17
थिस्सलुनीके नगर दा
1 बाक पौलुस अदिक सीलास अम्फिपुलिस अदिक अपुल्लोनिया आगकु थिस्सलुनीके दा बंदुर, यल यहूदीगोळ्द ऊंद यहूदी लॉकुर्द सभागृह ईरोद. 2 पौलुस तान रीति इन अनुसार सभागृह दा होदुन, अदिक मुर आराम इन दिन नियम शास्त्रगोळ देल यहूदी लॉकुर सांगुळ झगळा माळदुन; 3 अदिक अऊर अर्थ आसान भाषा दा समझुस तोगोन कि मसीह अक दुख नेगोद, अदिक सोत्तुर दा टु जित्ता माळोद, जरूरी ईरोद; अदिक “ईवा यीशु यार्द बारा दा ना नीमी हेळतीन, मसीह हुन.” 4 आंदुर दा टु येनारा लॉकुर विश्वास माळदुर अदिक पौलुस अदिक सीलास उन सांगुळ मीलुसेदुर. परमेश्वर उन आराधना माळावाळेर हापाळ पुरा गैरयहूदीगोळ भी आंदुर दा मीलुसेदुर, ईंदुर दा मुख्य आर्तेर भी ईरोर,
5 लेकीन यहूदीगोळ जलन देल तुमकु बाजारू लॉकुर दा टु येनारा दुष्ट मंळसागोळी तान सांगुळ दा हुळदुर, अदिक भीळ जमा माळकु नगर दा हल्ला मचुसली कुरतुर, अदिक यासोन उन मान्ना मा चढ़ाई माळकु अदिक कोशिश माळली कुरतुर कि ह्यांगारा तरी पौलुस अदिक सीलास उक लॉकुर मुंद तंदेव. 6 आंदरी अल ईला नोळकु आंदुर ईद चिल्ळासतेला यासोन अदिक येनारा विश्वासी वार्टुरी नगर इन शासकगोळ मुंद जेडुतेला तंदुर अदिक अंदुर, “ई लॉकुर यार सप्पा दी मुसीबत पैदा माळ बुटार, आंदुर नाम नगर दा भी होट बंदार. 7 अदिक यासोन आंदरी तान मान्या ईट्यान. ई सप्पा च्या सप्पा ईद अनतार कि यीशु राजा आन, अदिक कैसर उन नियमगोळ्द विरोध माळतार.” 8 आंदुर लॉकुरी अदिक नगर इन शासकगोळी ईद केळ्सकु भळकुस बुटुर. 9 इदुरसाटी आंदुर यासोन अदिक बाकी लॉकुर से जमानत ताकोमकु आंदरी बिट बुटुर.
बिरीया नगर दा
10 विश्वासी वार्टुर तुरन्त ईळ्लक इन ईळ्लक इच पौलुस अदिक सीलास उक बिरीया कळु बुटुर; अदिक आंदुर अल पोहचुस्कु यहूदीगोळ्द सभागृह दा होदुर. 11 आ लॉकुर रा थिस्सलुनीके अन्द लॉकुर से भला ईरोर, अदिक आंदुर धोळ लालसा देल वचन ग्रहण माळदुर, अदिक रोज शास्त्रगोळ दा अध्ययन माळ माळकु नोळोर कि जो ई मातगोळ पौलुस हेळदुन अव सही आव का ईला. 12 अदिक इदुर परिणाम स्वरूप हापाळ सा यहूदीगोळ अदिक मानवाईक यूनानी आर्तेर मंळसागोळ भी विश्वास ग्रहण माळदुर. 13 लेकीन याग थिस्सलुनीके अन्द यहूदी जान्स कोंडुर कि पौलुस बिरीया दा भी परमेश्वर उन वचन केळ्सतान, रा अल भी बंदकु लॉकुरी भळकुसली अदिक दंगा माळली कुरतुर. 14 आग विश्वासी वार्टुर तुरन्त पौलुस उक विदा माळदुर कि समुद्र अन्द किनारा होटोगुल; लेकीन सीलास अदिक तीमुथियुस अल्या ईतोदुर. 15 पौलुस उक विश्वासी वार्टुर एथेंस ताका ओतुर; अदिक सीलास अदिक तीमुथियुस उन साटी आंदुर पौलुस उन से ईद आग्या ताकोमकु विदा आदुर कि आंदरी नान हात्ती जल्दी से जल्दी कळुल.
एथेंस नगर दा
16 याग पौलुस एथेंस दा तीमुथियुस अदिक सीलास उन हादी कायोन, अदिक एथेंस नगर इक मूर्तीगोळ देल तुमकु नोळकु आव हापाळ निराश आगेदुन. 17 इदुरसाटी आव यहूदी लॉकुर्द सभागृह दा यहूदीगोळ अदिक गैरयहूदीगोळ जो परमेश्वर उन आराधना माळतोगोर, अदिक चौक दा होगा बरावाळेर लॉकुर आऊन से सिकतोगोर आंदुर से हर रोज झगळा माळतोगोन.
