145
Da One In Charge, Wat Kine God Him
David tell good tings bout Da One In Charge.
1 You da God fo me! You da King!
I goin tell erybody dat you da one!
All da time, I goin tell peopo
Wat kine god you,
Dat you do good tings!
2 Ery day, I goin tell
Dat you do good tings.
I goin tell good tings
Bout wat kine god you
All da time.
3 Da One In Charge, he da One!
Real good fo tell good tings bout him!
He real big, no can figga out
Eryting bout him!
4 Eh! You Da One In Charge!
Da peopo dat stay alive now,
Dey goin tell dea kids good tings
Bout all da stuffs you wen do,
An afta dem, dea kids kids
Goin tell dea kids too.
Dey goin make um all know how strong you!
5 I goin tink plenny
Bout how awesome you stay,
Az why I get choke respeck fo you!
I goin tink plenny bout da awesome tings you do!
6 Erybody goin talk bout how strong you
Fo do da awesome kine tings
Dat blow dea mind!
I goin tell da story ova an ova
Bout da awesome tings you do!
7 Ova an ova, peopo no goin hold back
Fo tell wat dey rememba,
Bout how plenny good tings you do.
Dey goin stay real good inside an tell
How you erytime do da right ting!
8 Da One In Charge, he real good
Fo give peopo chance.
He get choke pity fo dem.
He no come huhu real fas.
He stay tight wit his peopo foeva.
9 Da One In Charge, he do good tings
Fo erybody!
He show love an pity
Fo eryting he wen make!
10 Eh! You Da One In Charge!
All da tings you wen make,
Dey goin tell good tings bout you.
Da peopo dat stay tight wit you,
Dey goin tell da good tings
You do fo dem.
11 Dey goin talk bout
How awesome eryting stay
Cuz you get da powa fo be king.
Dey goin talk plenny
Bout how strong you stay.
12 Dey talk lidat fo make shua
All da peopo know
Bout da tings you do cuz you strong,
An cuz da powa you get fo be king
Real awesome,
Erybody get respeck fo you!
13 Da powa you get fo be king,
Dat powa goin be lidat foeva!
Da right you get fo stay in charge
A da peopo right now,
Goin be fo dea kids too,
An fo dea kids kids!
Da One In Charge, he erytime do
Wat he tell he goin do,
An eryting he do,
He stay tight wit his peopo.
14 Wen peopo fall down,
Da One In Charge let um lean
On top him fo dem stan up.
Jalike dey all bend ova
Wit heavy kine stuffs fo carry,
An he help um stan up.
15 Eh God! Jalike erybody
Stay looking at you,
An dey stay waiting fo you help dem.
You da one give um dea food
Wen dey need um.
16 Wen you open yoa hands,
You give stuff to eryting dat stay alive
Fo dem no need notting no moa.
17 Da One In Charge, eryting he do,
He do wass right.
An no matta wat he do,
He stay tight wit eryting he make.
18 Da One In Charge, he stay ready fo help
All da peopo dat yell fo him help um.
He stay nea erybody
Dat tell him fo help um
An him no bulai dem.
19 Fo da peopo dat feel jalike dey sked
Wen dey in front Da One In Charge,
He do da ting dass
Da bestes ting fo dem.
Wen dey yell fo him help dem, he lissen,
An he get um outa trouble.
20 Da One In Charge take good kea
A all da peopo dat get
Love an aloha fo him.
But he wipe out da peopo
Dat stay do wass wrong.
21 Me, I goin tell good tings
Bout Da One In Charge!
I like fo eryting dat stay alive,
Tell bout da good tings he do fo dem,
Cuz dey know wat kine god him,
Dat he stay good an spesho,
An all dat goin be lidat, foeva!