56
Sing Cuz You Trus God
Fo da main music guy. One David kine song fo da tune “Da Dove On Top Da Oak Trees Far From Hea.” He tell God fo proteck him, da time da Filisha guys make him prisona Gat town.
1 Eh God! Do good tings fo me!
Cuz get peopo dat like catch me
Fo bus me up.
All day dey stay fight me
An put presha on me.
2 Da ones dat talk bad bout me
Put plenny presha on top me all day.
Get plenny high makamaka peopo
Stay attack me.
3 But any time I stay sked,
You da one I trus.
4 I hear wat God tell an I tell, az good.
I stay trus God.
Az why I no stay sked.
Da ones dat stay agains me,
Dey ony peopo!
Dey no can do notting
To me, you know!
5 All da time, dey change da tings I tell.
Weneva dey tink bout me,
Dey make one plan
Fo do someting bad to me.
6 Dey meet fo make plan agains me.
Dey hide fo make trouble,
Cuz dey wait fo one chance fo kill me.
7 So den, God, no let dem guys get away
Afta all da bad kine tings dey wen do!
Make all dose diffren peopos
Come notting
Cuz you tell “Laytas” to wat dey do!
8 Awready you wen count all da times
I gotta run away.
Put my tears inside yoa watta bag
Fo you no foget how plenny I wen cry.
Fo shua all dis stay
Inside yoa book.
9 Den bumbye, wen I yell fo help,
Da guys dat stay agains me
Goin turn aroun an run away.
I know dis:
God stay on my side.
10 I hear wat God tell, an I tell, az good!
I hear wat Da One In Charge tell,
An I tell az good!
11 I stay trus God,
Az why I no stay sked.
Odda peopo, dey no can do
Notting to me, you know!
12 God, I wen make plenny promise to you,
An now, I goin do
Wat I wen promise fo do.
I goin make sacrifices
Fo tell you “Mahalo!”
13 Cuz you wen help me fo me no mahke,
So I no trip an fall down.
Cuz a dat, God, ery place I go,
You stay right dea,
Jalike you da light
Fo make me stay alive.