1 अग्रिप्पा पौलुस से अंदुन, “नीनी तान बारा दा माताळोद आग्या आद.” आग पौलुस कय वाळुसकु उत्‍तर कोळली कुरतुन:

2 “हे राजा अग्रिप्पा, यास मातगोळ्द यहूदी नान मा दोष हचतार, ईंद नीन मुंद आंदुर्द उत्‍तर कोळोर दा ना तान इक धन्य सम्सतीन, 3 खास माळकु इदुरसाटी कि नी यहूदीगोळ्द सप्पा रीति रिवाजगोळी अदिक झगळागोळी जान्सत्या. इदुरसाटी ना विनती माळतीन, धीरज देल नांद केळ.”

4 “नान चाल चलन सुरूवात टु तान लॉकुर न्याड्या अदिक यरूशलेम दा ह्यांग ईरोद, अद सप्पा यहूदी जान्सतार. 5  ✡ २६:५ प्रेरितगोळ २३:६; फिलिप्पिगोळ ३:५आंदुर नानी हापाळ समय टु अरूतार अदिक अगर आंदुर चाहासतिदार रा ई मात इन गवाही कोळ सकतार कि ना तान रीति इन सब से कट्टर फरीसी समुह अन ऊंद सदस्य अन रूप दा जीवन जीऊसीन. 6 अदिक ईग आ वादा दा आशा अन कारण जो परमेश्वर नाम आप्प दादागोळ से माळीदुन, नान मा मुकदमा नळेत्याद. 7 अदा वादा अन पुरा आगोद आशा हचकु, नाम हन्नेळ गोत्र तान पुरा मन देल ईळ्लक-हागुल परमेश्वर उन स्यावा माळतेला बंदार. हे राजा, ईदा आशा अन बारा दा यहूदी नान मा दोष हचतार. 8 याग कि परमेश्वर सोत्‍तुरी जित्‍ता माळ्यान, रा नीम मान्या ईद मात येती विश्वास इन योग्य समसालुर?” 9  ✡ २६:९ प्रेरितगोळ ८:३; २२:४,५“ना भी खुद विचार माळ तोगीन कि यीशु नासरी इन हेसुर इन विरोध दा ना हापाळ येनारा माळाईन. 10 अदिक ना यरूशलेम दा हिंग अच माळदीन; अदिक प्रधान याजकगोळ से अधिकार ताकोमकु हापाळ सा पवित्र लॉकुरी बंदीगृह दा हाकदीन, अदिक याग आंदुर कोंदकु आगतोगोर रा ना भी आंदुर्द विरोध दा तान सम्मती कोळतोगीन. 11 हर यहूदी सभागृह दा ना आंदरी हापाळ अनली सजा कोळसुस्कु यीशु उन माकळोद विश्वास इक नकार माळली हेळ तोगीन, आंदुर प्रती नान सिट्ट यक्कुल ईरोद कि आंदरी सतुसोर साटी ईल ताका कि ना विदेशी नगरगोळ दा भी होदीन.

12 “ईदा उद्देश इक हुडुकु ना प्रधान याजकगोळ से अधिकार अदिक आग्या-चिट्ठी ताकोमकु दमिश्क इक होगीन; 13 रा हे राजा, हादी दा मदणी इन समय ना आकाश टु सुर्य अन तेज से भी वाळुसकु ऊंद ज्योति, तान अदिक तान सांगुळ नळावाळेर्द नाकु दी चमकुसतेला नोळदीन. 14 याग नाव सप्पा जागा मा बिद्देव, रा ना इब्रानी भाषा दा, नान से ईद अनतेला ऊंद शब्द केळदीन, ‘हे शाऊल, हे शाऊल, नी नानी येती सतुसत्या? नी हिंग माळकु तान तान इक का दुख कोळेत्या ह्यांग वस्ता तान ल्यात तुतारी इन आरू मा होडेत्याद.’ 15 ना अंदीन, ‘हे प्रभु, नी याव हुय?’ प्रभु अंदुन, ‘ना यीशु हुईन, यारी नी सतुसत्या. 16 लेकीन नी येळ, तान कालगोळ मा निदुर; यतिकी ना नीनी इदुरसाटी दर्शन कोटीन कि नीनी आ मातगोळ्द भी सेवक अदिक गवाह ठहरूसाईन, जो नी ईंद नोळ्या, अदिक अदुर साटी भी जो ना नीनी भविष्य दा हेळाईन. 17 अदिक ना नीनी नीन लॉकुर यहूदीगोळ से अदिक गैरयहूदीगोळ से बिळसाईन, यार हात्‍ती ना ईग नीनी कळाईन 18 कि नी आंदुर्द कण्णगोळी तेरद्या कि आंदुर अंधकार देल ज्योति दी, अदिक शैतान इन अधिकार देल परमेश्वर उन दी तिर्गुल; कि आंदुर्द विश्वास इन द्वारा जो नान मा आद आंदुर आंदुर्द पापगोळ्द माफ अदिक परमेश्वर उन निवळुस्द लॉकुर सांगुळ पवित्र स्थान हासिल माळ्यार.’

