14
Peopo Dat Do Bad Kine Stuff
One David kine song fo da main music guy
1 ✡ 14:1: Rome 3:10-18Da stupid peopo, dey tink
“No mo God!”
Dat kine peopo, dey jam up stuff.
Pilau wat dey do!
No mo even one a dem dat do good kine stuff!
2 Da One In Charge, he look down from da sky
An see all da peopo.
Da One In Charge look aroun fo see if get even one guy
Dat undastan stuff fo real kine
An like know God fo real kine.
3 But no mo dat kine peopo.
Erybody same same.
Dey all like go da wrong way
An come pilau inside,
No mo even one a dem dat do good kine stuffs!
4 Dem guys dat stay do wass wrong,
How come dey neva learn notting?
Dey still do wass wrong!
Easy fo dem eat up my peopo,
Jalike easy fo dem eat bread.
An dey no pray to Da One In Charge.
5 Cuz you know wat?
Bumbye, someting goin happen
Fo make dem guys come real sked.
Cuz God stay ery place
Wea get peopo dat stay do wass right.
An he stay right dea wit dem.
6 Weneva da pooa peopo dat no mo powa
Make plan fo do someting,
You guys ony make fun a dea plan.
But Da One In Charge, he goin make shua fo his peopo,
Notting bad goin happen to dem.
7 Fo shua! I like God do someting—
Da God dat stay Mount Zion side—
Fo get da Israel peopo outa trouble real quick!
Cuz bumbye, wen God make eryting come good one mo time fo his peopo,
Erybody dat come from Jacob goin yell cuz dey feel good,
Dey da Israel ohana, an dey all goin come good inside.