1 हे वार्टुरा अदिक आकतींगेरा, अगर यावारा मंळसा यातोदारा अपराध दा हुळकु भी आगतान रा नीव जो आत्मिक आईर, नम्रता अन सांगुळ ईत्‍ता मंळसा अक संभाळसी, अदिक तांद भी सावधानी ईटी कि नीव भी परीक्षा दा बिळबाळी. 2 नीव आबुर दाबुर बोझ नेगी, अदिक ईत्‍ता प्रकार मसीह अन व्यवस्था अक पुरा माळी. 3 यतिकी अगर यावारा येनु ईला ईत्‍तुर मा भी तान तान इक येनारा सम्सतान, रा तान तान इक ध्वाका कोळतान. 4 लेकीन हर ऊंद तांद अच क्याल्सा अक जाच कोमुल, अदिक आग दुसरा अन बारा दा ईला लेकीन तांद अच बारा दा आऊक घमण्ड माळोद मवका सिक्‍कीत. 5 यतिकी हर ऊंद मंळसा तांद अच बोझ नेगदान.

6 यारी वचन इन शिक्षा सिकतद, आव सप्पा वळ्लेव वस्तुगोळ दा कलसावाळा अक भागी माळुल.

7 ध्वाका तिनबाळी; परमेश्वर मज्याक दा हार्सकु आगालुन, यतिकी मंळसा जो फसल हच्यान आव अदा कळदान. 8 यतिकी जो तान मय इन साटी हचतान, आव मय इन द्वारा विनाश इन कटनी कळदान; अदिक जो आत्मा अन साटी हचतान, आव आत्मा अन द्वारा अनन्त जीवन इन कटनी कळदान. 9 नीव भला क्याल्सा माळदुर दा साहस बिळबाळी, यतिकी अगर नाव ढिला ईरतीदील रा ठीक समय मा कटनी कळदेव. 10 इदुरसाटी येल ताका समय सिक्‍कीत नाव सप्पा घराना अन सांगुळ वळ्लीद माळेव, विशेष माळकु विश्वासी वार्टुर सांगुळ.

11 नोळी, ना ह्यांग धोळ धोळ अक्षरगोळ दा नीमी तान कय देल लिख्सीन. 12 जो लॉकुर शारीरिक दिखावा चाहासतार आंदुर अच नीम्द खतना माळसुसोर साटी दबाव हाकतार, सिर्फ इदुरसाटी कि आंदुर मसीह अन क्रूस इन कारण सतुस्कु आगबाळुल. 13 यतिकी खतना माळसुसावाळेर खुद रा व्यवस्था मा नळालुर, लेकीन नीम खतना इदुरसाटी माळसुसोद चाहासतार कि नीम शारीरिक दशा मा घमण्ड माळुल. 14 लेकीन हिंग आगबाळुल कि ना दुसरा यातोदारा मात मा घमण्ड माळाईन, सिर्फ नाम प्रभु यीशु मसीह अन क्रूस इन, यार्द द्वारा दुनिया नान नजर दा अदिक ना दुनिया अन नजर दा क्रूस मा येर्सकु आगीन. 15 यतिकी ना खतना अदिक ना खतनारहित येनारा आद, लेकीन व्हाशोद दुनिया. 16 यास ई नियम मा नळदार आंदुर मा, अदिक परमेश्वर उन इस्त्राएल मा शांती अदिक दया आगतेला ईरूल.

17 मुंद नानी याऊ दुख कोळबाळुल, यतिकी ना यीशु अन दागगोळी तान मय दा हुळकु टेटाळतीन. 18 हे वार्टुरा अदिक आकतींगेरा, नाम प्रभु यीशु मसीह अन अनुग्रह नीम आत्मा अन सांगुळ ईरूल. आमीन.