18
Babylon Town Get Wipe Out
1 Afta dat, I look, an jalike one dream, I spock anodda angel messenja guy. He stay come down from da sky. He get plenny powa. An da light dat come from him make da earth light up all ova. 2 ✡ 18:2 a: Isa 21:9; Jer 51:8; JShow 14:8; b: Isa 13:21; Jer 50:39Da angel tell wit one loud voice,
“Babylon wen get wipe out!
Dat big town pau awready!
Now inside dea ony get bad kine spirits,
An all kine pilau scavenja birds stay hide dea too!
3 ✡ 18:3: Isa 23:17; Jer 51:7Da Babylon peopo, jalike dey one wahine,
An all da diffren peopos all ova da world,
Jalike dey fool aroun wit her.
She make um do any kine,
Jalike she make um drink too much strong wine
Fo make um come real piloot!
Da kings inside da world wen fool aroun wit her too.
An da trader guys all ova da world
Wen come rich from all kine rich stuffs
Dat Babylon get from dem fo ony her.”
4 ✡ 18:4: Isa 48:20; Jer 50:8; 51:6, 45Den I hear anodda voice from da sky. God tell,
“Eh, my peopo, get outa dea!
So you guys no goin do
Da bad kine stuff da peopo inside Babylon do!
An you no goin get all da big troubles dat town goin get.
5 ✡ 18:5: Start 18:20-21; Jer 51:9Cuz all da bad kine stuff da Babylon peopo stay do,
Real plenny, jalike dey stack up to da sky!
I know all da tings dey do dat no stay right.
6 ✡ 18:6: Songs 137:8; Jer 50:29“Pay um back double!
Dass jalike you make dem one drink inside dea cup, two times mo strong!
7 ✡ 18:7: Isa 47:7-9Jalike da Babylon wahine make um so she look plenny awesome,
An da peopo dea stay good inside,
Cuz dey get all kine rich stuffs,
Make um suffa an come all sore inside.
Da Babylon wahine talk big inside lidis,
‘I stay on top my throne jalike one queen.
I not one widow.
An I no goin eva come sore inside an cry!’
8 “Dass why in one day all da big kine troubles
Goin come on top Babylon, jalike da wahine.
All kine sick goin come.
Da Babylon peopo goin come all kine sore inside.
No mo notting fo eat.
Fire goin come an burn um up.
Cuz God, Da One In Charge, get all kine powa,
An he goin come fo judge Babylon!”
9 ✡ 18:9: Ezek 26:16-17Az why da kings from all ova da world dat wen fool aroun wit da Babylon peopo, an dat wen do any kine bad kine stuff wit dem, dey goin see da smoke from da fire dat stay burn dat town. Dey goin cry an come sad inside. 10 Dey goin stan far away, cuz dey real sked wen dey see da Babylon peopo suffa. An dey goin tell,
“Horraz! Horraz!
Babylon, da big town wit plenny powa!
An in one hour, you wen come wipe out!”
11 ✡ 18:11: Ezek 27:31, 36Same ting, da trader guys, dey goin cry an come sad inside, cuz no mo nobody stay buy all dea stuffs no moa:
12 ✡ 18:12: Ezek 27:12-13, 22gold kine stuff, silva, jewel stones dat cost plenny, pearls,
fancy linen kine cloth, purple cloth, silk cloth, red cloth,
all kine fancy wood, an stuffs from ivory, wood,
bronze, iron, an marble stone dat cost plenny,
13 cinnamon, odda spice, incense,
myrrh kine perfume, Arabia kine incense,
wine, olive oil, fancy flour, wheat,
cows, sheeps, horses, fancy wagon,
prisonas an odda peopo fo come slaves.
14 Da trader guys goin tell,
“All da fancy kine stuff you wen like get fo ony you,
All pau!
All yoa rich an awesome stuff no mo awready!
You no goin eva see um no moa!”
