Book Numba Four
90
(Songs 90–106)
God Stay Foeva, But Peopo Not Lidat
Moses, da guy dat stay all out fo God, wen pray lidis.
1 Eh Boss!
From oua ancesta guys time till now,
You jalike oua home!
2 Befo had mountains,
Befo you make da world
An all da diffren lands,
Befo had time even,
You stay God fo real kine.
An you goin stay God foeva!
3 You da One make peopo come dirt
One mo time wen dey mahke.
You tell, “You peopo, time awready
Fo you come dirt jalike befo time!”
4 ✡ 90:4: 2Pet 3:8Da way you see um, tousan year pass
Jalike was yestaday,
Jalike couple hours nite time.
5 You knock out peopo
Fo make dem mahke,
So dey donno wass happening.
Da peopo, dey jalike da grass
Dat come up morning time.
6 Jalike wen da sun come up,
Get new flowa,
But befo da sun go down,
Da grass come all junk an dry up.
7 Us peopo, same ting,
Wen you come huhu wit us,
Jalike us had it awready.
Wen you get mad,
Us come sked plenny.
8 All da time, us guys do tings
We get da blame fo.
But you know, right den an dea.
Us guys do bad tings
An hide um from you.
But you see um,
Jalike get one spotlight on top um.
9 Wen you stay huhu wit us guys,
Den all da time us guys live,
Ony come poho.
Life come pau real fas, jalike one moan,
All da year dat we stay.
10 Da time us get fo live, ony seventy year,
Maybe eighty, if we strong.
But no matta how long us guys live,
Da bestes year,
Still make us guys come real tired
An give us plenny humbug.
Cuz da year pass real fas,
Jalike we fly away.
11 Eh! You In Charge!
No mo nobody undastan fo real kine
How strong you, wen you get mad!
Nobody undastan
How plenny sked us gotta be,
Wen you come real mad!
12 So den, help us guys fo know
How much time we get fo real kine.
Dass how we goin come mo smart
Fo know wat fo do erytime.
13 Eh You In Charge!
So, how long you goin stay huhu
Wit us guys?
Try change yoa mind an show pity
Fo us guys dat work fo you!
14 Ery day wen da sun come up,
Let us guys know fo shua
Dat you stay tight wit us!
Den, all da time we goin live,
We goin yell cuz we feel good inside.
15 Fo all da days
Dat you wen give us hard time,
Make us guys feel good inside
Da same numba days,
Fo all da years dat us wen see
Bad tings happen.
16 Us guys dat work fo you,
We like see da tings you do,
We like fo oua kids see
How awesome you stay.
17 Eh God! You da Boss fo us guys!
We like you make real nice
To us guys!
Da work us do,
Make um come out good.
Az right, make all dat work we do
Come out good!