88
One Sad Song
One Korah ohana kine Song Fo God. Fo da main music guy. Heman from da Ezra ohana wen make dis teaching kine song.
1 Da One In Charge, you da God
Dat get me outa trouble.
Day an nite time I yell fo help
In front you,
2 Try lissen my prayer
Wen I yell to you fo help me!
3 Get choke plenny bad tings
Dat happen to me
An I no can handle dem.
Jalike I litto mo go
Inside da Mahke Peopo Place.
4 Peopo tink, me one a da ones
Dat stay going down
Inside da Deep Dark Hole.
I wen come one guy
Dat no stay strong no moa.
5 I jalike one mo mahke guy dat get kill
An dey throw us all inside one grave,
Jalike you donno us guys no moa,
Jalike you no even rememba who us.
Cuz all us guys stay cut off from you,
An you no help us.
6 You wen put me down,
Inside da bottom a da Deep Dark Hole.
7 You plenny huhu, jalike you smash me,
An all yoa big waves poun me down.
(Time out fo da music.)
8 You make my frenz stay
Far from me.
You make me look pilau to dem.
You no let me get outa dis!
9 My eyes, all poho
Cuz I stay sad inside.
Still yet, ery day I yell fo you help me,
An I put up my hands fo pray to you,
Da One In Charge.
10 Fo shua, you no do awesome kine tings
Fo da mahke peopo!
Fo shua, da mahke peopo spirits
No goin tell dat you da greates!
(Time out fo da music.)
11 No way, da mahke peopo
Inside dea graves
Goin tell erybody
Dat you stay tight wit yoa peopo!
Inside da Deep Dark Hole,
No mo nobody goin tell
Dat dey trus you!
12 How da ones dat stay
Inside da dark place
Goin know da awesome tings you do?!
No way!
Inside dat place, you foget awready
Bout all da peopo dea!
How dey goin know dat you erytime
Judge peopo da right way?! No can!
13 But me, I stay yell fo you help me,
Da One In Charge!
Morning time, wat I pray fo
Come in front you.
14 Eh! You Da One In Charge!
How come you make
Jalike you donno me?!
How come you no even show
Yoa face to me?!
15 From small kid time, me pooa ting,
An I litto mo mahke all da time!
I stay suffa, cuz I real sked a you,
An I stay bum out an donno wat fo do.
16 Wen you stay huhu wit me,
I feel I pounded down.
Wen you do tings
Dat make me come sked,
I no can do notting.
17 All day, da tings you do,
Az jalike wen da big watta
Come aroun da house,
An eryting happen to me
All da same time.
18 You make my frenz
An da odda peopo I love
Stay far away from me.
I ony know da dark places.