18 आग इपिकूरी अदिक स्तोईकी गुरुगोळ दा टु थ्वाळासा गुरु आऊन से तर्क माळली कुरतुर, अदिक येनारा अंदुर, “ईव अग्यानी येन अनोद चाहासतान?” लेकीन दुसरा अंदुर, आव “अन्य देवतागोळ्द प्रचारक मालूम बिळतान.” यतिकी आव यीशु उन अदिक आऊन पुनरूत्थान इन खुशखबरी केळ्सतोगोन. 19 आग आंदुर पौलुस उक तान सांगुळ अरियुपगुस इन नगर दा ओतुर अदिक केळदुर, “येन नाव जान्स सकतेव कि ईद व्हाशोद शिक्षा जो नी हेळत्या, येन हुन? 20 यतिकी नी अनोखा मातगोळी नामी केळ्सत्या, इदुरसाटी नाव जानसोद चाहासतेव कि ईऊर्द अर्थ येन आद.” 21 इदुरसाटी कि सप्पा एथेंसवासी अदिक परदेशी जो अल ईरतोगोर, सप्पा आऊन व्हासा व्हासा मातगोळी केळली अदिक हेळदुर दा समय बितुसतोगोर.
22 आग पौलुस अरियुपगुस उन नगर इन सभा अन न्याड्या दा निदुरकु अंदुन, हे एथेंस इन लॉकुरा, ना नोळतीन कि नीव हर प्रकार देल धार्मिक आईर. 23 यतिकी ना नगर दा टेटाळतेला याग नीम्द आराधना माळोद जागागोळी नोळीन, रा ऊंद हिंग वेदी भी नोळदीन, यदुर मा लिख्सकु ईरोद, अनजाना परमेश्वर उन साटी. इदुरसाटी यार्द नीव बिना नोळ्द आराधना माळतीर, ना नीमी आऊंद बारा दा हेळतीन. 24 ✡ १७:२४ प्रेरितगोळ ७:४८या परमेश्वर पृथ्वी अदिक अदुर सप्पा वस्तुगोळी माळदुन, आव स्वर्ग अदिक पृथ्वी इन स्वामी आन, अदिक आव कय इन माळ्द मंदिरगोळ दा ईरालुन; 25 ना यातोदु वस्तु उन जरवत इन कारण मंळसागोळ्द कयगोळ्द स्यावा ताकोमतान, यतिकी आव खुद अच सप्पा मुंदरी जीवन अदिक श्वास अदिक सप्पा येनारा कोळतान. 26 आव ऊंद अच मंळसा द्वारा पुरा मंळसागोळ्द पैदा माळदुन अदिक सप्पा पृथ्वी मा आव ईरसकुल इदुरसाटी आव माळदुन. अदिक आव पयले टुच लॉकुर्द समय निश्चित माळ कोंडान अदिक आंदुर निवास इन यल आंदुर ईरतार अदुर्द सीमागोळी कट बुट्टुन, 27 ईद इदुरसाटी माळदुन कि लॉकुर परमेश्वर उक ढुंढसुल, आग सकतद कि आंदुर आऊन ताका पोहचुस्कु हासिल माळ कोमुल, तरी भी आव नाम दा टु यारदु से दुर हैलेच. 28 जसा यावारा अंदान कि
नाव आऊंदा जित्ता ईरतेव, अदिक नळुतेला वयाळतेला ईरतेव, अदिक आऊन दा अच नाम अस्तित्व आद.
ईदा प्रकार खुद नीम्द अच थ्वाळासा कविगोळ भी अंदार,
नाव रा आऊंदा औलाद हुयेव.
29 इदुरसाटी परमेश्वर उन औलाद आगकु नामी ईद समसोद उचित हैलेच कि परमेश्वर उन दिव्य रूप व्हान्ना या पैस्या या कल्ल इन घाई आद, जो मंळसा अन्द कारीगरी अदिक कल्पना देल माळकु आगीदाव. 30 “इदुरसाटी परमेश्वर याग लॉकुर परमेश्वर उक ईला जानसोर आ समयगोळ मा ध्यान कोटीदील, लेकीन ईग हर जागा सप्पा मंळसागोळी मन तिर्गुसोद आग्या कोळतान. 31 परमेश्वर ऊंद दिन निश्चित माळ्यान आ दिशी आव तान निवळुस्द ऊंद मंळसा अन द्वारा सच्चाई देल दुनिया अन न्याय माळ्यान अदिक ई मात इन प्रमाण आव आ मंळसा अक सोत्तुर दा टु जित्ता माळकु सप्पा मुंदुरी कोटान.”
32 सोत्तुर दा टु जित्ता आगोद इन मात केळकु थ्वाळासा लॉकुर पौलुस से मज्याक माळली कुरतुर, लेकीन दुसरा थ्वाळासा लॉकुर अंदुर, “नाव ईद मातगोळ नीन से केळोद चाहासतेव.” 33 ईदुर मा पौलुस आंदुर न्याड्या दा टु होटबुटुन. 34 लेकीन थ्वाळासा मंळसा आऊन सांगुळ मीलुसेदुर, अदिक विश्वास माळदुर; यारदा दियुनुसियुस जो नगर सभा अन सदस्य ईरोन, अदिक दमरिस हेसुर इन ऊंद आर्त ईरोर, अदिक आंदुर सांगुळ मात्त दुसरा लॉकुर ईरोर.