77
God Help Peopo Wen Dey Get Trouble
Fo Jedutun, da main music guy. One Asaf kine Song Fo God.
1 I stay yell to God cuz I stay sad inside!
I yell to him fo him lissen me.
2 Wen I get hard time,
I pray to my Boss
Fo him show me wat I gotta do.
All nite, I put up my hands fo pray,
An no come tired.
But inside, I no can res.
3 I tink bout God, an I moan.
I tink plenny bout stuff,
An jalike I pass out inside.
(Time out fo da music.)
4 You make my eyes stay open!
Plenny tings bodda me,
Az why I no can even talk!
5 I no foget how was befo time,
An I tink bout how was
Long time befo time.
6 I no foget how befo time
I wen sing, nite time.
I tink real plenny,
An inside, I tink “Wassup?”
7 But now, I tell: “I donno bout my Boss.
Maybe he goin throw me out foeva!
O maybe he no goin like me bumbye!
8 Maybe God no like
Stay tight wit his peopo no moa!
Maybe da ting he wen promise fo do,
He no goin do um now, o layta!
9 Maybe God foget how fo give chance!
Maybe he stay huhu,
An no show pity no moa!”
(Time out fo da music.)
10 I tell dis too:
“Da ting dat bodda me
Da mostes, is dis:
Da God Dass Mo Importan
Den All Da Odda Gods,
He use his powa now fo do
Diffren kine stuff den befo time.”
11 But you know wat, Da One In Charge?!
I goin no foget all da tings
You wen do awready.
I goin tink bout
Da awesome kine stuff
You wen do befo time.
12 All da tings you stay do,
I goin tink bout um ova an ova,
An try fo tink
Wat kine work you stay do.
13 God, da way you do stuff,
stay real good an spesho.
No mo anodda god
Dat stay big like you!
14 You, da God dat stay do
Awesome kine tings.
You make all da diffren peopos know,
How strong you!
15 You wen use yoa powa
Fo get yoa peopo outa trouble,
Da peopo dat get Jacob
An Joseph fo dea ancesta guys.
(Time out fo da music.)
16 Eh God! Da ocean wen shake,
Jalike he see you an come sked.
All da way to da bottom a da ocean,
Jalike da watta ack sked.
17 Da clouds wen make
Plenny rain an thunda,
Da lightnings go all ova da place
Jalike you shooting arrows.
18 Yoa thunda wen make noise
Jalike da war wagon wheels.
Da lightning shine light
All ova da world.
Get big earthquake too.
19 Da way you wen go
was right thru da ocean.
Yoa road, wea get da big watta,
Nobody know az was yoa footprints.
20 You wen show yoa peopo wea fo go
Jalike one sheep guy.
You wen use Moses an Aaron
Fo do all dat.