1 Wali agali Sudana dindinaga iba angeha palima pedaru darabioreda. Mbirale babaganehe dewaore dindi ogoniha yagalo yu puíbu biaruane hale habehe.✡ Seb 2.12 2 Tigua marunaga bi lo yalu bi lahaga hearu iba Naili pedagoria talu dambe aleme wabinigoria yalu daliape holebira. Sudanalirunaga bi lahaga bu kamiruni tí nde bi lowia harago lo yalu gerai laga bu kamiruni tígua bi mbira tíni dalu yalu dai bidaba. Dindi ogoni hongohe iba dewape wali agali ti guruluni howa tinaga tingini peyobi bayaoreru bu kagoni. Hameigini dindi ogoniha padaru ti wai biagane hongohe kago hale howa wali agali maru dindi tara tarani padarume ti hondowa gi hai haga ka.

3 Wali agali dindi bibahendeha palima pedemiru tígua bi ogo hale hadaba. Manane mbira hari neneni helolebirago hondole baya hanguore handaya ho halimu. Ani bialu mbiralime mbelo biguli pu laruagolabi bayuwa hale halimu. 4 Irane Anduane Homogohanda i̱hondo langialu lalu, I̱ni Anduane Homogo kogome i̱na dahuliya andaga howa de handa dali halu ema nabi bi nale hendore hondo holebero. Iba angeni ni tandagabi iba muni daba kagome poboyogo hendore bima irigi hagadagua mabuha iba dimba ibira halu tomo mo anda hole hendore ibira hagagobi bi nale hendore hondo holebero, lene. 5 Anigo wali agali dindi ogoniha karu ti hongo gibiorehe ka. Pu mbira lini daga mini gerebi bayale anda howa lini dolenaga pabua balu lini bayale dalu boga nabidaore agali kebaheme gerebi irane ogoni abale gandulo wahai hagadagua Anduane Homogohanda dindi ogoni mo ko halu haealabaga bu wahai holebira. 6 Anduane Homogohanda dindi ogonila wai bilonaga waitigi bu karu ibilaga biragola waitigime ibalu ami agali bu karuni bo wahai haragola bo paya binigo tingini dindini wima polebira. Ani wima pedagola agali tingini uruni ega bedarumebi nogo gabua tara tara bu karumebi ibalu no waholebira. Ni dalu gaea birangi ega bedarume nolebira. Dagare birangi nogo gabua karume nalu holebira.

7 Anidagua birangi Anduane Homogo Hongo Haiheore kago ibugua mbirale mbirale mule yu ibiraru mo yaga bulebira. Mbirale uruni wali agali hongohe dindi iba dewape ngagoria karu tigua yalu ibulebira. Wali agali uruni ti guruluni tinaga tingini peyobi bayaoreru bu karume ibuhondo ani mule yalu ibulebira. Hameigini dindi ogoniha padaru ti wai biagane hongohe kago hale howa wali agali maru dindi tara tarani padarume tihondo gi hai haga ka. Anigo wali agali dindi uruniha bu karume Hari Saiono Anduane Homogo Hongo Haiheore kago ibu mitangi bialu ibu mini yaraga howa lotu lole íbu ngoai holene ngagoria ibuwa tigua ibuhondo mbirale yalu ibiyaru mulebira.