19 “इदुरसाटी हे राजा अग्रिप्पा, ना आ स्वर्गीय दर्शन इन आग्या टालसीदील, 20  ✡ २६:२० प्रेरितगोळ ९:२०,२८,२९लेकीन पयले दमिश्क इन, बाक यरूशलेम इन, अदिक आग यहूदिया अन सप्पा द्याश इन ईरावाळेर इक, अदिक गैरयहूदीगोळी समझुसतेला ईत्‍तीन, कि पापगोळ से पश्चाताप माळी अदिक परमेश्वर उन दी तिर्गकु मन तिर्गुसोद लायक क्याल्सा माळी. 21 ई मातगोळ्द कारण यहूदी नानी मंदिर दा हुडुकु कैद दा हाकदुर अदिक कोंद बुळोद कोशिश माळतोगोर. 22 लेकीन परमेश्वर उन सहायता देल ना ईंद ताका बन्सकु आईन अदिक स्याणेर धोड्डेर सप्पा मुंदुर मुंद ईल निदुरकु गवाही कोळतीन, अदिक आ मातगोळी बिटकु येनु अनालीन जो भविष्यवक्तागोळ अदिक मूसा भी अंदुन कि आगावाळा आद, 23  ✡ २६:२३ १ कुरिन्थि १५:२०कि मसीह अक दुख नेगोद बिद्दीत, अदिक आवा सब से पयले सोत्‍तुर दा टु जित्‍ता आगकु, नाम यहूदी लॉकुर दा अदिक गैरयहूदीगोळ दा मुक्ति इन ऊजुळ इन बातणी कोट्टान.”

24 याग पौलुस तान बचाव दा ई मातगोळी माताळोन, रा फेस्तुस धोळ्द शब्द देल चिळ्लासकु अंदुन, “हे पौलुस, नी यर्र आय. हापाळ अक्‍कल नीनी यर्र माळबुटाद.”

25 लेकीन पौलुस अंदुन, “हे ग्यानी फेस्तुस, ना यर्र हैलेच, लेकीन सही अदिक सम्सावाळा मातगोळी अनतीन. 26 खुद राजा अग्रिप्पा भी ई मातगोळी जान्सतान अदिक ना पुरा हिम्मत इन सांगुळ ई मातगोळ आऊन से हेळेतीन यतिकी ना पक्‍का जान्सतीन कि ईऊर दा टु यातोदु मात आंदरी पता हैलेच हिंग हैलेच ना हिंग इदुरसाटी अनेतीन कि ईव मात यातोदारा क्वाना दा होचकोमकु आगीदील. 27 हे राजा अग्रिप्पा, येन नी भविष्यवक्तागोळ्द विश्वास माळत्या? हव, ना जान्सतीन कि नी विश्वास माळत्या.”

28 आग अग्रिप्पा पौलुस से अंदुन, “येन नी ईद विचार माळत्या कि ईट सरलता देल अदिक कम समय दा नी नानी मसीह माळ सकत्या?”

29 पौलुस उत्‍तर कोट्टुन, थ्वाळा समय दा अन या यक्कुल समय दा, “परमेश्वर से नान प्रार्थना आद कि ना सिर्फ नी हांगा आगेग ह्यांग ना आईन लेकीन सिवाय ई शंकलीगोळ्द.”

30 आग राजा, शासक, बिरनीके अदिक आंदुर सांगुळ कुरावाळेर निदुरदुर; 31 अदिक ब्यार्र होगकु आपस दा अनली कुरतुर, “ईव मंळसा हिंग रा येनु माळालुन, जो मृत्यु दण्ड या बंदीगृह दा हाक्‍कु आगोद लायक ईरूल.” 32 अग्रिप्पा फेस्तुस से अंदुन, “अगर ईव मंळसा कैसर उक न्याय ईला बेळायदुन, रा बिळ सकोन.”