5
1 Kini Solomonobi ibunaga biabe biaga hearubi tigua Anduane Homogonaga andaha biabe bulene winigo biai hene. Biai hayagola Solomono ibugua ngolo silibabi mbirale tara tarabi ibu aba Debidihanda Anduane Homogonaga loma biaho winiru bibahende anda hobane uruni ale wiagane heagoha mo yu puwa ngelaga bini.✡ 2 Sml 8.11, 1 Bit 18.11
Habo Nalolenenaga Mbogoyi Anduane Homogonaga andaha mo yalu ibinigo ogo
(1 Kini 8.1-9)
2 Kini Solomonohanda, Isaraele hameigini hearunaga agali haguane bibahende hearubi hameigini emene emenenaga agali haguane hearubi ti bibahendeore i̱ni koria Yarusaleme ibai halimu lalu lama pudaba, lene. Uruni tigua Debidinaga tano Saiononi Anduane Homogonaga Habo Nalolene Bi lo winigonaga Mbogoyi biago ibunaga anda Yarusalemeni ngelole mo yalu ibule pudaba lolenaga ani lamule bi yalu purogo ladaba lene.✡ 2 Sml 6.12-15, 1 Bit 15.25-28 3 Ani laya handala bi ogoni hale halu agali uruni tigua mali ogoninaga ege kane layagola Isaraele wali agali ti ege ogoningi Horo Timbuni Anda Nemandaruha Palu Holene winigo ti bibahende íbu ngoai hene. 4 Agali haguane biaru íbu ngoai heagola Libaiali hearu tigua Mbogoyi biago mo yalu 5 Anduane Homogonaga anda heagoria yalu pene. Ani buwa loma binigo mo miagarubi Libai agali hearubi tigua Anduane Homogonaga Balai Anda heago gialo yalu Balai Anda ogoniha wiaga wiaru bibahende mo yai halu Anduane Homogonaga anda heagoria kawareni pene. 6 Ani mo yalu ibiyagola Solomonobi Isaraele wali agali bibahendebi Mbogoyi biago mo yalu ibiyagoria mo ngoai ho hene. Ani mo ngoai howa tigua nogo sibi bulumaga wangaberubi dewaore daga labenahe Anduane Homogohondo loma biniru bo delalu hene. 7 Ani bo delai halu loma binigo mo miaga biaru tigua Mbogoyi biago Anduane Homogonaga anda biago tamu Hobane Loma Bia Heneore biagoha mo yalu anda puwa dahuliyali handalehe wabini biagolabonaga babagane andaneha ngelene. 8 Babagane yabulalu haradaguabi wabu helayagome Mbogoyi biagobi iraho yaga ira luni kira biagolabobi bibahende babagane kira biagolabome dambi hai helene.✡ 2 Bit 3.10-13 9 Ira kira Mbogoyi iraho yaga ogonilabo lunioreyagola anda tamu Hobane Loma Bia Hene laga mende tagirahayagi heagoria howa ira ogonilabonaga nguni panigi handabehe wini. Ani binigo tagirahayagi howa handabe nahe wini. Ira ogonilabo ogoriani wiaabo haga wini. 10 Mbogoyi ogoniha ege to̱le̱ kira Anduane Homogonaga bi mana gilibu wini biagolabo dege wini. Bamba Isaraele wali agali Iyibi dindi wahalu Hari Sainai heagoria íbu heangi Anduane Homogohanda ti heba Habo Nalolene Bi mbira lowinigo ogoni ege to̱le̱ kirani gili buwa Mosesehanda Mbogoyi ogoniha yu ngelene.✡ Man 10.5
Anduane Homogonaga wá taraore holene demborerebi hatagi henego ogo
11-14 Ani ngelowa loma binigo mo miaga biaru ti Hobane Loma Bia Hene heagoha howa tagira ibini. Ani ibuwa loma binigo mo miaga tanabi bibahende hearu tini Anduane Homogonaga deni dodo nahelonaga mana bulene winigo biai hene. Libaiali iba gana lagaru ngida ale tara tara bagaru Asaba Hemana Yahudunu imaru ti igini damenerubi labolabo bayale tara karulowa ni tagira ibiragohayagi lomabu delaga dabu wiagoria heyu hene. Tigua heyu howa ngida ale tara tararu ngi̱li̱nge̱le̱ lagane beledi ale boronosime wabiniru yalu ti heba loma binigo mo miaga handari mbirani pira kira (120) hearume bigulibi yuwa mandagi hene. Iba gana laga hearume ti iba gana lalu howa marume biguli aleru pulalu marume ngi̱li̱nge̱le̱ lagane belediru balu ti bibahende mandagi howa Anduane Homogonaga mini yaraga halu lalu,✡ 1 Bit 16.34, 2 Bit 7.3, Esr 3.11, Iba 100.5, 106.1, 107.1, 116.1, 136.1, Yar 33.11✡ Har 40.34-35
Anduane Homogohanda bayale biaga kagonaga iname ibuhondo ka̱i̱ timbuni lami̱ya.
Ibugua ina gubalini haho wiaaboore haga kagoni,
lalu hene.
Ani bialu loma binigo mo miaga biaru tigua Mbogoyi biago tamuha mo ngelalu tini tagira ibiyagola beraliba aleme Anduane Homogonaga anda biagoha to̱lai hene. Anduane Homogonaga wá taraore holeneme beraliba biagoha howa wá timbuni demborerebi hatagi hene. Ani biyagome loma binigo mo miaga biarume tinaga biabe bulene wiaru bule dai bibe nahe hene.* Anduane Homogo i̱ni Isaraele wali agali baba kogoni lalu walia halu ibuni beralibaha howa ibaga. Beraliba ogonime ti Iyibi wahalu tagira ibiyangi dindi ko wali agali nahaga wiagoria ibuni haru bamba hene. Haru Penego Be 13–21 handabe.
✡5:2: 2 Sml 6.12-15, 1 Bit 15.25-28
✡5:11-14: 1 Bit 16.34, 2 Bit 7.3, Esr 3.11, Iba 100.5, 106.1, 107.1, 116.1, 136.1, Yar 33.11
*5:11-14: Anduane Homogo i̱ni Isaraele wali agali baba kogoni lalu walia halu ibuni beralibaha howa ibaga. Beraliba ogonime ti Iyibi wahalu tagira ibiyangi dindi ko wali agali nahaga wiagoria ibuni haru bamba hene. Haru Penego Be 13–21 handabe.