59
Da Peopo Dat Stay Agains Me
Fo da main music guy. One David kine song dat David wen sing wit da tune “No Wipe Um Out” wen get trouble, aroun da time King Saul sen army guys fo scope out David house fo murda him
1 Eh God! You da God fo me!
Get me outa trouble
From da peopo dat stay agains me!
Wen dey come fo attack me,
Make shua dey no hurt me!
2 Get me outa trouble
From da peopo dat like do bad tings!
Help me
Fo da peopo dat like kill me,
No can!
3 Try look! Dey stay hide
An wait fo jump me an kill me.
Dey get plenny powa,
An dey come togedda agains me.
Eh! You Da One In Charge!
I neva do notting
Fo make dem guys come huhu,
I neva do notting bad to dem.
4 I neva do notting wrong,
But dey rush me fo bus me up!
Do someting fo help me!
See wat stay happen to me!
5 You, you Da One In Charge.
You da God Ova All Da Armies
You da God fo da Israel peopo.
I like you do someting
Fo punish all da diffren peopos!
No make nice to all da peopo
Dat ack jalike dey oua frenz,
But den dey do bad tings to us!
(Time out fo da music.)
6 Ery day sunset time, dey come back
An make big noise, jalike dogs.
Dey go all aroun da town.
7 Look dem ova dea!
Dey talk bad plenny.
Da tings dey tell,
Sharp jalike swords fo hurt peopo.
But dey tink,
“Eh! no mo nobody goin hear!”
8 But you, Da One In Charge,
You ony laugh at dem.
You make fun a all da diffren peopos.
9 You da One dat make me strong.
Dass why I stay wait fo you come,
Cuz you God, you da one
Dat no let me get hurt,
Jalike you one strong wall
Fo proteck me.
10 Da God dat erytime stay tight wit me,
He goin show up wea I stay
Fo help me.
Da peopo dat scope me out fo attack me,
God goin let me see
Wat he goin do to dem.
11 I no like fo you kill da bad kine peopo,
Cuz if you jus kill um,
My peopo goin foget wat wen happen.
Mo betta you use yoa powa
Fo make dose guys homeless,
An den bring um down.
You my Boss, an you da one
Dat no let us guys get hurt
Jalike you one shield fo us.
12 Wat come outa dea mout
Show dey do bad tings.
Cuz dey talk big an bulai,
An try fo put kahuna on top odda peopo,
Dey goin get trap fo dat.
13 Wipe out dem guys,
Cuz you tell “Laytas” to wat dey do.
Wipe um out,
Fo dem no come back no moa.
Den peopo goin know,
Even in da mos far places
Inside da world,
Dat God da one dat get da right
Fo stay in charge a da Israel peopo!
(Time out fo da music.)
14 Ery day, sunset time, dey come back
An make big noise, jalike dogs.
Dey go all aroun da town.
15 Dey go all ova fo look
Fo someting fo grind,
An if dey no eat enuff,
Dey goin make big noise.
16 But me, I goin sing
Bout how strong you stay.
Ery morning, I goin yell to erybody
Dat you da greates
Cuz you stay tight wit yoa peopo!
Cuz you stay jalike one high place
Wea I can go hide
Weneva I get real hard time.
17 You, da one dat make me strong.
I goin make music fo you,
Cuz you jalike one high place
Fo me hide!
You da God dat stay tight wit me!