1 Debidihanda ami agali ti marume ami agali daosini mbira (1,000) haru haga hearubi handari mbira (100) haru haga hearubi bibahende mo ngoai hene. 2 Ani íbu heagola Debidihanda tihondo lalu, I̱na bi larogo hale howa tí bibahendeme e̱ laramiyaguabi Anduane Homogo inanaga Ngode Datagaliwabe ibugua hame layaguabi ina Isaraele wali agalihondobi loma binigo mo miagahondobi Libaiali tihondobi ti bibahende ina kamaria ibai helo bi lo pelami̱ya. 3 Ti ani ibai howa Ngode Datagaliwabenaga Habo Nalolene Bi lo winigonaga Mbogoyi Solo ibu kini heangi nagaloneda lowa harimago ogoni ai iname mo mali̱ya, lene. 4 Ani layagola hale howa wali agali bibahendeme turu halu, Ani bimi̱ya, lalu lai hene.

5 Debidihanda Habo Nalolene Bi lo winigonaga Mbogoyi Kiriada Yarimi dindi wiaria Yarusaleme tanoni yalu ibilo ibugua Isaraele wali agali iba Siho peago Iyibi dindi tubari unugohayagi henerubi Hamada dindi uyugohayagi henerubi mo ngoai hene.✡ 1 Sml 7.1-2 6 Ani íbu heagola Debidihanda wali agali uruni bibahende haru halu Yuda dindinaga Bala tano wiagoria Ngode Datagaliwabenaga Habo Nalolene Bi lo winigonaga Mbogoyi biago ogoniha wiagola mo yu dai bule pene. Mbogoyi ogoni Anduane Homogonaga laga wini. Mbogoyi ogoninaga daligahayagi dahuliyali handalehe kira wabu helowa ogoni Anduane Homogo ibuni handame ho howa biragane dagia ogoni laga wini.✡ Har 25.22 7 Anigo ti Abinadaba anda heagoria pialu Anduane Homogonaga Mbogoyi biago wiaria hendene. Hondowa tigua Mbogoyi biago nogo bulumaga kirame gili laga garo ale mini karisi gahenge mbira wiagoria yalu pole mo paga hene. Mo paga halu harigani yalu pialu howa Abinadaba igini kirali Usa Ahiolame gili laga garo ale karisi biago haru halu pene. 8 Debidibi Isaraele wali agali bibahendebi turu howa mali lialu ngida ale balu tabagabi balu ngi̱li̱nge̱le̱ laga bilonaga mbirale tara tara wiarubi mo ema bia halu mbelo biguli ale pulalu iba gana lama garo ale karisi biago heba mandagi pialu Anduane Homogonaga mini yaraga hama pialu hene.

9 Ani bima pialu widi lini ibira halu aeane puyabume yu pelonaga bo taulaga agali mbira mini Kidononaga anda heagoria tagira pene. Dindi ogoriani nogo bulumaga biago labome Anduane Homogonaga Mbogoyi biago mo ema biyagola ibira habehe wini. Ani ibira hole biyagola Usahanda Mbogoyi biago abale yania hene. 10 Usahanda Anduane Homogonaga Habo Nalolene Bi lo winigonaga Mbogoyi biago bame mo yo hondowa yania hayagola Anduane Homogohanda keba timbuniore howa Usa bayagola abale ogoriani homo ibira hene. 11 Ani biyagola Debidi ibugua Anduane Homogohanda ogoni biyago hondowa keba hene. Horo keba hayadangi howa dindi ogoni mini Perese Usa laga winigo nga.* Dindi mini Perese Usa ogoni inanaga bi lalu, Anduane Homogohanda Usa Bo wahene, laga winigo nga. Mini ani wiyadagoni áyu ina kamangi manda bialu ndo abale agali mbuga ogo gili binidangi howa manda bialu leda.

12 Debidi ibugua ogoningi Anduane Homogohondo gi howa lalu, Anduane Homogonaga Habo Nalolene Bi lo winigonaga Mbogoyi ogo i̱na aguaore ngelo hole mo yalu poliyadabe, lene. 13 Ani lowa Debidi ibugua Anduane Homogonaga Mbogoyi biago ibunaga tano Yarusaleme nayupe wahalu hariga mendeha yu pubagi halu pene. Puwa tano mbira mini Gede winigo ogoniali mbira mini Obededomo henego ogoni ibunaga anda mo ngelene. 14 Agali Obededomo biagonaga andaha ngelo heane ege tebira pene. Ani ngelo heagola Anduane Homogohanda Obededomobi ibunaga waneigini damenerubi bibahende mo bayale hai hene.✡ 1 Bit 26.4-5