64
God Punish Da Ones Dat Talk Stink
Fo da main music guy,
one David kine Song Fo God
one David kine Song Fo God
1 Eh God, I like tell
Wat stay bodda me, so lissen!
I stay sked an shaking
Cuz a da ones dat stay agains me.
Make shua I no mahke!
2 Hide me, so dey no can find me,
Da ones dat stay make secret plan
Fo do someting bad to me,
Da ones dat stay all amp up
Fo hurt me.
3 Dey make ready fo tell
Tings dat hurt plenny,
Jalike dey stay make dea swords sharp.
Dey tink how fo talk bad
An make eryting come bad,
Jalike dey make ready
Fo shoot poison arrows.
4 Dey hide fo shoot arrows
At guys dat no bodda nobody.
Dey jump out an shoot um,
An dey no sked.
5 Dey make one plan fo do bad tings,
An dey make shua dey do um.
Dey talk story plenny bout how
Dey goin put up dea traps.
Dey tell, “Nobody goin see us!”
6 Dey make one plan fo do
Real bad kine tings, an tell,
“Us guys wen plan um out real good!”
Fo shua, real sly kine
Wat peopo tink, you know!
7 But God, he goin shoot dem
Befo dey know wassup!
His arrows goin hurt um plenny.
8 Da tings dey tell,
All goin come back to dem
An make um wipe out.
All da peopo dat see dem
Goin run away sked.
9 All da peopo goin come sked.
Dey all goin talk bout da tings
Dat God stay make happen,
Dey goin undastan wat God wen do.
10 Da peopo dat stay do wass right,
Dey goin stay real good inside
Cuz a Da One In Charge.
Dey goin stay tight wit him,
So den he no goin
Let notting hurt dem.
Erybody dat get
One good heart fo do wass right,
Dey goin tell dat Da One In Charge,
He da bestes!