1 Lau Paulo be Keriso Iesu ena aposetolo tauna Dirava ena ura dainai. Dirava ese lau ia siaia, Keriso Iesu lalonai ia gwauhamata maurina do lau harorolaia totona. 2 Timoteo e, lauegu natuna lalokau, inai revareva oi dekenai lau torea inai.

Iseda Tamana Dirava bona Keriso Iesu iseda Lohiabada dekena amo hariharibada, bogahisihisi bona maino do oi abia.

3 Lauegu sene taudia ese Dirava idia badinaia, bona lau danu Dirava ena kara lau badinaia, mai egu laloa maoromaoro danu. Dirava lau tanikiu henia noho oi dainai. Oibe, Dirava lau guriguri henia noho negadia ibounai, dina bona hanuaboi, oi lau laloa noho. 4 Oiemu tai lau laloa, bona lau ura bada oi do lau itaia, do lau moale bada totona. 5 Oiemu abidadama lau laloa, ia be abidadama momokani. Inai bamona abidadama be oiemu tubuna hahine Loi bona oiemu sinana Eunike edia lalona dekenai ia noho. Lau diba momokani, harihari danu inai bamona abidadama be oiemu lalona dekenai ia noho. 6 Unai dainai lau ura oiemu harihari gauna, inai goada, Dirava ese oi dekenai ia henia gauna, be do oi laloaboio lasi. Guna lau ese egu imana oiemu kwarana dekenai lau atoa neganai, inai harihari gauna oi abia. To hari lau ura inai oiemu lalona dekenai ia noho harihari gauna do oi habadaia, hegeregere tau ta ese lahi ia hiriria neganai lahi ia habadaia bamona. 7 Badina be Dirava ese gari laumana ita dekenai ia henia lasi, to siahu bona lalokau bona aonega Laumana ita dekenai ia henia vadaeni.

8 Unai dainai, iseda Lohiabada ena sivarai do oi gwauraia hedinarai, do oi hemarai lasi. Lau be Sivarai Namona dainai dibura ruma dekenai lau noho, ani? Lau totona do oi hemarai lasi. Lasi, to Dirava ena goada dekena amo do oi haheauka noho, bona lau danu Sivarai Namona totona do ita hisihisi hebou. 9 Dirava ese ita ia hamauria vadaeni, bona ita ia boiria, ita be iena bese korikori taudia totona. Inai bamona ia karaia, iseda kara namodia dainai lasi, to iena ura bona iena hariharibada dainai. Iena hariharibada be ita dekenai Dirava ese ia henia, Keriso Iesu dekena amo, nega gunaguna momokani, tanobada ia do karaia lasi neganai. 10 To harihari, iseda Hamauria Tauna Keriso Iesu ia mai dainai, inai hariharibada be ita dekenai ia hedinarai vadaeni. Keriso ese mase ena siahu ia haorea vadaeni, bona iena Sivarai Namona dekena amo mauri hanaihanai ia hedinaraia vadaeni.

11 Dirava ese lau ia abia hidi, iena aposetolo bona iena hadibaia tauna, Sivarai Namona do lau harorolaia totona. 12 Bona inai dagi dainai hisihisi momo lau abia noho. To lau daradara sisina lasi, badina be lau abidadama henia Tauna lau diba momokani. Bona lau diba, lau dekenai ia henia gaukara be ia ese ia naria diba, ela bona iena Dina Badana do ia ginidae.

13 Hereva momokani, oi dekenai lau hadibaia gaudia do oi badinaia noho, bona idia edia murinai do oi raka. Keriso Iesu danu ita hakapua tamona dainai, ita be iena abidadama bona lalokau lalonai ita noho. Inai abidadama bona lalokau lalonai do oi gini noho. 14 Oiemu dagi, Dirava ese oi dekenai ia henia gauna do oi dogoatao noho, Lauma Helaga ena siahu dekena amo. Inai Lauma Helaga be iseda lalona dekenai ia noho.

15 Oi diba vadaeni, ani, Asia dekenai idia noho taudia ibounai ese lau idia rakatania, Fugelo bona Heremogene danu.

16 Onesiporo mai ena ruma taudia danu, be Lohiabada ese do ia bogahisihisi henidia, badina be Onesiporo ese nega momo egu lalona ia hagoadaia, bona lau be dibura ruma lalonai lau noho, to ia be lau totona ia hemarai lasi. 17 Ia be Roma dekenai ia ginidae neganai, lau ia tahua goadagoada ia mai bona lau ia davaria. 18 Lohiabada ena bogahisihisi do ia davaria Dina Badana neganai. Efeso dekenai Onesiporo ese egu hesiai gaukara ia karaia sivaraina, be oi diba vadaeni, ani?