15 ✡ 18:15: Ezek 27:31, 36Da trader guys dat wen sell da Babylon peopo dat stuff an come rich, dey goin stan far, cuz dey real sked wen dey see da peopo suffa. Dey goin cry an come sad inside. 16 Dey goin tell,
“Horraz! Horraz!
Babylon, da big town!
Look jalike one wahine wit fancy kine linen clotheses,
Purple an red clotheses,
An gold, jewel stones, an pearls all ova!
17 ✡ 18:17: Isa 23:14; Ezek 27:26-30In one hour, all da kine rich stuffs wen come wipe out!”
Da captains from all da boats, da sailas, erybody dat ride boat, erybody dat work aroun da ocean, dey all goin stay far. 18 ✡ 18:18: Ezek 27:32Wen dey spock da smoke dat come from dat town, dey goin tell, “Neva had one big town like dis big town befo, eva!” 19 ✡ 18:19: Ezek 27:30-34Dey throw dirt on top dea heads fo show dey sad,
An dey cry an stay sad inside. Dey talk loud an tell,
“Horraz! Horraz!
Babylon, da big town!
All us guys dat wen get boats on top da ocean,
Us come rich, cuz we bring rich stuffs to Babylon!
In one hour dat town wen get wipe out!”
20 ✡ 18:20: Rules2 32:43; Jer 51:48Den I hear dis:
“Eh! All you peopo dat stay wit God inside da sky,
Stay good inside bout wat wen happen!
God spesho peopo, an da guys dat God wen sen all ova,
An da guys dat talk fo God,
Stay good inside!
Da Babylon peopo wen make any kine to you guys,
But God wen come fo judge dem!”
21 ✡ 18:21 a: Jer 51:63-64; b: Ezek 26:21Den one strong angel guy pick up one mangus stone, dass big jalike one millstone. He throw um inside da ocean. Den he tell,
“Dass how Babylon, da big town, goin come wipe out real fas!
An nobody goin eva see um no moa!
22 ✡ 18:22: Ezek 26:13; Isa 24:8✡ 18:22: Jer 7:34; 25:10No mo nobody goin eva play music inside yoa town no moa.
No mo harp, o flute, o trumpet.
No mo nobody goin hear da music no moa.
No mo da guys dat know how fo make fancy kine stuffs.
Nobody goin hear da noise from da millstone
Dat grind flour fo yoa bread.
23 No mo light from da lamp goin shine inside yoa town one mo time.
No mo bride an groom.
Yoa trader guys was da mos importan guys inside da world!
But you wen make da diffren peopos all ova da world go da wrong way!
24 ✡ 18:24: Jer 51:49Inside Babylon, dass wea dey wen kill da guys dat talk fo God,
An da peopo dat stay spesho fo God,
An all da odda peopo dey wen kill inside da world—
Dass wea dey wen bleed an mahke.”
✡18:2 18:2 a: Isa 21:9; Jer 51:8; JShow 14:8; b: Isa 13:21; Jer 50:39
✡18:3 18:3: Isa 23:17; Jer 51:7
✡18:4 18:4: Isa 48:20; Jer 50:8; 51:6, 45
✡18:5 18:5: Start 18:20-21; Jer 51:9
✡18:6 18:6: Songs 137:8; Jer 50:29
✡18:7 18:7: Isa 47:7-9
✡18:9 18:9: Ezek 26:16-17
✡18:11 18:11: Ezek 27:31, 36
✡18:12 18:12: Ezek 27:12-13, 22
✡18:15 18:15: Ezek 27:31, 36
✡18:17 18:17: Isa 23:14; Ezek 27:26-30
✡18:18 18:18: Ezek 27:32
✡18:19 18:19: Ezek 27:30-34
✡18:20 18:20: Rules2 32:43; Jer 51:48
✡18:21 18:21 a: Jer 51:63-64; b: Ezek 26:21
✡18:22 18:22: Ezek 26:13; Isa 24:8