Book Numba Two
42
(Songs 42–72)
One Guy Dat Live Far From His Country
Tink Bout God
Tink Bout God
Da pries guys from da Korah ohana make dis song fo teach. Dis song an Song 43, befo time was one song.
1 Eh God!
I like know you real good inside,
Jalike one deer
Dat gotta find one stream
Fo drink watta.
2 Inside, I tink lidis:
“I like see da God dat stay alive,
Jalike I stay thirsty fo see him!
I like know wen I can go by him
Fo stan in front him!”
3 Ery time, peopo stay aks me,
“Eh! Yoa God,
How come he no stay by you?!”
An da ony ting I do, I cry,
Day time an nite time!
4 I spill my guts,
Cuz I no foget how was befo time.
Dat time, I wen go
In front plenny peopo
Fo bring dem by da Temple fo God,
Wit erybody amping out
Cuz dey stay real good inside.
Had choke plenny peopo stay tell God
“Mahalo plenny!”
An all dem go togedda fo pray to him!
5 I tink lidis: “Eh! How come
I stay all bum out inside?
How come I stay moan?!
Mo betta I wait fo God help me!
Cuz you know wat? I still goin get
Good tings fo tell bout him!
Him, he da God fo me,
An he stay get me outa trouble.”
6 Eryting inside stay all bum out.
Still yet, I goin tink plenny
Bout you, my God,
No matta I stay on top
Mount Hermon
O on top da Mizar Hill,
An inside da land
Wea da Jordan Riva start.
7 I feel jalike I stay
Inside da real deep place
Inside da middo a da ocean.
Da watta make big noise,
Soun jalike all da wattafalls
You wen make.
Da watta come all aroun me.
Jalike all da big waves
Dat you sen on top me.
8 Day time, Da One In Charge
Stay show me
Dat he stay tight wit me.
He do dis fo do good tings fo me.
Nite time, I get one song fo sing to him,
Dat song, jalike one prayer
To da God dat make me live.
9 I goin talk lidis to God:
“Eh! You jalike
One big solid rock fo me!
So, how come
You wen foget bout me?!
How come I gotta live all sore inside,
Erytime da peopo dat stay agains me,
Come afta me?!”
10 Da peopo dat stay agains me,
Dey like make me come shame,
Jalike my bones real sore,
Enuff fo kill me.
All day dey talk:
“Eh! Yoa God, how come
He no stay by you?!”
11 I tink lidis: “Eh! How come
I stay all bum out inside?
How come I stay moan?!
Mo betta I wait fo God help me!
Cuz you know wat?
I goin get good tings fo tell
Bout him still yet!
Him, he da God fo me,
An he stay get me outa trouble.”