1 Yosebe igini wahene Manase henego ogoni ibunaga hameigini aguanene hearu tinaga dindi Iba Yodana peagoha ni paliragohayagi tu wa mini. Manase igini wahene Magiri henego ogoni ibu Gileada aba howa wai biaga mugube hongohe hene. Ani heagola tigua dindi hobane mbira Iba Yodana ni ibiragohayagi Gileada tano wiagobi Basana tano wiagobi Magiri aguaneneru ti helo tu wa mini. 2 Manase igini aguaneneru ogodagua hama ibini. Abiesebi Helegebi Asarielebi Segemebi Hebebi Semidabi haga bini. Isaraeleali tigua dindi tu wialu howa dindi abene Iba Yodana peagoha ni paliragohayagi Yosebe igini Manase aguanene uruni ti helo tu wa mini. 3 Selobehada ibu Hebe igini Hebe ibu Gileada igini Gileada ibu Magiri igini Magiri ibu Manase igini hene. Anigo Selobehada ibu igini mbira nahe howa ibu wandari dege taribu hene. Ibu wanedaruni tinaga mini uru berene. Malabi Noabi Hogolabi Miligabi Tirisabi uruni biraga bini. 4 Ani berenego wandari uruni tigua loma binigo mo miaga Eleasabi Nunu igini Yosuabi agali haguane maru bu hearubi ti hearia puwa lalu, Ala Anduane Homogohanda Mosesehondo bi lalu, Selobehada igini mbira nahedago ibu wane bedaruhondo dindi mbira tu wa mibe leneya, lalu lamini. Ani layagola tigua wandari urunibi Manase hameigini bu hearubi dindi Anduane Homogohanda tu wa ta habe layadagua bialu migi bini.✡ Dag 27.1-7 5-6 Isaraele hameigini hearume dindi maru Selobehada wane biaru tinaga waneigini aguaneneru tu wa mini wiago heba biamaga howa Manase hameigini ti dindi timbuniore hameigini pira holene ti hai hene. Ani wu howa Manase hameigini ti degeme Iba Yodana doma ederayagi dindi timbuni Gileada wiagobi Basana wiagobi ti hai hene.

7 Manase hameigini tinaga dindi tubari Ase dindi wiagoria howa Segeme tano ni tagira ibiragohayagi howa Migimedada dindiha tagira pene. Ani bialu unurayagi wima pialu Enedabua wali agali heagoria tubari wini. 8 Tabua dindiha dindi wu mabu bu wiago bibahende Manase hameigininaga wini. Tabua tano ogoni Manase Eberaimila tubarini winigo ogoni Eberaimi aguanenerunaga wini. 9 Ani bialu dindi tubari iba emene mbira mini Kana peadagua dalipe hene. Tano maru iba ogoni tene unurayagi winiru bibahende Manasenaga dindiha winigoyu Eberaimi hameigini tinaga dege wini. Anigo Manase hameigini tinaga dindi iba Kana ogoni tubari uyurayagi pialu iba solowara timbuni Medidereniana bereagoria tagira pene. 10 Dindi emene mbira iba Kana ogoniha abene unurahayagi wiago Eberaimi hameigini tinaga wialu abene uyurahayagi wiago Manase hameigini tinaga wini. Ni paliragohayagi iba solowara timbuni Medidereniana bereago tubari wini. Ani bialu abene uyurahayagi Manase hameigini ti baba tubari Ase hameiginirunaga dindi winigoria bolangua halu ni paliragohayagi uyurayagila dombeneha pupe halu Isaga hameigini dindi ni tagira ibiragohayagi uyurayagila dombeneha hene. 11 Isaga dindihabi Ase dindihabi tano wiaru Manase hameigini ti karulaga binigo ogo. Bedesana tanobi Ibileama tanobi ogonilaboha tano maru emene emene wiarubi ti karulo hene. Tano maru Dobi Endobi karulalu Tanagabi Megidobi karulalu tano timbuni uruniha tano emene maru wia parapara bima pearubi bibahende karulai hene. 12 Anigo Manase hameigini tigua dindi uruniha Kenanali bu hearu balu taliatagi habe nahe howa Kenana wali agali uruni ti heba mandagi haabo hene.✡ Hgn 1.27-28 13 Mani Isaraele ti dewali hongohe howa Kenana wali agali bu hayadaru bo taliatagi nahabeheyagola tigua tinaga garabaya biabe ale biahaga helo helaga bini.

14 Mani howa Yosebe aguanene hearume Yosua hearia puwa lalu, Inahondo dindi mbiraore hangu ngirigo aginagabe. Anduane Homogohanda ina mo dewaoreho heledagome dindi ogoni ina bibahende holene nakarulapeda, lene.

15 Ani layagola Yosuahanda ladai bialu lalu, Ai tí dewaliore halu Eberaimi dindiha hari barebare ngarubi nakarulape degeyagua nde Perese dindi ngagohabi Lebaimi dindi ngagohabi pialu tí ogoniha hole irabu ngaru e ima dibalu hongole pudaba, lene.

16 Ani layagola Yosebe aguanene biaru tigua ladai bialu lalu, Hari barebare ogoniha ina holene nakarulape kamagoni. Anigo iname dindi ulini bayale ngago karulole manda birimayagua nde Kenanali dewaore Bedesana tano ngagohabi dindi emene emene tanoha wia parapara bidaruhabi dewaore ka. Ani bialu Yaserili tano ngagoria wai biaga garo ale nogo hosime gililaga mini karisi aeaneme wabini dewaore nga, lene.

17 Ani layagola Yosuahanda Eberaimi hameigini Manase hameiginilahondo lamialu lalu, I̱na tíhondo heneneore larogo tí dewaliore howa hongoheore kamigoni. Tí dindi mbiraore hanguni holene nakarulapedago dindi marubi wiatago hole tígua dindi taya bulene karulape kamigoni. 18 Tígua dindi hari barebare ngaru karuloleberemi. Ai tígua pialu irabu tegi ko ngaru e ima dibalu hongowa tínaga dindi ogoni holeberemi. Kenanali karu ti nde wai biaga karisi aeaneme wabini wu howa hongohebi kagoyu tígua bo batagi holeberemi, lene.