48
Mount Zion, Wea God Town Stay
Song Fo God fo da Korah ohana guys sing
1 Da One In Charge, he da greates!
Real good fo erybody
Tell he da greates
Ova dea inside God town,
On top da hill dat stay spesho fo him!
2 ✡ 48:2: Matt 5:34-35Look awesome up dea, Mount Zion,
Mo awesome den Mount Zafon,
Da mountain fo da odda gods.
Erybody inside da whole world
Stay good inside
Cuz Jerusalem stay da town
Wea God da big King stay.
3 God stay inside da strong buildings
Dat stay dea.
He make shua da peopo ova dea know
Dat notting goin hurt dem,
Cuz he jalike one strong building
Fo dem too.
4 Ova dea, da king guys
An dea army guys come togedda.
Dey go thru da land togedda
Fo take ova Mount Zion.
5 But wen dey look Mount Zion, dea jaws drop!
Dey come sked an run away!
6 Real fas dey come all sked an shaking,
Jalike one wahine
Dat start fo born one bebe!
7 Jalike wen da strong wind
From da east side
Bus up da big Tarshish kine ships!
8 Da tings we wen hear bout,
Now we see um inside da town
Wea Da One In Charge,
Da God Ova All Da Armies stay,
Da town wea oua God stay.
God put his town dea foeva.
(Time out fo da music.)
9 Eh God, wen us guys inside yoa Temple,
Us guys tink plenny fo no foget
Da way you stay tight wit us guys.
10 Eh God, get peopo
Inside da mos far place
On top da earth,
Dat know wat kine god you,
An dat tell dat you da greates.
You get da powa
Fo do da right ting erytime.
11 Da peopo dat stay live Mount Zion
Stay good inside.
Da peopo from da towns
All ova Judah side,
Stay good inside too.
Cuz you judge peopo da right way.
12 Go walk all da way aroun Zion town,
Count how much watch towas get dea.
13 Check out da strong wall aroun da town,
Go walk thru da strong buildings
Inside da wall,
Fo you guys tell bout um bumbye
To da peopo dat goin come afta.
14 Tell um dis: “Dis God,
He da God fo us guys, all da time.
He goin show us da way fo go
Till us mahke.”