10
Da One In Charge
Goin Take Kea His Peopo
Goin Take Kea His Peopo
1 Tell Da One In Charge fo sen rain spring time.
Cuz him da One dat make da clouds wit thunda.
He goin sen rain showas fo da peopo.
He make da plants grow good inside da fields fo erybody.
2 ✡ 10:2: Matt 9:36; Mark 6:34Da small house kine idol gods
Ony tell you tings dat no mean notting
Wen you sad.
Da kahuna guys dat like find out wass goin happen,
See tings dat not true.
Dey talk bout dreams dat bulai peopo.
Dey try make da peopo feel good inside, but no can.
Az why my peopo go all ova da place jalike da sheeps.
Dey get hard time cuz dey no mo sheep guy fo take kea dem.
3 Da One In Charge tell,
“I stay real huhu wit da sheep guys dey get,
An I goin punish da leada guys.
Cuz me Da One In Charge, Da God Ova All Da Armies,
I goin take kea da Judah ohana. Dey jalike my sheeps.
I goin make dem strong jalike one big war horse.
4 One guy az importan jalike one corna block stay importan fo one building goin come from da Judah ohana.
One guy goin stay importan
Jalike one tent peg stay importan fo one tent,
An importan jalike one bow stay importan fo fight.
Ery leada guy goin come from Judah!
5 Togedda dey goin be strong jalike army guys
Dat step all ova da ones dey fight in da mud.
Cuz Da One In Charge stay wit dem,
Dey goin fight an win even ova da guys on top da horses.
6 “I goin make da Judah ohana come strong.
I goin get da Joseph ohana outa trouble.
I goin bring dem back
Cuz I get love an pity fo dem.
Dey goin come jalike I neva leave dem.
Cuz me Da One In Charge dea God,
An I goin help dem wen dey pray to me.
7 Da Efraim guys goin come jalike strong guys dat fight.
An dey goin stay good inside jalike wen dey drink wine.
Dea kids goin see wat happen an stay good inside.
Dey goin stay good inside cuz a Da One In Charge.
8 I goin make one signal fo dem come,
An bring da Efraim peopo togedda.
I goin pay da price fo get um outa trouble,
An dey goin come mo an mo plenny jalike befo time.
9 No matta I wen scatta dem wea da odda peopos stay,
Still yet dey no goin foget me from da lands far away.
Dem an dea kids goin stay alive,
An dey goin come back.
10 I goin bring da Efraim peopo back from Egypt,
An from Assyria.
I goin bring dem togedda inside da Gilead an Lebanon land,
Till no mo enuff room fo dem ova dea.
11 Dey goin go thru trouble jalike thru one ocean.
But I goin make da wild ocean waves come quiet.
An da deep places inside da Nile Riva goin come dry.
Da Assyria peopo get big head, but I goin bring um down,
An da Egypt king goin get wipe out.
12 I goin make dem come strong army guys,
Cuz me Da One In Charge, an I strong.
Wen dey march, dey goin use my name.”
Az wat Da One In Charge tell.