33
Sing Fo Tell God He Da Greates
1 Eh! All you guys dat get um right
Cuz you stay tight
Wit Da One In Charge,
Go yell
Cuz you guys feel good inside!
Az good wen you peopo
Dat stay do da right ting
Tell how awesome him!
2 Play da small kine harp fo tell
Dat Da One In Charge, he da greates.
Play da ten-string harp fo sing fo him.
3 Sing one new song to him.
Play um good, an yell
Cuz you stay good inside!
4 Eryting Da One In Charge tell,
He do um.
Eryting Da One In Charge do,
You can trus him.
5 He feel good wen peopo do da right ting
An judge da right way.
All ova da world, Da One In Charge
Erytime stay tight wit his peopo.
6 Da One In Charge,
He jus tell da sky fo come,
An da sky come.
He ony need fo talk
Fo make all da stars up dea come.
7 He bring togedda da watta
Inside da ocean an keep um dea,
Jalike he put da open ocean
Inside one storage place.
8 Erybody dat live inside da world,
Show respeck fo Da One In Charge!
All you peopo dat stay live dea,
Stay sked a him!
9 Cuz he wen talk, eryting start.
He wen tell wat gotta happen,
An eryting come lidat.
10 Wen da diffren nations make plan,
Da One In Charge jam up dea plan.
Wen da diffren peopos figga wat fo do,
He no let um do um.
11 Eryting Da One In Charge make one plan fo do,
Dass how goin stay foeva.
Wen he tink wat fo do,
Dass how goin be foeva.
12 Da country dat get
Da One In Charge fo dea God,
Eryting goin go good fo dem.
Dey goin be da peopo
Dat God pick fo be his peopo.
13 Da One In Charge,
He look down from da sky
An see all da peopo ery place.
14 From da place he live, he stay watch
Erybody dat stay live on top da earth.
15 He make dem fo dem all tink.
An he undastan eryting dey do.
16 Jus cuz one king get plenny army guys,
Dat no mean he goin get outa trouble.
Jus cuz one army guy real strong,
Dat no mean da guy goin win da war.
17 If you tink you goin get outa trouble
Jus cuz you get
One good kine army horse,
You wrong.
Da horse real strong fo shua,
But he no goin help you fo run away.
18 But Da One In Charge, he stay watch
Da peopo dat get respeck fo him,
Da ones dat stay wait,
Dey shua Da One In Charge
Goin show he stay tight wit dem.
19 Da One In Charge
Goin get dem guys outa trouble
So dey no mahke.
Wen no mo notting fo eat,
He goin give dem stuff fo eat
Fo make shua dey stay alive.
20 Us guys stay wait
Fo Da One In Charge take kea us.
He da One dat help us.
He jalike one shield
Fo no let us guys get hurt.
21 Us guys stay tight wit Da One In Charge.
Az why we stay good inside.
Cuz us guys know who him,
Dat he stay good an spesho,
Az why us guys stay trus him.
22 Eh! You Da One In Charge!
Us guys like fo you
Stay tight wit us guys,
Jalike us guys stay wait
Fo you help us!