibe lenedagua tigua dindi ogoni Yosua mini. Miyagola Yosua ibugua tano biago mo tiga budai bialu ibuni tano ogoniha hene.

51 Ani biai howa loma binigo mo miaga Eleasabi Nunu igini Yosuabi Isaraeleali hameigini mbira mbiranaga agali haguane haga bini hearubi tigua Silo tanoha Anduane Homogonaga Balai Anda biagonaga panga haraba wiagoriani ngoai ho hene. Ani ngoai ho hearia tigua dindi Anduane Homogohanda Isaraele hameiginiruhondo minigo tu wa taholenaga hameigini mbiranaga dindi ago mibehedabe hondole ege to̱le̱ emene biaru Anduane Homogonaga deni baraga hayagola walia hayadagua dindi bibahende tu wa tahai halu maro bini.